Ажвлара йгьи аполитика уыснкъвгагIв, аюрист наукаква рдоктор, апрофессор Шамба Тарас Мирон йпа йхъмаштылгата йадыргалуа II Адуней наука-практика конференция акIвшатI Апсны акъральыгIва университет апны.
Голандзиа Есма
Аконференция гIахъыртIытI АААК ЙхIаракIу асовет йалу асоциология наукаква ркандидат, Россия муниципалитет академия академик Кобахиа Беслани аюрист наукаква рдоктор, РАНХиГС а-ИГСУ апны акъральыгIвадырра акафедра апрофессор Мамитова Наталии.
АдгалагIвчва алалра ахачIв хъадаква гIалыркIгIатI – Шамба Тарас йыхьыз чIахI азыбара, абанпаракI абанпаракI йрархIвуамца ауагIа йырхъмаштылуата йчпара, апсуа юрист наука апхъала йназрыскIьуш щата гIаныршара. Щта, Шамба дполитикти дыжвлара уыснкъвгагIвти йгьахъазымызтIи йыхьыз шйыргаз – ауи йгьи дюрист мчын, йщарду йнаука нхараква уахьчIвагьи йгIадрысабапыркIвитI.
Айззара йалакваз Шамба Тарас йшйабадыруаз, йшйыцынхуз гIаргвалашвахуан, зхъа йахвиту апсуа къральыгIва ащаквгылра апны йалацIара йаквчважвун.
АГУ аректор, АНА, АМАН, РАЕН ракадемик Гварамиа Алеко йгIачважвара апны Шамба йхъвыцща гвыбзыгъа гIаликIгIатI, Тарас Мирон йпа йгIвычIвгIвысща гIазырбауа гIаншараквакIгьи гIайхIватI.
Юстиция аминистр, аюрист наукаква ркандидат Барцыц Анри акъральыгIва хабзанкъвгара институтква рщаквгылра апны апсуара амагIны йазынарху доклад дгIапхьатI.
«АуагIахъа хабза тшдырра магIын ду зму йахъвыкIта йалуа апсуара уахьчIвагьи ахабзаква ргIарысабапра апны тшгIанарбауаркIвитI, йалкIгIата – амакIыраква акъральыгIва къвырльыкъвхартаква аламкIва йаналдыргауа. Ауатква рпны апсуара уыста йахауа – кIьыдата цIолата йырхъвыхра атахъу гIаншарапI», – йгIаликIгIатI Барцыц.
Щарда рхIватI Шамба Тарас агIвыма къральква рпны йбзазауа хIабашталагIвчва адкIылра ауыс къарута йалайцIаз ахъазла. Апнсы ауагIа р-Абашта айсра йанашымтаз Шамба Апсуа-абаза (абаза) уагIахъа р-Дуней адкIылара (уахьчIва – АААК – аредакция ррытаразга) дапрезидентта далырхын ауи аъанатIа сквш 25 йынкъвигатI.
«Тарас Мирон йпа СогIвым, Черкесск, Майкъвап, Нальчик, Трыквшта, Сирия, Германия, Иордания, Египет, Голландия, Испания, Африка рпны йаргвану йгьи йхъару агIвыма къральква йыртабзазауа хIабашталагIвчва щарда дрынйатI. Сара ауи агIамта Апсны акъральыгIва телерадиуакомпания апны журналистта сынхунта щардазджьара ауи сйыццарныс сынасып йгIанакIытI. Апсны ауыжвгIанчIви турых апны, апсуа уагIахъи Лагъь КIавкIаз, Россия рпны йбзазауа ауат райщчви рабадырра рыбагъьара апны Тарас Мирон йпа йалацIара хвы аквцIауачвапI», – йгIалылкIгIатI лгIачважвара апны афилология наукаква рдоктор, АГУ апны журналистика акафедра апрофессор Бебиа Екатерина.
ДаквгIашIастI Бебиа Шамба Тарас йымщтахь адкIылара унашва ахъызцIауа Эгьзакь Мусса йунашва йацIата ауи уыста йархъйауагьи.
Шамба Тараси йари рынбжьагIвыгIара даквчважватI аюрист наукаква ркандидат, АкъральыгIва Дума ауагIахъа уысквала акомитет аппарат аунашвахъцIагIв Бигуаа Батал.
«Асквш 2013 агIан хIара АкъральыгIва Дума агвып хIрылата Германии России рправительстваква йгIандыршаз акомиссия алачIвара хIалазларныс Германия хIцатI. Аконференция хIангIаджвылцIх намыца апхьахьаквакI гIахIыдгылын райша са тшгIасзынадырхатI: «Уара уапсыуума?» – хIва. «Щта», – схIватI. «Тарас Мирон йпа дудырума?» – «Дшпасымдырра!» Сара йджьасщатI Германия, Берлин апынгьи Тарас Мирон йпа дъардыруа».
Датшагьи аконференция апны йгIачважватI «Апсны. АкъральыгIвари ахъахвитри рхабза щатаква» згIвыз йрыуазаджву Непрошин Александр йгьи зыхьыз хъара йгауа хIабашталагIв Киут-Лагунов Мехти.
Айззара алгауата рдокладква йгIарыпхьатI АГУ астудентквагьи – Джениа Леони Амычба Мадини.
«Шамба апхьараква» Апсны акъральыгIва университет апны сквшигIадза йакIвшауа Дуней наука-практика конференцияпI. Ауи адыргалитI Адуней апсуа-абаза конгресс, АГУ, Апсны анаукаква р-Академия, Москва апсуа диаспора.
швталра йа тшаншвцIара атахъыпI.