Барганджиа Саид

Адуней апсуа-абаза конгресс ЙхIаракIу асовет аунашвачпагIв Эгьзакь Мусса мачвы ацIайцIатI АААК апны а-Конгресс ЙхIаракIу асовет аунашвачпагIв йунашва йацIата йынхуш ауысхагIвчва гвып ргIаныршара ауысла ащаквыргылра. АуысхагIвчва гвып друнашвачпагIвпI Тания Кан.

ШIыцта йдыргылыз аунашвачпагIв йшгIаликIгIазла, ауысхарта шIыц гьунашвахъцIартам, адкIылара аустав хъвдаквцIараква нкъвызгуш, аунашвачпагIв йыргылуа ахачIвква зырхъйуш хъвшарапI.

Араъа гватра ду азалхызлуштI АААК ашIыпIа советква рыцынхара.

«ХIара йшыгIбауала, а-Конгресс ашIыпIа советква рынхара аквшвауата, рацынхара хъвдаквыщт амата йадгалра атахъыпI. Ауи нархара хъадата йамапI а-Конгресс аунашвачпагIв Эгьзакь Мусса йунашва йацIата йынхуш ауысхагIвчва гвып ргIаныршара», – йхIватI Тания Кан.

Ауи йгIацицIахтI ужвы асахIат адкIылара агеография рыцIа-рыцIа штшауацIнахуа, шIыпIа совет шIыц щарда шгIаншауа, ари акIвшаща апхъахьылагьи йгIашIамсуата йшымгIвайсуаш. А-Конгресс асоветква уахьчIвала йгIаншахьатI йгьи йынхитI Апсны Республика, Трыкв Республика, Россия Федерация (Къарча-Черкес, Къабард-Балкъар, Ставрополь, Санкт-Петербург йгьи Москва) рпны, ауаса «ари ауыс ахъа джвыквылгIвацатI».

Ахъвшара шIыц апахь йгылу ахачIвква йрыуапI а-Конгресс асквш аурала йызланхуш апланква ррыхIазырра, ауат аунашвачпагIв йзадгалра йгьи абзазара ралажьра шымгIвайсуа архъвыхра, ансисквша афинанс нхара йгьи анахьанат нархартаквала агIарбара швъаква ррыхIазырра, аунашвачпагIв дызлу алачIваракви айззаракви радгалра, ауагIа ртшазынархараква рыдынхалра, ауасамцара аунашвачпагIв йщаквыргылраквали датша хъвдаквцIарали йгIайрахауа ауысква рырхъйара.

Эгьзакь Мусса йщаквыргылрала датшагьи йгIанйыршатI Абаза-апсыуа уагIа ртшауацIыхра ацхърагIара знархару Адуней адкIылара «Алашара» апрезидент йуысхартагьи, ауыгьи Тания Кан йакIвпI унашва ахъызцIауа.