Санкт-Петербург 19.05.2022 23:05 9271

АкIавкIаздырыгIв бергьльы Генко Анатолий йзынархаз хъмаштылра айззара акIвшатI Санкт-Петербург йтагылу Кунсткамера музей апны.

АкIавкIаздырыгIв бергьльы Генко Анатолий дгIадрийищтара сквш 125 ъацIыз йазынархата хъмаштылра айззара акIвшатI Санкт-Петербург йтагылу Петр Ду йыхьыз зхъу антропологии этнографии рмузей (Кунсткамера) апны апщаша, май а 19 атшын. Генко Анатолий – зъачIвагIалагIвчва йгIарылхIвуз абызшвадырыгIв, аэтнограф, ашIалахIваразкIкIыгIв, атурыхдырыгIв, КIавкIаз ауагIахъаква рыбызшваквала йагъьыз аъачIвагIагIвчва йрыуазаджвыз – ари амузей апны КIавкIаз ахъвшара унашва ахъицIун.

Анйара Кунсткамери Адуней апсуа-абаза конгресси йадырчпалыз ангIалра апкъ йтата йадылгалтI амузей анаука нхагIв ахIба, аистория наукаква рдоктор Албогачиева Макка.

Апхьахьа ду йюбилей йахьызхIвагата Адуней апсуа-абаза конгресс ЙхIаракIу асовет аунашвачпагIв Эгьзакь Мусса амузей адиректор Головнев Андрей йара Эгьзакь Мусса йгIаджвыквцIарала асквш 2021 ноябрь а 27 агIан Гвым кыт апны йгIахъыртIыз Генко Анатолий йчвахъабага син йгIахъыху аминиатюра йыйттI. Йара ауи апш миниатюра лырттI айззара йгIдрайгваз апхьахьа йпхIа Гусева Юлиягьи. Ужвыгьи закIы Апсны анаукаква р-Академия ахъазла согIата йнайахвтI академия апрезидент ДжьапIуа Зураб. Аскульптура академия атдзы апны йгылазлуштI.

Эгьзакь Мусса йшихIвазла, Генко Анатолий «абазакви апсуакви, КIавкIаз шабгу ауагIахъаква йырмагIну архъвыхра къару ду алайцIатI, абаза уагIа рэтнографии рыбызшви зырхъвыхуа анаука ащата щтIайцIатI».

«Анатолий Нестор йпа йылахь йшакIвымыз йцатI. Льажьа йымамкIва дыркIын йзаманыгIвата атутанакътара дтадырпсытI, йаргьи ауи амщтахь гIамта ауыра йыхьыз зджьрагьи йгьгIанамхIвахуазтI. УахьчIва, абари йапшу ауысква рбзирала, апхьахьа дудздза йынхаракви йхабари шIыц-шIыц йгIащтIырххитI. Ауыла хIара апхьахьа дгIахIгвалашвахуа, йхаз ауыс хвы аквхIцIауа йахъазымкIва йгIадзынгылуа абанпарагьи атурых шырхъмаштылуаш дхIырбитI, акъральыгIва абзазара апны апхьахьаква йалкIгIу магIны шрыму хIацIачIвагъвитI», – йхIватI АААК аунашвачпагIв.

Айззара апны щарда мцIуата йгIацIцIыз Генко Анатолий йынхараква «Абазаква йырзынарху агIвыраква» йгьи «КIавкIаз аэтнография ардыррала аджвыквцIага» йгIарыквчважватI. Ауат ргIацIщтра збзиру Эгьзакь Мусси ауи йрыбагъьаз, Апсны анаукаква р-Академии «Алашара» Дуней адкIылари йацыта йлырхыз «Абазакви апсуакви: абызшвакви атурых-гвбайара тынхи гIащаквыжьра йгьи тшауацIдрыхра» программи ракIвпI.

Анхараква дгIарыквчважватI ДжьапIуа Зураб – ауи йакIвпI ауат адызкIылыз. Акнигаква рэкземплярквакI амузей абиблиотека йрырттI. Йара айззара даквчважвауата ДжьапIуа Зураб кIавкIаздырра апны Генко йалацIара хвы шузаквымцIуш гIаликIгIатI.

«Акнигаква аназхIкIкIуаз абиблиотекаква рархивква, Санкт-Петербург йтагылу, РАН йаланакIуа АмарагIайыртала йаъу акъральква р-Институт архив, Ставрополь край а-КъральыгIва архив, йара Генко Анатолий йархив рпны зджьарагьи хIызнымйас атексткви ашвъакви хIырхъанагатI. Араъа йгIачважваз зымгIва апхьахьа пхата йыквчважватI. Ари йапшу анйараква чIыдахъвыла йудырбитI ауагIа Генко Анатолий Нестор йпа уста йхаз шырхъмаштылуа», – йхIватI ДжьапIуа.

АААК апны акIавкIаздырыгIв, апрофессор Генко Анатолий ауи апхъалагьи дгIаргвалашвалун. Асквш 2019 агIан СогIвым апны ауи йкнига «Абазаква йырзынарху агIвыраква» апрезентация акIвшатI, асквш 2021 агIан Къарча-Черкес апны атурыхдырыгIв ду йзынархата Дуней наука-практика конференция адыргалтI.