Бзыб йапхъахауа аквтанай апхьарта апны актер азъазара йъазырбжьауа акружок йдрыхIазырыз аргылчIв гIадырбатI. Акружок анхара адгалра Адуней апсуа-абаза конгресс ацхърагIатI.
Алшундба Г. йыхьыз зхъу Бзыб йапхъахауа аквтанай апхьарта апны хымызкI руацIа актер Шамба Алхас унашва зхъицIауа актер азъазарала акружок нхатI. Ауи апш гвып апхьарта апны йгIаныршара арыпхьагIв Барцыц-Гыцба Инга щарда цIуата йылгвалан.
АрыпхьагIв йшылхIвауала, акружок ахъазла ахча щарда дазыпшгIатI, лгвы гьлымрыдзуазтI.
«Ауи асабиква рцри бызшвала культура, азъазара бзи йдуырбарныс лшара бзи гIаунатитI», – лхIватI алалра гIахъылтIуата апсуа бызшвала арыпхьагIв Барцыц-Гыцба Инга.
Ауаса ахчадъа акружок гьузадгалуам, здырраква ацIайква йрыцагIвызшуш артист дгьуызгIауам.
«А-Конгресс анхара сара ауаъа йынхауа Хагба Изольда лсоциал сетквала сахагIвазан. Сара ауат уыздгылта «момо» гIауазымхIвуаш уагIазшва йызбатI. Йара ауи акIвпI йшгIацIцIыз. ХIгвыпгьи, ан-абачвагьи, асабиквагьи рыхьызла ауат йъахIыцыркIыз ахъаз сшырзыразу расхIвра стахъыпI. ХIаргьи хIсабиквагьи хIыхъаз ауи магIын ду амапI. Сара йстахъын атеатр гвыпква апхьартаква зымгIва рпны йынхауата йщаквгылазларныс», – йгIацылцIатI Барцыц-Гыцба.
Акружок даунашвачпагIвхатI Чанба Самсон йыхьыз зхъу Апсуа драма театр актер Шамба Алхас. ХымызкI руацIа ауи апхьагIвчва атеатр уыс азъазарала дрыдынхалуан. АргылчIвквагьи анхара шабгугьи апсуа бызшвала йакIвшун.
Ауи акIвпIта, апроект культура нархара йахъазымкIва арыпхьара нархарагьи йадсылитI, цри бызшвала аршIыйара тшауацIнанарыхитI. Атеатр гвып анхара йагIарбагахаз аргылчIв агIарбара Аджьба Таиф йысквш 80 йаквдыршватI.
Йапхъахуз ахъвы апны апхьагIвчва ауысагIв йымшгIвыра ашIчIвараква йгIарыпхьатI, ауи дшгIабзазаз, асквшква 1992-1993 рагIан йакIвшаз Апсны ауагIа р-Абашта айсра агIан ауи дызлашваз арыцхIагIараква гIархIватI. Ауи амщтахь апхьагIвчва алокIква йрылу атшы Бзоу йгIаквчважвауа Аджьба Таиф йхабаргIвырала йдыргылыз аспектакль гIадырбатI.
Арыпхьарали жвлара джьгаррали згIвадарахчарали АААК ахъвшара аунашвахъцIагIв Хагба Изольда йшылхIвауала, а-Конгресс йанакIвызлакIгьи асабиква ргвбайара йшазхIуш гватра азалнахитI, ауи арыпхьара апны магIын ду зму уыста йапхьадзитI.
«ХIара Бзыб апхьарта арыпхьагIв Барцыц-Гыцба Инга апхьарта апны актер азъазарала атшыбжьараква акIвыршарала лгIаджвыквцIара йацкIра атахъыта йхIпхьадзатI, йауа ухIварыквын, ауи швабыж цIолата йгIалгвынгIвитI асабиква ауатква йырзычпазларныс магIныта йаму, ларгьи лапхьагIвчва азъазара адуней тшадыркIылырныс лшара рылтра швабыж йылтахъыпI. ХымызкI йгьгIамта ауырам, ага ауаса йаъазтынгьи, ауи азаман ауацIа асабиква рылшараква узыбитI. Ауи азаман ауацIа апхьагIвчва актер ъачIвагIа, аршIыйара рымагIальаматта, йызшIысу гIадырбарныс ртахъыта йузычпитI. ЙшыгIбауала, ауи гIарыдахIвтI. Сара ауыс гIаджвыквызцIаз Барцыц-Гыцба Ингагьи, актер Шамба Алхасгьи, апхьарта аунашвачпагIв Агрба Риммагьи, апхьарта арыпхьагIвчва ргвып шабгугьи ари апроект къарута йаларцIаз ахъазла сырзыразпI», – лхIватI Хагба.
Апроект йалаз йрыуу апхьагIв ТхIагвыщ Анастасия ари ауыс дазычпазтын дапшныс лшара ъагIалыртыз дразыпI.
«Са сайгвыргъьитI ари апроект съалашваз. Са сыхъазгьи сыгIвзачва рыхъазгьи ауи шIыцран. Апхьара сахIатква рымщтахь хIгIанхунта тшыгIбжьун, апсуа бызшвала хIшчважвуш хIащтан, аргылчIвквагьи хIыбызшвала йхIрыхIазыруан. Акружок ужвыгьи салазларныс стахъыпI», – лхIватI ТхIагвыщ Анастасия.
Бзыб апхьарта агвып йыззынадзаз апны йгIашIасырныс гьыргвыгъам. Ауат апхьагIвчва рыхъаз ужвыгьи аршIыйара проект шIыцква шгIархъвыцуаш йащтапI.
швталра йа тшаншвцIара атахъыпI.