Асквш ауацIа апроект хвкыткI – Гвып, Хвап, Дранда, Тамыщ йгьи Джьырхва – рапхьагIвчва ахIбачва 65-гIв райхIа гIалалтI. Ауи акIвымкIвагьи атшыбжьараква йгIарылалтI апхьагIвчва ар йазрыхIазыррала СогIвым йалакIу агвыпгьи.

АшIыпIа хъвшараква рыцынхарала АААК ахъвшара аунашвахъцIагIв Жьыба Дмитрий агIаджвыквцIара магIныта йаму гIаликIгIатI:

«АААК ЙхIаракIу асовет аунашвачпагIв Эгьзакь Мусса йъахIыцикIыз абзирала хIара хIычкIвынчва патриотта йбжьара йазынарху апроект хIырхъйарныс лшара хIымапI. АчкIвынчва ауи айсра дырра ззырхIвауа гIаргвынгIвырныс лшара бзи гIарнатитI. Са ари йапшу апроектква у-Псадгьыл ахъазла къвырльыкъв ухара затахъу агIагвынгIвра, дзачIвызлакIгьи щата багъьа дыквыргылра йацхърагIауата йспхьадзитI», – йгIаликIгIатI Жьыба.

ЙцIыхъвахауата тшыбжьара йцаз Джьырхва йауу апхьагIвчва ракIвпI. АчкIвынчва «Апсуа хысырта клуб» йаъан. Ауат ашварагIварадара ахабзаква гIаргвындыргIвытI, абджьар ушалаъабуш ддырбатI. УацIыхъван апхьагIвчва абжьагIвчва гIархъпшылуата йхыстI.

«ХIара хIгвы йтымцIуашта лахIвара щарда хIдырчвытI, шIыцра щарда гIдыртI. Тамамта хIгылта хIшкIылпшуаш хIазырбжьатI, уацIыхъван абджьардзала хIхысырнысгьи хIылшатI. Ауи хIа хIыхъазла пышва мчыпI. Ари хIзадызгалыз зымгIва Анчва дырзыразхатI!», – йхIватI апхьагIвчва рыуа заджвы.

Апроект архъйара йацхърагIатI «Апсуа хысырта клуби»  Апсны Ахъахчара а-Министерстви. Атшыбжьараква рыцIа йъакIвшуз аклуб апны акIвын, ауаъа апхьагIвчва ашварагIварадара ахабзакви абджьар ушалаъабуши ддырдыруан.

Асквш ауацIа апроект йгIалалыз зымгIва архъв йыргун. Ауат экскурсия рзадыргалуанта йапшым абджьарква ддырбун.

АшIыпIа хъвшараква рыцынхарала АААК ахъвшара аъачIвагIагIв Симония Херсон апроект архъйара йацхърагIаз зымгIва йразыра ажваква рзынайырхатI.

«ХIырзыразпI СогIвым апны аунашвахъцIарта-пшыхвырта квта хIцаларныс лшара хIзыгIанзыршаз Ахъахчара а-Министерства аунашвачпагIвчва. КIьыдата сшырзыразу расхIвра стахъыпI хIмурад хIырхъйарныс йгIахIцхърагIаз ахысырта клуб анхагIвчва. ЙгIалскIгIара стахъыпI апроект ачкIвынчваква йырхъазымкIва ахIвссаквагьи шгIалалыз. ХIара гвы ахIттI ауат ари ауыс азыгIальаматра ду шазрыму, пчарыхIта йшхысуа, абжьагIвчва йгIарыздыргылуа ахачIвква шырзырхъйауа», – йгIацицIатI ауи.

Апроект хачIвыта йаргылитI чкIвыныргIа райсра-патриот бжьара адгалра, айсра ъачIвагIаква руысла рдырраква йрылархIара.

Апроект асквш 2024 агIан йджвыквырцIатI, йаргьи сабап алата тшгIанарбатI: апхьагIвчва айсра уысла апычIв дырраква раура йахъазымкIва рджьауапкIрагьи йалахIатI, гвыпта уыс ацдырхъйауа тшырбжьатI. АдгалагIвчва апроект хIапхъагьи йнадырдзарныс ргвыгъапI.