Трыквшти Иордании йрыуу апсуа сабиква Согъвым апны репатриация ауысла Апсны аминистерства йадыргалыз атшпсщарта йгIадгылтI.
Барганджиа Саид
Июль а 1 атшын Трыквшти Иордании йрыуу 12 сквша йгIашIарышвта 17 сквшадза зныбжьу апсуа саби 70-гIв рапхъанчIвиква рпсадгьыл апны тшпсырщаныс Согъвым йгIайтI. Репатриация ауысла Апсны аминистерства ауат рыхъазла йапхъахауата саби тшпсщарта адыргалтI.
Репатриация ауысла аминистр Дбар Беслан йшихIвазла, атшпсщарта сквшыкI айхIа йдрыхIазыруан, йара ауыс ангIархъвыц Трыквшта, Сирия йгьи Иордания рпны апсуа диаспора йаныршIашвуз агIан акIвпI.
«Репатриация акIвхIыршауищтара йапхъахауата ари аъарагIв саби хIзадкIылтI. УахьчIва Сирия йауу агIащтийыгIвчва гвыпгьи хIыцзара атахъын, ауаса ауат швхIаусыгIваквакI гIарпырасын йгьызгIамитI», - йхIватI аминистр.
Дбар йшгIаликIгIазла, ари йапшу агIайраква адунейла йхъылапсу апсуаква радкIылра апны хвы узаквымцIушта магIны ду рымапI. ЙалкIгIата, йхIватI ауи, «асабиква анабадыруа».
«Ауат атшпсщарта йъадзану дара-дарагьи агIвзачвахуштI, араъа йауу асабиквагьи йрабадыруаштI. ХIшгвыгъауала, уадыргIвана йабахъмаштылхуата йащтаныкъвуштI», - ари апш гвыгъара йымапI аминистр.
Атшпсщарта йгIайыз асаби 70-гIв йрыуата заджв-маджвыпI апсуа бызшвала йызчважвауа. РызджьакI цри бызшва арыпхьарала йакIвхIыршуз акурсква рпны йапхьатI. Ауат акурсква Трыквшта апны йадызгалызгьи репатриация ауысла Апсны аминистерства ракIвпI.
Ареспублика асасчва йырзадыргалтI Апсны атурых ларпшырта хъадаква ргIамдарала йырчву апрограмма. Асабиква рапхъанчIви псадгьыл йангIадза апхъапхъадза йыддырбатI Апсны йапхъахуз апрезидент Ардзынба Владислав йнышвынтара йгьи Айсра чIахIра амузей.
«Асабиква апрезидент Хаджимба Раульгьи йынйуштI. Ауат йджьащахъву акультура-ларпшра программа рымазлуштI», - йашIипхьадзатI репатриация ауысла аминистр.
Трыквшта йгIатыцIыз асабиква ргвып апсуа йгьи акIавкIаз культура квтаква рфедерация йадыркIылтI. Ауат йрыцгIайыз Астомбыль апсуа культура квта ахъада Эшба Шамиль йшипхьадзауала, асабиква Апсны йъагIайыз гIаншара дупI. Ауи йшихIвазла, асабиква арыла йшгIайуашыз анырдыр «гвалагIваласракI гIарылашватI».
«РщардагIв Апсны апны зынгьи йгьаъамызтI. Ауат йрымаджьащахъвата йгIакIвзыршауа зымгIва ддырдыритI. Са йхъасцIитI араъа йъадзану ауат рапхъанчIви псадгьыл рахIагьи цIолата бзи йшырбуш», - йхIватI Эшба Шамиль.
Иордания йауу агвып дырхъадапI йхынхауата Апсны йгIайыз Чичба МухIамад.
«СынчIва агIыгIв сабичва сыцгIайтI. Ауат Апсны йапхъахауата йырбитI. Ари апш амаль шгIанша анрасхIв ауат йазгIашыкъта, йангIаджвыквылуаш рзымчхIахуата амшква рпхьадзун. ХIсабиква апхъалагьи йыргIахьан Апсны ахабарква, хIара (Иордания йту апсуа-абаза диаспора хIпны – аредакция ррытаразга) ауи аунашва рахIхIвлитI, ауаса, дара йшырхIвахызла, рыла йабази рлымхIа йагIази гьузашIырпшуашым», - йхIватI Чичба.
Трыквшта йауата тшпсщара йгIайыз йрыуазаджву, 13 сквша йырту Ашуба Селена Апсны апны бзидздза цIуата зны даъан, ауи ахIатырла йылхъаштылхыз щардапI. Ауаса ауи апсуа бызшва шылдыруа гьгвымхам.
«ХIара хIунагIва апны зынзамыза апсуа бызшвала хIчважвитI. Йалныс ауыпI зны Апсны сгIайдзахырныс, араъа швабыж йсгвапхатI», - абараса лгвгIанаграква хIыцагIвылшатI апхIвыспачкIвын.
Ауи длыквлата Трыквшта йауу, 14 сквша йырту Хулан Лина мурад лымата дгIайтI Апсны: лан лыжвла ъану ахакв ахъазла лдырраква рыцIагьи йылрыцIоларныс, йауацIылхырныс лтахъыпI.
«ХIара йацы акIвпI хIангIадза, йыгIбаз мачIыркIвапI. Сара швабыж сайгвыргъьатI Апсны сгIайуашта аныздыр. Сан дапсыуапI, ауи хабар щарда гIасалхIвуан Апсны ахъазла, сара ауи лалала йыздыруа мачIпI, ауаса араъа съадзану сдырраква йрыласырхIарныс стахъыпI», - лхIватI апхIвыспа.
Трыквшти Иордании йрыуу асабиква Апсны жвамшкIла йгIайтI, ауат Согъвым йтагылу сасыртакI апны йандыргIалтI. Апсны йъадзаъазлуш апIатла гIацIанакIуата ауат рыхъазла йауацIыху тшпсщара-ларпшра программа адыргалтI.
швталра йа тшаншвцIара атахъыпI.