Адуней апсуа-абаза конгресс Москва апны зныкI йапышвтыз абаза бызшвала арыпхьара атаджвыквнацIахтI.
АААК Москва апны зныкI йапышвтыз абаза бызшвала арыпхьара атаджвыквнацIахтI. Ауат апахьараква Россия Федерация а-Правительства апны йгIаныршу а-Финанс университет апны арыпхьагIвта йынхауа КIарма Марйана лгIаджвыквцIарала йадыргалтI. АААК ЙхIаракIу асовет аунашвачпагIв Эгьзакь Мусса абызшва арыпхьара джвыквцIахра йацикIтI, арыпхьагIв мзигIадза йыртуаш анхаша хIакъгьи йрыбагъьатI.
ЦIыпх араъа гIвгвыпкI апхьун – ахIбачви айцIбачви.
«АхIбачва ргвып 11-гIв йнадзун, айцIбачва – 14-гIв. Ахвыцква рарыпхьара хъвмаррата йадыргалуан, ауаъа рыцIа йызквсуаз ажва шIыцква шддырдыруаш акIвын, ахIбачва рпны рыцIа гватра ззырбуз айчважвараква ракIвын», – лхIватI акурсква радгалагIв.
СынчIва коронавирус тшъауацIнахуа йгIалцIла апхьарасахIатква хъарачIвыла йакIвшуштI. Абаза бызшвала йазрыпхьуш щардагIвы йырдыруа «Абаза бызшва» паблик зырцауа, Черкесск апны йгIандыршаз абаза сабигIзарта «Абанпара» аунашвачпагIв Йуан Фатима лакIвпI.
«Фатима Монтессори лыргIапсщала (ХХ асквшышв йапхъахуз аъарагIвшара агIан Италия йауаз айъазагIв йгьи арыпхьагIв Монтессори Мария йгIаджвыквылцIата ужвы асабиква рбжьара апны йауацIыхта йгIадрысабапуа арыпхьаща амаль – аредакция ррытаразга) анхарала швапха бзи лырхIахьатI. Ауи акIвымкIвагьи ауи китай апхьарта апны ангьльыз бызшва йалрыпхьун. Фатима лынхара ацIыхъвагIарбара айрышта дазцитI, лгвы цхIитI, абаза бызшвала арыпхьара лпсы алалцIитI. Саргьи ангьльыз бызшвала сарыпхьагIвпIта хIара арыпхьарала швапхата йхIырхIахьаз амыгIдитI», – лхIватI КIарма Марйана.
Ауи йгIацылцIахтI сынчIвагьи абызшва гIвгвыпкI – ахIбачви айцIбачви – шапхьуш. АйцIбачва ргвып надырхъахьатI, ахIбачва рпны ужвыгьи тшанцIа йауаштI. Ауи ахъазла КIарма Марйана +7(926)666-38-26 телефон номерла улабадырра атахъыпI.
Апсуа йгьи абаза бызшваква гIащаквыжьри тшауацIдрыхри Адуней апсуа-абаза конгресс амурад хъадаква йрыуазакIыпI. Ауи ахIатырла АААК ансисквша апсуа йгьи абаза бызшваква ртшауацIыхра йазынарху апроектква йрыцнакIитI, йапшым акъральква рпны абызшвала арыпхьараквагьи аднагалитI.
швталра йа тшаншвцIара атахъыпI.