Барганджиа Саид

Июнь а 1 атшын йджвыквылтI Трыкв Республика Акпынар кыт апны апхын мызква руацIа «Алашара» адкIылара йадыргалыз абаза бызшвала арыпхьара, уахьчIвала апхьара тшадыркIылтI уагIа 70-гIв райхIа.

Абаза бызшвала апхьарасахIатква акIвйыршитI акъральыгIва телерадиуакомпания «Къарча-Черкес» ажурналист Льий Зауыр. Ауи арыпхьагIвта дгьнымхатI, ауаса Къарча къала апны апедагогика институт дгIалгатI, ауи амщтахь ауралагьи абаза бызшва даланхун.

Льий Зауыр йшихIвазла, апхьагIвчва рыуа щардагIвы апхын атшпсщара мызква рагIан Акпынар йгIайитI, йырбзазарту «Франция, Германия» ракIвпI. Трыквшта анахьанат акъалаква йрыуу апхьагIвчвагьи аъапI.

«Сара хгвыпкI асрыпхьитI: 7 сквша йгIашIарышвта 12 сквшадза, 13 сквша йгIашIарышвта сквшы 22-дза, сквшы 23 йгIашIарышвта рыцIа йахIбачву. Зныбыжьла йнаскIьахьугьи аъапI. Ансимшы гIвба-гIвба сахIат хIапхьитI. ЗымгIвагьи рдырраквала йгьапшым. Акыт йауу ахIбачва абаза бызшва рдыритI. АхIарыфква зымдыруаз аъан, йагIвсыз агIамта ауацIа йддырдыртI. УахьчIвала апхьагIвчва зымгIвагьи йзыгIвитI йгьи йзапхьитI. Йхъаду ари акIвпI: цри бызшва гIальаматра азрымапI, йддырдырныс ртахъыпI. АпхьарасахIатква шакIвшауа авидео йанхIцIитI апхьагIвчва рпынква йанцахрагьи рхъа йшзадынхалуаш апшта», - йхIватI арыпхьагIв.

Льий Зауыр йгIацицIахтI аквтанай гвыпи айцIбачви абаза уысаква ддырдыруа йшалагаз. Асабиква зымгIвагьи гIважвадза йзыпхьадзитI. АрыпхьагIв йшихIвауала, анчва-абачва апхьагIвчва рдырраква араса йбзихапIхIва йгьымгвыгъузтI.

Быжьсквша йырту Айканат Салиха лыбызшвала дтрыквпI, ауаса абаза бызшва гIальаматра ду азлымата йыллырдыритI, йзылгвапхауагьи, лара йшылхIвазла, абазаква дъарылабзазауа, ауат швабыж бзи йъалбауа акIвпI.

«Сара швабыж йсгвапхитI абаза бызшва. СайгвыргъьитI сыгIвзачва абазакви сари абаза бызшвала хIъазайчважвалуш», - лхIватI апхIвыспачкIвын.

КвасаргIа ащи ахщи, Булени Омари, абазапI, Трыквшта Адана къала йтабзазитI, апхын Акпынар йту ръахIыльчва йрызгIайлитI. Ауат швабыж йайгвыргъьатI цри бызшва йзапхьушта анырдыр. «Швабыж йхIгвапхауата хIапхьитI, зджьакIгьи хIхIырдырхьатI. Анчва дырзыразхатI!» - йхIватI Омар арыпхьара адгалагIвчвагьи арыпхьагIвгьи дшырзыразу гIайырбауата.

Абаза бызшвала арыпхьара Трыквшта Акпынар апны ауи агIахчари атшауацIнарыхри знархару апрограмма апкъ йтата йакIвшитI. Абызшва агIахчара ауыс арыпхьара адгалагIвчва, «Алашара» адкIылара, йалкIгIата ргватра азалхпI, ари анархарала анхара къару ду аларцIитI.