АААК ахабарргарта портал апсуа-абаза уагIахъа йрыуата агIвыма къральква рпны йбзазауа ауагIа рхабарква гIаквнацIауаркIвитI. Ари агIвыра Иордания йауу Абаза (Мхцы) ГIазиз йгIайыквчважвитI.
Хагба Изольда
СынчIва август агIан Иордан Хашимит ПаштахIыгIва йцаз АААК ауысхагIвчва ргвып йрылаз дзачIвызлакIгьи щардала йгIайгвалашвахлуштI ауаъа дзабадырыз ауагIа, йбаз ашIыпIаква, анйара пхаква, ауат анйараква рпны айшва йгIаквдыргылуаз арызкъ алыхква. Йауа ухIварыквын, датша къралькI йбзазауа уабашталагIвчва убарныс, ауат рбзазаща тшахауыргIвазарныс, ртгIачваква рхабарква урыздзыргIвырныс – уызгIвымсхыз согIапI.
Зтшын ауаъа хIнадзаз апсуа-абаза уагIахъа йрыуата Иордания йту зымгIва адызкIылуа «Диуан Абаза» адкIылара ауысхарта апны хIара Абаза (Мхцы) ГIазиз хIйабадыртI (Египет адиаспора йрапшта, Иордания апынгьи ауи йаланакIуа зымгIва Абаза ткъвым йрыланакIитI, тдзахьызтагьи Абаза нкъвыргитI, ауаса зныкI йрымаз атдзахьызквагьи рдырыркIвитI – аредакция ррытазага).
ЙгIвбахуз атшын, зымгIвагьи псадгьылта йхIыму Апсны апны йшцIасу апшта, хIара хIшгвыпыз ауи йтдзы апны хIдрайгван арызкъы йцIахънатшуаз айшва хIадзхъадырчIватI. Ауаъа тгIачвакI рапш хIалата ГIазиз йтгIачвагьи «Диуан Абаза» апны йыцынхаквауагьи хIрачважвун. Айчважвараква зымгIва – мшыркъваразтынгьи хъвыцра цIолазтынгьи – йа анаса, йа араса Апсны йазынархан. Датшатагьи йшпаурыз апсуа-абаза уагIахъа дрыуата тшызпхьадзауа дзачIвызлакIгьи йылаква йпсадгьыл – ауи зынгьи йымбасызтынгьи – йгвы шазшIыгъьыз гIауархIвуазтын?
АбазаргIа рпачвакви рыпхIчви
Пхата хIызрайгваз апшвыма йапхъанчIвиква рхабар гIахIайхIвтI. Ауи йабаду КIавкIаз дтыцIын Сирия дцатI, ауаъа пхIвыс дгIайгтI, па дйаутI – ГIазиз йаба йащахIба. УацIыхъван атгIачва Иордания, Амман йцатI. ГIвысквша анцIы ауат ужвыгьи гIвпачва раутI – ГIазиз йаби йгIвыджьхауа йащи.
Ауат ахыгIвпачва анхъацIаха пхIамкIва заджвгьи дгьгIадымриуазтI.
«Саба йащахIба пхIа дйаутI. АйцIба хвгIвыпхIчва йыман. Саба – пакIи хвгIвыпхIчви. СаразаджвыкI сакIвпI МхцыргIа ртгIачва пата йгIарыцIагылыз. Йаргьи йсылшуз счпатI Иордания апны хIыжвла шымдзуашыз апш: сара пхIакIи пщыгIвпачви сымапI», – дымшыркъвитI Абаза ГIазиз.
УахьчIвала ауи дабазларныс йахъазымкIва дабадухарнысгьи йынасып йгIанакIытI, ауи йгIариква гIвычкIвынчви пхIвыспакIи гIарыцIагылхьатI.
