Адуней апсуа-абаза конгресс ауысхагIвчва Сирия ГIарып Республика йту апсуа-абаза йгьи агвхъауа диаспораква йрыуу ауагIа йрынйатI.
Адуней апсуа-абаза конгресс архъйагIв секретарь Гицба Инари АААК ЙхIаракIу асовет йалу Алшундба Инвери агIваша, октябрь а 6 атшын Сирия ГIарып Республика (СГIР) йту апсуа-абаза йгьи агвхъауа диаспораква йрыуу ауагIа йрынйатI. Анйара Дамаск апны шIыцта йгIахъыртIыз Сирия апны Апсны Республика ащтийыгIвчва руысхарта ауацIа йакIвшатI.
Анйара джвыквырцIауата а-Конгресс ауысхагIвчва АААК ЙхIаракIу асовет аунашвачпагIв Эгьзакь Мусса зымгIва сальам шгIаритхыз рхIватI, йхIвахIвра йгIапхьатI, уацIыхъван а-Конгресс амурадкви ахачIвкви, ауи анхара, уыста йакIвнаршахьази йылнахуи йрыквчважватI.
Адиаспораква йрыуу ауагIа АААК анхара швабыж йрымагIальаматхатI, щарда йрызцIгIатI, даргьи ацынхара йазыхIазырта тшгIадырбатI.
Анйара даквчважвауата Гицба Инар Сирия ГIарып Республика апны АААК ашта хъвшара агIаныршара йшаквгIашIасыз гIаликIгIатI.
«ХIара хIангIалтI ауи ауыс бзи-бзи хIалачважвата йатахъу адгалра нхара акIвхIыршарныс. Адиаспораква йрыуу ауагIа уыжвласыла Сирия апны йгIаныршу, апсуа-абаза уагIахъа йрыуаквугьи злу ачеркес жвлара адкIылара «Адыгэ хасэ» апны рыцIа щардагIвыта йайззуштI», – йхIватI Гицба Инар.
АААК ЙхIаракIу асовет йалу Алшундба Инвер йгIацицIахтI анйара апны АААКи «Адыгэ хаси» шацынхушла швъа ацлырхныс йшангIалыз.
«Щарда йнагIымгуата ауи ашвъа ацхIрыхIазыруаштI. ХIкъаруква зымгIва хIуагIа руыс шагъьхуш, апсуа-абаза уагIахъа шадхIкIылуаш йазынахIырхитI», – йхIватI ауи.
Апхъахьыла ацынхара адызгалуаш гвып гIандыршатI, ауи Сирия йту адиаспора йауата цгIвы алалтI. Гицба Инар йшгIахIгвынйыргIвызла, акомитет апны йацдырхъйуш апроектква лырхлуштI.
«ХIабашталагIвчва «Адыгэ хасэ» жвлара адкIылара ауысхарта апны апсуа йгьи абаза бызшвала арыпхьараква адгал йшауаш йазцIгIун. Ауат йырхIватI ауаъа адыгьа, урышв, ангьльыз бызшваква йшырдрыпхьауа, апсуа йгьи абаза бызшваквагьи ауат йгIарылалырныс шыртахъу», – йгIацицIахтI АААК архъйагIв секретарь.
Анйара апны датшагьи гIвуыскI ахъвдаквыщт йшауаш йалапшырныс йангIалтI: Сирия йту апсуакви абазакви Апсны акъральыгIва университет апны йарыпхьара йгьи Сирия йауу апсуа-абаза йгьи агвхъауа сабиква рыхъаз Апсны апны пхын тшпсщарта адгалра.
Сирия йанаъаз Адуней апсуа-абаза конгресс ауысхагIвчва АААК ЙхIаракIу асовет аунашвачпагIв йсальамшвъи йсогIи Сирия ГIарып Республика рпрезидент Асад Башар йыртхтI.
АААК ауысхагIвчва Сирия ГIарып Республика ауаъа Апсны Республика ащтийыгIвчва руысхарта ъагIахъыртIуаз ахъаз йцатI. Ауысхарта йара ауи атшын, октябрь а 6, Дамаск апны йгIахъыртIытI. Ауи ангIахъыртIуаз йаъан СГIР аминистрква р-Совет аунашвачпагIв йтарагылыгIв, агIвымакъралькви аэкспатрианткви руысквала аминистр аль-Муаллем Валид, агIвымакъралькви акъраль аэкспатрианткви руысквала аминистр йцхърагIагIв Сусан Айман, Сирия апны йынхауа Россия Федерация, Венесуэла, Куба рдипломат уысхартаква рунашвачпагIвчва.
швталра йа тшаншвцIара атахъыпI.