Апсуа журналист Жьиба Саида лкнига апны йадылкIылтI Трыкв Республика йтабзазауа апсуа-абаза уагIа йрыуата здахIвраквала йбергьльу ауысхагIвчва рхабарква.
Барганджиа Саид
Апсуа журналист Жьиба Саида йгIацIылщтыз акнига-альбом «Амара анурква» апны йазкIкIыпI Трыквшта йтабзазауа апсуа-абаза уагIа йрыуата 67 йнадзауа здахIвраквала йбергьльу ауысхагIвчва рхабарква. Акнига апсуакви абазакви рпсадгьыл мчыла йтыргищтара йцIуа асквш 155 йадахIвуата йгIацIцIтI (КIавкIаз айсра, ауи амщтахь йгIаншаз амхIаджьырра йаладзыз ауагIа рхъмаштылра амш ансисквша май а 21 атшын йдыртлапIитI – аредакция ррытаразга).
Автор АААК ахабарргарта портал йшгIаралхIвызла, йбергьльу абашталагIвчва йгIарыквчважвауа акнига дадынхалырныс лгвы йангIаташва Трыквшта данаъаз асквш 2018 май мыз агIан акIвпI. Ауи асхъан йлыцынхауа Когониа Зарини лари ацыта Адапазары къала йбзазауа рыгIвза Сергегиа Йуджаль лпны хымчбжьа раъара йсасытI. Ажурналист йшылхIвауала, ауи азаман ауацIа Трыкв йапшым аштаква рпны йбзазауа апсуа-абаза диаспора йрыуу щардагIвы йрабадырныс рылшатI. Рыуа щардагIвы йыздынхалуа ауыс апны агIатгара дуква йырзынадзатI йгьи Трыквшта апны пIатIу ду рыквырцIауа йбзазитI.
«Швабыж йсгвапахатI ауат Трыквшта апны йъардыруа, хвы ъарыквырцIауа, йъарыладухауа ахIатырла. Саргьи йгIастахъхатI ауат рунашва рапхъанчIви Псадгьыл абзазагIвчвагьи йрасхIвырныс – Апсны апынгьи йырдырныс, йрыладухарныс ахъазла. Абараса сгвы йгIаташватI ауат ртурыхква азскIкIырныс. Ауи асахIат йгIашIарышвта «Амара анурква» садынхалуа салагатI», - лхIватI Жьиба Саида лгвгIанаграква хIыцагIвылшауата.
Автор йшгIалгвалашвахуала, Трыквшта дцата дангIайх амщтахь лгвтара шлырхъйуш амальква дырзыпшгIауа далагатI: лыгIвзачва, лдырква гIалыцIагылырныс дрыхIвауата тшырзыналырхатI.
«ЙгIасцхърагIаз уагIа щардагIв йырбзирата акIвпI акнига шгIацIцIыз», - лхIвитI Жьиба ауыс шцаз гIахIгвынлыргIвуата.
ЦIагыл анлау асквш 2019 январь мыз агIан автор мызкIи бжакIила Трыквшта дцатI. Ауи агIамта ауацIа ауи напа жвабапхьадзара гIацIанакIуата шIырпIыра змам ахабарква гIазылкIкIытI.
«Арат ахабарква йбергьльу аполитикква, арежиссёрква, ахIаракьатчпагIвчва, абанкирква, адизайнерква, арра къвырльыкъвхагIвчва, апхьахьаква йгIарыквчважвитI. Ауат ртурасквала йгьапшым, ауаса йадызкIылуа закIыпI: зымгIвагьи апсуа-абаза уагIа йгIарылцIтI», - лхIватI ажурналист.
АбзагIвраква ркнига йалашваз ашвапхаква йрыуапI, ажва ахъазла, йбергьльу атрыкв режиссёр Эзель Кове йгьи Трыкв апны апшыгIвчва бзи йырбауа атеатр, акино рактёр Айквысба Серкан; дуней категория нкъвызгауа аспорт судья Бганба Уура йгьи Астомбыль апны апсуа ресторан йапшвыму Садзба Халюк.