ГIазиз йаба Абаза (Мхцы) Хейрилдин апхьарта амщтахь Британия ар апны акъральгIвынаква зхчуз архъвква дрылата къвырльыкъв йхатI, уацIыхъван Иордания рыр дрылалхтI, тшпсщара дчIвахындзкIьара апаштахI йгвардия дрылан, ауаъа ауи атехника – апаштахI Хусейн ймашинаквагьи ймотоциклквагьи рылата – аъаща дахъпшылуан.
Ауи амщтахь Абаза (Мхцы) Хейрилдин Иордания акъала Акаба дцахын ауаъагьи апаштахI йхъвыхIква дырхъпшылуан.
«Сара ауи агIан пщысквша сыртан, – йгIайгвалашвахитI ГIазиз. – ХIара хIштгIачваз хIаба дъацуз хIйыццатI. Ауаъа сара апхьарта сцатI, апхьара амщтахь ангьльыз бызшва ссырдырныс ахъазла сквшыкIла Лондон сырщтитI».
АпаштахI йазхъацIара
Жвежвскввша дыртата ачкIвын Амман дгIайхын акомпьютерква тшырзибжьауа далагатI, дпрограммистхатI. ЙхIаракIу апхьарта дангIалга амщтахь Иордания пшыхврала АунашвахъцIарта хъада апны йкъвырльыкъвхара джвыквицIатI.
«АпаштахI йпшыхвыгIвчва срылата къвырльыкъв ъадзасхуз ъачIвагIа щарда спсахра атахъхатI: акомпьютерквала шварагIвара шаъамызлушыз сахъпшылуан. уцIыхъван сэлектромеханикхатI, йымхысуа абджьарквали агIвжвараквали сэкспертхатI», – йхIвитI Абаза (Мхцы) ГIазиз.
Йшалу йгIауахвырквын ауи сквш 34 къвырльыкъв йхатI, йуыс йнардзата йъайырхъйуз ахъазла йызнымкIвагьи артшхъвагаквала йыхьыз рхIватI. Йыртшхъвагаква йрыуата рахIа йызтлапIадзу йрылапхьадзапI асквш 1990-ква рагIан апаштахIра зквшвауа апаштахIпа Хасан ибн Талал йхъатала йгIайылайцIаз Иордания ахъахвитра апаштахI медаль.
Зхъа йакIвым аквзымцIауа, ачважварагьи дукI йачIвым ГIазиз апшыхвра йапщылаз йынхара ауатыкв йангIаталра дашIаситIта дпшвырхъыччагIвацитI. Дзайчважваквауагьи йрымаджьащахъвахитI: йумагIнызара атахъыйа уыжвлала уиорданымкIва апаштахI пшыхврала йкъвырльыкъвхарта апны ауи апш азхъацIара уымазлара ахъазла.
«Иордания апны сара зымгIва йрапхъата счеркеспI (КIавкIаз йгIатыцIыз зымгIва – апсуа-абаза диаспорагьи рылата – Иордания апны ачеркес жвлара йрыланакIитI – аредакция ррытаразга). Ачеркесква апаштахI швабыжта йаргванпI. Иордания йту ачеркесква рща йалапI апаштахI йтгIачва рызцIабыргра, ауат хъацIара ъарылу, урыквгвыгъушта йъану ахъазла хвду рзырбитI», – йгIахIгвынйыргIвитI ГIазиз.
Ачеркесква ауи аъарала йрызхъарцIитIта, йгIацицIахитI ауи, «апаштахI Абдалла II ибн Хусейн ачеркесква ргвчIагIвчпара жвлара данцауа йхъахчачва атдзы ауацIа йгьйыцнайдылуам», ауат агваны йгIанхитI. Ауыла апаштахI ачеркесква йшрызхъайцIауа, апаштахI йтгIачва йъарызбзийугьи хвы шаквицIауа гIайырбитI, йхъа аладухауата йхIвитI Абаза ГIазиз.
