Адуней апсуа-абаза конгресси Чанба С. йыхьыз зхъу Апсуа къральыгIва драма театри акытква рапхьагIвчва аспектакльква йырпшырныс, атеатр абзазарагьи ддырдырныс лшара рызтуа апроект шIыц джвыквырцIатI.
Апроект зымгIва йрапхъата йалалтI Тхьына кыт апхьарта апхьагIвчви арыпхьагIвчви. Акъала хъада асасчва атеатр апны экскурсия джьащахъва рзадыргалтI, ауи акIвлыршатI Апсны апны гIатгара зму ажурналист Когониа Элеонора. Ауи атеатр апны йщаквгылу азазаъащаква дрыквчважватI, пшгIвыта уаъазларныс йамагIну, азъазари йгIахъвмаруа артисткви хвы шрыквуцIауа гIауырба йшауаш ралхIвтI. Ауи акIвымкIвагьи асабиква йгIаргвындыргIвытI апшыгIвчва йырбауа аргылчIв щардагIвы ргIапсара шалу, ауат рацынхара йшагIарбагу. АпхьагIвчва асцена ащтахьгьи йдырцатI, арежиссеркви агIахъвмарыгIвчва гвыпи йрабадырдыртI, аспектакль гIаныршара уыста йапщылу гIарархIвтI.
АпхьагIвчва ргIайра Апсны АуагIа руысагIв Смыр Рущбей йысквш 75 йаквдыршватI. АргылчIв йащатахатI амхIаджьырра арыцхIагIари аубых уагIахъа рыдзри йгIарыквчважвауа апоэма «Семра». АпхьагIвчва йрымаджьащахъвадзата агIахъвмарра йапшуан, афырква ргвы рзакъвпуан, рыла йыцIсуаз агIаншараква йапшым алахIвараква гIарыларцIун.
«Апрапса шапырырхуаз йгIашIарышвта хIара закIы йапшым алахIвараква хIнарахвтI. Актерква рфырква ртурасква бзидздзата йгIадырбун, йыншауа зымгIва хIгвы йалалуан. УацIыхъван йыгIбаз щарда хIалачважвахтI, хIхъвыцракви хIлахIваракви абахIхIвтI, дзачIвызлакIгьи йгвы йара рыцIа йгIаликIгIаз закI гIатахатI», – ллахIвараква хIыцагIвылшатI апроект йгIаланакIыз ашIаква рыуа заджвы.
Атеатр ацара апхьагIвчва рыхъаз ларпшрата йахъазымкIва рдырраква йрыладырхIарныс, азъазара адуней рыцIа йраргванхарныс лшаратагьи йалтI.
«СынчIва хIара акытква рапхьагIвчва СогIвым апны Апсуа драма театр йгIайырныс лшара рызтуа проект шIыц аухIщтныс йаквхIкIтI. Ауи агвгIанаграла атеатр адиректор Мыквба Хьыбла тшылзынахIырхатI, ларгьи хIшIа йгIатылымщтуата йхIыцылкIтI – Анчва дылзыразхатI. Аспектакль йапшра йахъазымкIва Когониа Элеонора асабиква атеатр длырбатI. Кьангьаш гьгIазгуам йгIагIдыз ащардагIв атеатр асцена ащтахьла йыншауа йапхъахауата йшырбаз, ауи шрымаджьащахъвахаз», – йхIватI арыпхьарали жвлара джьгаррали згIвадарахчарали АААК ахъвшара (ОСАЗ) аъачIвагIагIв Хьышба Науыр.
ОСАЗ аунашвахъцIагIв Хагба Изольда апроект хачIв хъадата апахь йгылу йгIадзынгылуа чкIвыныргIа атеатр бзазара дырдырра, апсуа бызшви литератури ауагIа йрылагара ракIвта лхIватI.
«ХIа йшхIпхьадзауала, асабиква ргвбайара йалаумырхIауата йгIадзынгылуа ашIара йшатахъу апшта йгьузыбжьушым, йгьрызхIушым. Асцена ащтахьла йыншауа ъарбауа, атеатр атурых ъардыруа, ауаъа акафе йъанашылуа – асабиква рыхъазла ларпшрапI, сабап злу замангащапI, ргвы анцIрала йгIатахуш гIаншара джьащахъвапI. Йалныс ауыпI заджвы дактерхарныс йтахъхарнысгьи – сара ауи сайгвгъитI. Цри бызшвала аргылчIвква ацIайква ауи ддырдырырныс рыцIа йрымагIальаматхарныс, рансимш бзазара апны рыцIа йгIадрысабапларныс йахъвушта хIазхъвыцитI», – лхIватI ауи.
Апроект магIныта йаму ауысла лгвгIанаграква гIахIалхIвтI атеатр адиректор, Апсни ГIвадахь Осетии рпны гIатгара зму артистка Мыквба Хьыбла.
«ХIара Адуней апсуа-абаза конгресс агIаджвыквцIара хIайгвыргъьатI йгьи зынла йацхIкIтI. Са сунашвачпагIвпI йгьи сактрисапIта – йсхIвара стахъыпI апроект шатахъдзу, магIын дугьи шаму, йауа ухIварыквын, ауи асабиква атеатр рымагIальаматта, аршIыйара рзаргванта йачпитI, ауат даргьи ршIыйаракI рызгIанарыцIситI. СгвыгъитI асабиква разхата», – йгIалылкIгIатI Мыквба.
Амдари аргылчIв апшри йырхъазымкIва апроект йгIалалкваз атеатр ачарта апны хъагIатагьи йдырчатI.
швталра йа тшаншвцIара атахъыпI.