Акнига йалапI Апсны ауагIа р-Абашта айсра аветеранква йгIарыквчважвауа абзагIвраквагьи: Леон йорден анкъвгагIвы Бганба Альпер йгьи археолог Ажьиба Зелиха (ауи айсра ангIаджвыквыл 19 сквша ракIвын дызтаз). Апхьахьакви айъазагIвчви йрыуата акнига йалашватI апрофессорква Агрба Сима йгьи АгIвдза Оздан, Анкара йтагылу КIавкIаз анаука-рхъвыхра фонд аунашвачпагIв Гьечба Мухеттин, Астомбыль апны агIвырагIацIщтырта аунашвачпагIв Квышба Эрол, Осман паштахIыгIва архив аъачIвагIагIв ХIапIатI Бекьир йгьи адунейла йбзидздзу окулистква йапхъахауа ахвыгIв йрыланакIуа айъазагIв ду Лачвышба Зекьи йгIарыквчважвауа агIвыраква.
Аполитикква дрыуата акнига ахъазла интервью айттI Трыквшта азгIвадарахчара аминистр йкьангьашагIв, Трыквшта апрезидент йуысхарта аэксперт Абагба Кадыр. Датшагьи акнига рхабарква аныпI апхъала арра апны йъанатIанкъвгагIвыз, ужвы йпенсионеру Лачвышба Осман йгьи апрофессионал боксёр Бзагва Энвер.
АбзагIвраква рфырква цIабыргыта йызлапшым щардапI, рныбыжьла йгIауахвдзарыгьи. Швабыж йджьащахъвапI рахIа йахIбадзу акнига афыр сквшы 106 дъарту, ауи йыхьызпI Ажьиба Льутфий. Ажьиба Саида йшылхIвазла, йалкIгIата магIны азылбитI ауии лари райчважвара, йшпакIву ухIварыквын Льутфий «хабар джьащахъва щарда йдырхитI». Ужвы Ажьиба Льутфий йъахIыльчвагьи йаргьи Адапазары къала йачвыхъарамкIва йчIву Кайалар кыт йтабзазитI. «Амара анурква» книга афырква зымгIва драйцIбапI Алкин Назре – ауи сквшы 25 дыртапI, йбергьльу футбол клуб «Фенербахче» апрезидент дисекретарпI.
Ажурналист акнига сквшыкI аъара дадынхалтI. Акнига-альбом йаншвалтI афырква зымгIвагьи йырчIвыта уыжвгIанчIви йгьи архив сурат 200 раъара. АгIацIщтра хбызшвакIла йадгалапI: апсуа, трыкв, урышв. Автор йшылхIвахуала, лынхара апны рыцIа дызрыгIапсуз абызшва амдырра акIвын.
«Афырква рызбжагIв апсуа бызшва рдыритI, ауаса ащардагIв апсышва гьрымдыруазтI. Саргьи трыкв бызшва бзита сгьзалачважвум. Ауи ашвхIаусыгIвала анхара тащахIахун, йгIаншун айчважваракI хпа-пщба сахIат йанакIвшуз, ауаса сыгIвзачва швабыж йгIасцхърагIатI», - йылрытаразитI Жьиба Саида.
Акнига йахъадзгылу ахьызгьи хIадагIвачата йгьгIанымшатI.
«Акнига афырква, Апсны апачви апхIчви, амара анурква рапш адуней тшахъаршан р-Псадгьыл апхари алашари гIархъыцIуа йбзазитI», - лхIватI автор.
Апсуа журналист Жьиба Саида лкнига «Амара анурква» атираж экземпляр 300 йнадзитI. Экземпляр 200 автор акнига афырква, ауат раргванква йгьи Трыквшта апны апсуа культура квтаква рфедерация йырзгIанылжьырныс лмурадпI. Экземпляр 100 Апсны абиблиотекаква, амузейква йгьи акнига-альбом адгалра йацхърагIаз ауагIа йырзалхпI.
Ellerinize emeklerinize sağlık. 👍👏👏👏👏👏🙏🙏🙏🙏😊
швталра йа тшаншвцIара атахъыпI.