«Диуан Абаза» злу ауысква
УахьчIвала Абаза (Мхцы) ГIазиз тшпсщара дчIвапI, акъвырльыкъвхара йайтыз асквшквала йгIайынхаз апенсия гIайгитI. Ауи акIвымкIвагьи ауи «Диуан Абаза» апны ахча уысква дырхъпшылитI, Иордании апсуа-абаза жвлара рбзазара джьгарта далапI. «Диуан Абаза» анхара анджвыквнацIагIвацуз ауи адкIылара дагенеральна секретарын. ГIазиз уахьчIвала анхара ахъазла йатахъу апрограммаквагьи йгIвитI, Иордания йту йабашталагIвчва Апсны апаспортква шгIапшцIыргуш йазынарху анхарагьи ауи йхьырпшырапI.
«АуагIа адкIылара йгIалалырныс Апсны апаспортгьи гIапшцIыргарныс йанхIызгIайуа сара ауат рыжвла ъагIаджвыквылуа ссырдыруата рхъвыхра мачIкIгьи акIвсыршитI. Пшыхврала акъвырльыкъвхарта апны съанхаз гIасыхъвахуата гIацIцIуаштI (дхъыччитI). ХIара аткъвым тдзахьызта йынкъвыргуз гIащаквхIыргылхитI, апсуа йгьи абаза тдзахьызква зныта йхIыму ашвъала ауат хIырхъвыхитI. Ауи ашвъа хIара Апсны йгIагIгтI, урышвлагьи гIарыплагьи йатахIкIтI. Йара ауи апшта атгIачва ртурых хIхIырдыритI – йгIазлыцIыз йырмагIныз, йъагIатыцIыз, йырзаъачвата йыгIдырквауа йрабахIырдыритI», – адкIылара злу ауысква хIрыхайыргIвазитI Абаза ГIазиз.
Ауи йшихIвауала, КIавкIаз ауагIахъаква ртдзахьызквакI ъацапшу йгIалцIла абаргвыраквагьи йыршIашвитI. Йаргьи гIарып бызшвала йанатаркIуа ауат ргIвыща тшапсахырнысгьи закIы гьазхIвам.
«ЙыншалитI тшгIахIзыназырхауа азджьакI рыщайдзаквала йщапсыгъвта, йа убыхта, йа къабардыйата. ХIара ауи ауыс гватшныта хIадгылитI, заман щардагьи хIыквнахитI», – йхIвитI Абаза ГIазиз.
Ащайдзаква
Йара ГIазиз сквшы 20 дыртан йшабазу йапхъахауата йаба йангIайайхIв, ауаса йанаъазара ауат черкеспI (КIавкIаз йауапI – аредакция ррытаразга) акIвымкIва дара рыщайдзаквагьи рыбызшвагьи рымапI.
ГIазиз йсабихъа Акаба апны йгатI, ауаъа апсуа-абаза уагIахъа йрыуата датша заджвгьи гьаъамызтI, йаргьи зджьакIы драчважварныс, абызшва йгIарныс лшара гьйымамызтI. Ауи йшихIвауала, апсуакви абазакви рыцIа йъабзазауа Зарки Аммани рпны акIвпI. Амман апны заманкI данбзаза ауи Абаза ткъвым йрыуу, йабагьи данчкIвыныз дыздыруаз уагIаквакI дрынйауа далагатI.
«Диуан Абаза» апны сынхауа саналага сара сыщайдзаква рыцIа йалыргата йгIащаквсыргылхырныс ащта стагылтI. ХIыжвла ъану хIпсадгьыл ахабар здыртI, Иордания апны хIара хIшщардагIву сыласхIватI («Диуан Абаза» йшщаквнаргылызла Амман апны апсуа-абаза уагIахъа йрыуата 4000-гIв райхIа бзазитI. Ауат йрыуата 750-гIвы Апсны апаспортква рымахьапI – аредакция ррытаразга). Асквш 1990-ква рагIан сара Апсны адуней йыквтагьи, ауаъа айсра акIвшатагьи йгьсымдыруазтI. Йапхъахауата Апсны ахъахвитра ахъазла йайсыз ачкIвынчва санрынйа йсхIварагьи йсчпарагьи сымдырхуа сгIанхатI. Сара йгIасгвынгIвытI хIара псадгьыл шхIыму, хIкъраль атурых здыртI», – йгвы цIикIгIауа йгIайгвалашвахитI Абаза ГIазиз.
