Россия йауу «Зенит» футбол клуб асабикви чкIвыныргIи ъарбжьауа ракадемия афутболасчва гIвымчыбжьа йнайгвгъауата Апсны апны тшдрыхIазыруан. Ауат араъа йшынхаз АААК ахабарргарта портал ахъазла йырхIватI «Зенит» абжьагIвчви афутболасчви.
Барганджиа Саид
Апсны апны атшыбжьараква рыхъаз йатахъу зымгIва аъапI, амшквагьи бзипI, йгIаликIгIатI Санкт-Петербург йауу «Зенит» футбол клуб асабикви чкIвыныргIи ъарбжьауа ракадемия абжьагIв ахIба Тихомиров Алексей мартI а 19 йгIашIарышвта а 31-дза «Зенит» Апсны йаъата штшдрыхIазырыз даквчважвауата.
ЗымгIва шалу Апсны асквшква 2005-2011 рагIан йгIадрийыз аспортсменквала йалу быжькомандакI йрылу уагIата 200-гIв раъара гIайтI.
Тихомиров «Зенит» аунашвачпагIвчва атшыбжьараква Апсны апны йакIвдыршарныс шгIалырхызгьи йхIватI. ЦIыпх ноябрь агIан «Зенит» ФК академия абжьагIвчва ръачIвагIара йъаладырхIауа аквта адиректор, Россия афутбол адкIылара атехника комитет йалу Морозов Сергейгьи дрылата «Зенит» ауысхагIвчва ргвыпкI Апсны футболла афедерация ахIварала араъа йауу абжьагIвчва адрыпхьарныс йгIайтI.
«Араъа хIанаъаз Апсны йауу хIъачIвагIалагIвчва ахъвмарраква тшрызрыхIазыр йъауаш атшыбжьартаква хIдырбатI, «Зенит» аунашвачпагIвчвагьи агIапын Апсны хIгIайырныс щаквдыргылтI», – йхIватI абжьагIвы.
Ауи йрытамамхтI Апсны рахIагьи йызгIалырхыз араъа аклимат ъабзийу шакIву.
«ХIпны (Санкт-Петербург – аредацкия ррытаразга) ачкIвынчва агъны амщтахь раъащаква гьчIвагIвам: агъны ауырапI йгьи йхьшвашвапI, мара мачIпI. Араъа (Апсны апны) хIара ауи хIаутI. Йара ауи апшта хIара араъа анхара ахъазла йхIтахъыз зымгIва хIыман, ауи йацхта апсуаква швабыж йхIызбзийын. Апсны йауу хIъачIвагIалагIвчва йхIтахъу тамамта йгIаргвынгIвытI. Бзидздзата хIдырчун, гIальаматта хIандыргIалтI, атшыбжьараква рыхъаз йатахъызла хIадыргалтI», – йхIватI Тихомиров Алексей.
Ауи йгIацицIахтI «Зенит» аунашвачпагIвчва апхъахьылагьи атшрыхIазырраква Апсны апны йадыргалларныс шыргвыгъу. Ауи йшихIвазла, йгIванхауата сынчIва октябрь ацIыхъваква – ноябрь ахъаква рагIан йгIайырныс йаквдырпшхьатI.
«Зенит» рбжьагIв ахIба йшипхьадзауала, Апсны апны ауагIа футбол тшауацIнадрыхырныс ртахъыта йаъапI. Йара йшихIвауала, «ауи зынла гвы аутитI». Датшагьи ауи йгIацицIахтI Апсны апны йанакIвызлакIгьи афутболасчва бзиква шаъаз, щардагIвы ргIатгараква шхIаракIыз, рыхьызквагьи ауагIа бзита йшырдыруа.
«ХIара йхIтахъыпI йшхIылшауа апшта Апсны йауу хIъачIвагIалагIвчва методикала хIырцхърагIарныс, футбол атшауацIыхра нархарата йамазлуш ауыслагьи хIайкьангьашырныс. Асабиква хIырцхърагIата «Зенит» ракадемия йнарахвырныс лшара рзыгIанхIыршарагьи хIтахъыпI – уацIыхъван нхарала ангIалра рыдырчпалхуата. Ауи ахIатырла араъа хIфилиал гIахъхIтIытI, апсуа бжьагIвчва ауаъа хIара хIметодика, хIадгылща гIадрысабапуата йынхитI. Швабыж хIгвыгъитI топасра зща йалу ачкIвынчва хвыцква рылшара рызгIарысабапуашта», – йажва найырдзахтI ауи.
