Базба Селма

Апхьара сквшшIыц ангIалага АААК диспансеризацияла апроект джвыквнацIахтI. ЙшцIасхаз апшта, ауи гIвхъвыкIта йшата йакIвшатI: аща дырхъвыхныс йнарахвын ауат агIарбараква рымата асабиква йырпшытI.

Уарча апхьарта апхьагIвчва йырпшытI апедиатрква Зыхвба Асмати Шаповалова Надежди, акардиологква Бжинава Давиди Бондарева Ирини ЭКГ нзырхауа амедахща Джалагониа Луиза дрыцта, аэндокринологква Делба Лиани Гуниа Радмили, ауролог Зарандиа Юрий, аневролог Таниа ХIаджьрат, аофтальмолог Асланян Алла йгьи аотариноларинголог Халбад Рица.

АйъазагIвчва йырцхърагIун аэлектрон анкетаква тазгIвуаз АААК анхагIвчви амедицина колледж апхьагIвчви: Вишнева Анастасия, Гвынба Элана, Нерсенян Диана, Ходжикян Алина йгьи Аванесов Артур.

Астудентква йырхъазымкIва апроект йгIалалтI Тарба Надежда, Ломиа Нарт, Закарайа Хамида, Джонуа Эрика, Чкадуа Ада.

АААК ахъвшара ОСАЗ аунашвахъцIагIв Хагба Изольда диспансеризация шджвыквырцIахызи архъвыхра шакIвшази гIахIалхIвтI.

«АААКи Апсны Республика згIвадарахчарала а-Министерстви апроект архъйара атаджвыквырцIахтI. Уарча – апхын амщтахь йапхъахауата хIъагIайыз кытпI. Архъвыхра йгIалалтI араъа йаъу Агвдзера айсра госпиталь айъазагIвчвагьи. Йызпшыз ацIайква йара уыжвжвы уырмайъазакIва йамуашта заджвгьи дгьгIарылымцIтI. Ауат рзгIвдара йшахьпшуаш йрылабжьатI», – лхIватI ауи.

Хагба адгалагIвчва сынчIва ужвыгьи пщызджьара йцарныс шыргвыгъу гIалылкIгIатI.

Амш ауацIа айъазагIвчва зныбыжьла йапшым апхьагIвчва йырпшуамца закI зхьуа гIаддырдыруанта ашвъа йанырцIун. АмедикквакI ари апроект йапхъахауата йгIалалтI.

Ауат дрыуапI аневролог Таниа ХIаджьрат.

«АпхьагIвчва рдиспансеризация йапхъахауата сгIадрайгватI. Ари апроект бзира алата йспхьадзитI, йауа ухIварыквын, ауи йгIацIсгIвацата йаназаману гвы зрымтырныс ауашыз азгIваква гIанарбитI. СгвыгъитI ари Апсны акыт щарда гIацIанакIуашта», – йгIаликIгIатI ауи.

Таниа неврология нархарала асабиква рзгIвадара уахьпшра шатахъугьи йхIватI.

«Анерв ргIапсра згIвадазлара ахъазла йчпара атахъу гьбаргвым. Уарча асабиква шызбазла, ауат ранчви рабачви ргIариква рневрв йгьи рпсихика аъащаква гватра шырзалырхуашла срыхIвара стахъыпI. АцIайква агаджетква ауи аъара йшыртачIвамызлуш, книга рыцIа щардата йшапхьуш, рхъа йшадынхалуаш, рпсихика тамамта йщаквзыргылуаш штшапырщылуаш швахъпшылра атахъыпI», – йгIацицIатI ауи.

Уарча апхьарта адиректор Кархалава Омар АААК анхагIвчвагьи айъазагIвчвагьи асабиква рзгIвадара дырхъвыхырныс лшара ъарзыгIандыршаз ахъазла зджьара йгIанымхауата дшырзыразу йхIватI.

«ХIапхьарта апны 120-гIвы апхьитI. Ауат дзачIвызлакIгьи зджьарагьи дымцауата йара апхьарта апны знархараквала йапшымыз медицина рхъвыхра дгIакIылсырныс лшара йаутI. ХIынхагIвчва гвып рыхьызла АААКгьи ари ауыс йапщылу зымгIвагьи аразыра ажваква рзынасырхара стахъыпI», – йхIватI ауи.

Диспансеризация – Адуней апсуа-абаза конгресси Апсны Республика згIвадарахчарала а-Министерстви йацдырхъйауа проектпI. Ауи Апсны акытква рапхьартаква рапхьагIвчви рарыпхьагIвчви йнардзу медицина цхърагIара шрадзуш йазынархапI.