Апсны апны гIашIыхара
Йапхъахауата Апсны дшцаз ангIайгвалашвахуа Абаза ГIазиз йхIвахитI йапхъахауата адзатшпурам даныквыл йгвы апны «йычвуаз гIагвалашвахра» щарда шгIашIыхаз.
«ХIпсадгьыл шпшдзу йапхъахауата йанызба сара ари йджьанату адгьыл нызыжьта къраль гIвыма апны шIыц-шIыц бзазара джвыквызцIахра йазадцалхаз сапхъанчIвиква гIасгвалашвахуа салагатI. Ауат джьабагIа щарда рбатI, йабакIра, закIгьи – дара йырчIву адгьылтшытнадзара – рымамкIва бзазара шIыц щаквдыргылхра атахъхатI. Иордания апны аклимат ауат Апсны апны йызщцаз йгьапшым. Араъа къвымпI, ква ангIаквауа зынзамызапI, йара акIвпIта квадъа хIврагьи Апсны апны йщарду датша гIайырагьи гьаъазлум. ХIара хIпсадгьыл закIы йузашIмырпшуашта йпшдзадзапI», – йхIвауа даргвыргъьахитI ГIазиз, йаргьи Апсны бзазара дгIайхырныс шигвалу тшгIацIиххитI. Ауаса, йара йшихIвауала, ауи ауырата тшазадгалра атахъыпI.
«ЗымгIва кIаупсата» утгIачвагьи уыцта зджьара уайтыпахныс гьмайрам.
«Сара пенсия счIвапI, сызкIуа стгIачвазаджвыкI ракIвпI. СгIарикви ауат ргIарикви йапхьитI, йынхитI. Апсны апны ауат абызшва рымдыруата нхарта гIарауырныс баргвхуштI. Нхарта уымамкIва усабиква рщапIы йгьузыквыргылуашым. Схъапщыли сари хымчыбжьа Согъвым хIаъан, ауаъа хIтыцIын Швача хIцатI – урышв бызшва хIымдыруата, зджьакIквата тшагвынхIыргIвытI. Тшанпсущауа – ауи закIыпI, ауаса уынхара йа уапхьара ахъазла абызшва удырра атахъыпI. Ауи акIвпIта, стгIачва йшалакIу йайтыпарныс ужвыгьи йгьазыхIазырым», – йхIвитI Абаза (Мхцы) ГIазиз.
Йара йгвалапI апсуа кыткI апны дбзазарныс, тдзыкI ашвырква гIазшIалуа цIлауатрачкIвынкIгьи ацта йымазларныс.
«Апсны апны апсабара бзидздзапI, адуней шабгу йырзымхъауа дзыцкьа ауаъа йаъапI. Азаводква, ачIвылашша гIацIхыртаква ауи апшдзара дрыдзитI. Йъаду – апсабара
уаламхъвмаруата йшаъу апш йгIанужьырныс акIвпI», – йпсадгьыл ауачIвымш дахъгвыргIвитI ГIазиз.
Абарауаса – йпсадгьыл йгвалата, йтгIачви йабашталагIвчви дрызхъвыцуа – дбзазитI уахьчIва Иордания йту хIайщчва йрыуазаджву Абаза (Мхцы) ГIазиз. Ауыгьи апсуа-абаза уагIахъа йрыуата Иордания йбзазауа антахьгьытгьи уанрачважвауа багъьата йхъауцIитI аща гIамтагьи хъарарагьи шамдыруа – ауи йанакIвызлакIгьи упсадгьылла йшуыхъуа.
швталра йа тшаншвцIара атахъыпI.