«Зенит» ракадемия йалу Лобов Никита аспортсменква рымшква шырчвыз йхIватI: мшкIы ауацIа гIван тшыбжьара йцалун. Апсны гIамырдарныс дукI йгьахамдзатI, ауаса мшкIы азалырхын акъраль рыцIа йджьащахъву ашIыпIаква ддырбатI.
«Апсны апны зымгIва пшдзапI. Са араъа йапхъахауата сгIайын йсгвапхадзатI», – йхIватI ауи.
Аспортсмен йгIаликIгIатI тшурыхIазырныс ахъаз Апсны апны аъащаква шбзийу.
«Араъа тшъахIрыхIазыруаз швабыж йсгвапхатI. Амара гIапхун, тшубжьарныс ахъаз амшква бзидздзан. Ужвыгьи зны сгIайра стахъыпI», – йхIватI Лобов Никита.
Ауи йажваква йрыцикIтI «Зенит» йрылу датшагьи афутболасыгIвкI Шленок Иван. Ауыгьи Апсны йапхъахауата даъан, апшдзарагьи джьайщатI. МшкIы ауацIа йддырбарныс йызхадзаз йрыуата Афон ШIыц ахIатшпы рыцIа йымаджьащахъвахатI.
Шленок «атшыбжьараква рыхъаз аъащаква шбзийыз» йахъазымкIва апсуаква «Зенит» афутболасчва шдрысасызгьи гватрадъа йгьгIаныймыжьтI.
«ХъагIата, хIпны хIаъазшва хIдырчун. Ахъвмарыртагьи швабыж йбзийын. ЗакIылагьи хIгьбжамызтI», – йхIватI афутболасыгIв.
ЙгIашвгвалахIыршвахпI «Зенит» асабикви чкIвыныргIи ъарбжьауа рапхьарта ахъвшара Апсны апны агIахътIра йазынархата мартI а 27 гвыргъьахъв айззара шакIвшаз, ауаса ауи асквш 2020 декабрь йгIашIарышвта йшынхауа. Апсны йауу афутболасчва шIаква Санкт-Петербург, «Зенит» ракадемия апны, йапхъахауата асквш 2020 ноябрь агIан йырпшытI. Ауи агIан ауаъа йцаз апщыгIвспортсменчва дрыцын «Зенит» ФК а-Генеральна директор йунашвала Апсны апны йгIаныршу ахъвшара даунашвачпагIвта йдыргылыз Афон ШIыц йауу футболла асаби команда рбжьагIвы Капикян Армен.
РыцIа пасата, асквш 2020 сентябрь агIан, Апсны йауу бжьагIвчва 27-гIв «Зенит» футбол клуб ракадемия йаднагалыз апхьараква йгIаркIылстI, ужвы ауат рыуа рыцIа йагъькву Апсны апны йгIаныршу «Зенит» ахъвшара апны йынхуштI. Агвыпква цысквша йгIашIарышвта 13 сквшадза йырту ачкIвынчва нарахвуаштI.
«Зенит» ФК академия – Россия «алагъь къалахъада» Санкт-Петербург йауу йбергьльу афутбол клуб «Зенит» апны йгIаныршу асабикви чкIвыныргIи ъарбжьауа футбол апхьартапI. Академия мурадта йамапI аклуб акоманда хъада йрылата йзыхъвмаруаш афутболасчва гIадзыннаргылырныс. Апхьарта йара афилософиягьи амапI: ауаъа йгIацIцIквауа футболасчва бзихара йахъазымкIва здырраква цIолу гIвычIвгIвыс бзихарныс. Академия акомандаква «афутболасра йазгIашыкъта, уыла хънахуата йшхъвмаруаш» йащтапI. Ауаса йанаъугьи араъа «агвып арыхIазырра ацкIыс афутболасыгIв дрыхIазырра» апхъа йаргылитI. Апхьарта апны атшыбжьараква хпата йшапI: техники тактики, теории психологии тшырзыбжьара, амахъащахъаква рыбагъьара.
швталра йа тшаншвцIара атахъыпI.