Трыквшта апсуа культура квтаква рфедерация йгьи Къабард-Балкъар Республики Къарча-Черкес Республики рпны йаныргIалу абаза, апсыуа жвлара адкIылараква ацынхара знархару ангIалраква мачвы рыцIарцIатI арат ареспубликаква рпны нхара уыс дырхъйауата йанаъаз асхъан.
Барганджиа Саид
Трыквшта йауу апсуа-абаза диаспора руысхагIвчва гвып Къабард-Балкъари Къарча-Черкеси йаъан. Агвып йрылан Апсыуа культура квтаква рфедерация (Апсуафед) аунашвачпагIв Аквсба Атанур, Астомбыль апсуа квта аунашвачпагIв Иашба Шамиль, Адуней апсуа-абаза конгресс ЙхIаракIу асовет йалу Макьар Ведат, Трыквшта апны йазалху хъвдаквцIара нкъвызгауа Апсны ащтийыгIв Харазиа Вадим йгьи ауи йцхърагIагIв Багателиа Астамур. Анйараква анакIвшуз ацынхара знархару ангIалраква мачвы рыцIарцIатI Апсуафеди агIвреспубликакI рпны йаныргIалу арат ажвлара адкIыларакви: КIавкIаз ауагIахъаква ртурыхи ркультури рырхъвыхра аквта «Абаза», Адуней адкIылара «Алашара» йгьи Къабард-Балкъар апны йаныргIалу Апсуа культура квта.
Апсуафед аунашвачпагIв Аквсба Атанур йшгIаликIгIазла, а-Федерации арат ажвлара адкIыларакви «щарда цIуата айщчвара азазаъаща рызбжьата» йабадыритI.
«ХIпахь уыс хъадата йгылапI ацынхара, ащтаныкъвара, акультура уысква радгалрала, цри бызшва арыпхьарала, талант зму ашIаква йрыцкIрала ацацхърагIара. Арат амурадква хIымата акIвпI ангIалраква мачвы шрыцIахIцIаз», – йхIватI Аквсба.
Анйараква злалгаз даквгIашIасуата Аквсба Атанур йшихIвазла, атрыкв уысхагIвчва йрылшатI «Алашара» адкIылара ауысхарта апны ауи анхара шадгалу йапшырныс йгьи цысквша руацIа ауи анхагIвчва йадыркIылыз «аъазара ду» тшахадыргIвазарныс.
Апсуафед КIавкIаз ауагIахъаква ртурыхи ркультури рырхъвыхра аквта «Абаза» ангIалра рыдырчпалра апхъала ауат ари а-Квта аунашвачпагIв Пшенокъва Владимир Апсны апны йынйатI. «ХIара рыцIа паса йапшым анархараквала хIагвынгIвытI ангIалра мачвы анацIахIцIара амщтахь хIащтаныкъвари хIацынхари рыцIагьи штшауацIнахуаш, йшбагъьахуш апшта», – йгIацицIахтI Аквсба Атанур.
А-Квта «Абаза» ахъада Пшенокъва Владимир йшгIаликIгIазла, апсуа-абаза диаспора йъабзазауа йзапш къральызлакIгьи йырбжьу ащтаныкъвара тшауацIнарыхра, йрыбагъьара атахъыпI.
«АнгIалра ауи амурад архъйара акIвпI нархара хъадата йаму. ХIара хIыхъазла рмагIны швабыж йдупI акультура анархари абызшва арыпхьари», – йхIватI Пшенокъва Владимир.
Ауи йшгIацицIахызла, мачвы зцIарцIаз ангIалраква рпны йгIарбапI ахабаррдырраква рамдарала, аршIыйагIвчва ргIаджвыквцIараква йрыцкIрала, анаука-практика конференцияква радгалрала, датшагьи уыс щарда рырхъйарала йацынхарныс.
Атрыкв гIащтийыгIвчва гвып Къарча-Черкеси Къабард-Балкъари гIвымшкI йаъан – май а 7 йгIашIарышвта а 9 атшындза.
швталра йа тшаншвцIара атахъыпI.