Апсуа йгьи ароссия жвлара-политика уыснкъвгагIв, аюрист наукаква рдоктор, апрофессор Шамба Тарас дангIадрийызищтара сквш 85 ъацIуа йазынархаз «АуагIахъа хабза ргIапсри ауыжвгIанчIви дунейалащи» Дуней наука-практика конференция СогIвым апны октябрь а 2 атшын йгIахъыртIытI.
«АуагIахъа хабза ргIапсри ауыжвгIанчIви дунейалащи» конференция Апсны акъральыгIва университет апны Апсны Республика анаукаква р-Академия, Адуней апсуа-абаза конгресс, КIавкIаз ауагIахъаква р-Россия конгресс йгьи Москва Апсуа Диаспора йацыта йадыргалтI.
АААК аунашвачпагIв Эгьзакь Мусси а-Конгресс анхагIвчва гвыпи апсуа-абаза конгресс агIаныршара ахъа гIаджвыквызцIаз Тарас Мирон йпа йхъмаштылра пIатIу аквырцIауата йыхьыз зхъу апарк апны йгылу йчвахъабага син хIврапшдза азыщтIарцIатI.
Аконференция гIахъыртIытI акъральыгIва йгьи ажвлара уыснкъвгагIв, асоциология наукаква ркандидат Кобахиа Беслани РАНХИГС йаланакIуа АкъральыгIва къвырльыкъвхари аунашвахъцIари р-Институт (ИГСУ) къральыгIвадыррала акафедра апрофессор, аюрист наукаква рдоктор Мамитова Наталии.
ЙгIайззаз Шамба Тарас йбзазари йыжвлара нхари йрылаз агIаншара хъадаква йгIарыквчважвауа авидеосюжет ддырбатI.
РгIагвалашвахраква гIархIвахтI ауи йыцынхарныс, йайрыпхьарныс зынасып йгIанакIыз щардагIвы. АААК аунашвачпагIв Эгьзакь Мусса гIвзата, акъыльагIвта йымаз агIвычIвгIвыс дшйыцынхаз, хIальта йылибгIаз дрыквгIашIастI.
«Тарас Мирон йпа зъара йзыхIхIвалакIгьи йгIвычIвгIвысща ахъатаква зымгIва гьхIзыгIарбушым, йара йылата зымгIва йгIахIылайшуз, гIвына змамыз амч гьхIзыгIахътIуашым… Тарас Мирон йпа агIвычIвгIвыси апсадгьыли йырзынарху бзибара ду йылан, йкъару дгьалымгузтI. Сквшщарда руацIа ауи гIапсара йымдыруа магIын дудздза зму нхара ду акIвйыршун. Тарас Мирон йпа зхъвыцраква, згIаджвыквцIараква, зпышва апхъала адахIвра хIаззырцуш амгIва хIзырбауа швапхата йхIзалитI. ХIара ауи йуыс ду нахIырдзуштI», – йхIватI Эгьзакь Мусса.
АГУ аректор, академик Гварамиа Алеко Шамба а-Конституция апроект дшадынхалуаз гIайгвалашвахтI, Шамба дстудентыркIвата апсуа студентква адикIылырныс дшащтазгьи гIайхIвахтI.
«Тараси сари йарасквшыкI, 1963 агIан, Москва апны йхIаракIу апхьарта хIгIалгатI. Ауи агIан ауи Апсны йауата Москва апны йапхьуз ачкIвынчва адикIылуа далагахьан. Ауыла ауи уахьчIва йъагIадзаз апсуа диаспора йынкъвыргауаркIвауа ацIас ащата щтIайцIатI», – йхIватI ауи.
ЙгIайгвалашвахтI Гварамиа Шамба Тарас Апсны акъральыгIва университет чIахIра зму апрофессор хьзы шйыхьырцIазгьи.
«ЧIахIра зму апрофессор йшвъа анйыхIт ауи йгвы йадикIылын араса йхIватI: «Йапшым хьзыта йынкъвызгауа кIара йнадзитI, ауаса ари зымгIва рацкIыс йсызтлапIапI». Саргьи: «Анчва дузыразхатI, йачIвытагьи бзита йухIвайа» – хIва йасхIвтI», – йгIайгвалашвахтI Гварамиа.
Аконференция адгалагIвчва йшырхIвазла, «Шамба апхьараква» ансисквша йакIвдыршауата цIаста йщаквдыргылра ргвыгъапI. Россия йауу аполитика йгьи акъральыгIва уыснкъвгагIв Бабурин Сергей ари йапшу анйараква рпны ажвлари акъральыгIви злу апроблемаква йрыквчважваларныс шитахъу йхIватI.
«Сара кьангьаш гьазгIазгуам «Шамба апхьараква» агIвычIвгIвара адахIвраква йшрызцуш ауысла Дуней хачIвлыхырта квтата йшхIзычпуш», – йгIаликIгIатI ауи.
Аконференция апны датшагьи йгIачважватI Россия АкъральыгIва Дума адепутат Затулин Константин, Апсны Аправослав Кьльиса ахъада аба Виссарион (Аплиаа), Апсны ауацIауысквала а-Министерства Германия апны хъвдаквцIара зму ахIвачIвгIвы Амычба Хьыбла, Молдавия Аднестртшпы Республика Россия апны ауысхарта ахъада Монаков Леонид, агIвгIвы, аэкономика наукаква рдоктор Этлыхв Олег, ажурналист, афилология наукаква рдоктор Бебиа Екатерина. Ауи акIвымкIвагьи доклад гIарчпатI анхагIвчва унашва рхъцIарали акъральыгIва къвырльыкъвхарали ИГСУ афакультет адекан, аюрист наукаква рдоктор, апрофессор Киреева Елена, РАНХИГС а-ИГСУ апны йгIаныршу рхъвыхрата йгIаларгауа арыпхьарала апрограммаква р-Квта аэксперт Ворожейкина Людмила.
ЙгIачважваз зымгIвагьи йацшIакIта Апсни анауки ауыси рызцIабыргра Тарас Мирон йпа йыхъаз йшымгIвагIарбага хъадаз йацIачIвагъватI.
швталра йа тшаншвцIара атахъыпI.