АААК ЙхIаракIу асовет йалакву а-Конгресс анхара апычIв гIарбараква йрылапштI йгьи асквш 2019 ацIыхъвадза анхара рыцIа йхъаду анархараква гIадрыбергьыльтI.
Барганджиа Саид
Адуней апсуа-абаза конгресс ЙхIаракIу асовет аунашвачпагIв Эгьзакь Мусса агIваша июнь а 11 атшын ЙхIаракIу асовет йалакву йпщбахауа ралачIвара акIвйыршатI. Ауи онлайн конференция квпшыра аман: АААК Согъвым ауысхарта тшапырщылын тшгIазынадырхатI Москва, Санкт-Петербург, Черкесск, Нальчик, Ставрополь, Астомбыль йгьи Сакария йыртабзазауа ауысхагIвчва. АлачIвара ауатыкв йгIатарцIан йрылачважватI а-Конгресс анхара апычIв гIарбараква йгьи йгIадрыбергьыльтI асквш 2019 ацIыхъвадза анхара рыцIа йхъаду анархараква.
АААК афинанскви амлыкви рнархарала анхара агIарбараква дрыквчважватI Черкесск апны йаныргIалу «Алашара» адкIылара ахъвшара аунашвачпагIв, а-Конгресс аквта ревизия комиссия аунашвачпагIв Мыква Мурат. Ауи йауацIыхта йгIайырбатI асквш 2018 май йгIашIарышвта асквш 2019 апрель мыздза йакIвшаз анхара.
Ауи йшихIвазла, йагIвсыз агIамта ауацIа а-Конгресс акврыдзраква сом 27 045 000 йнадзатI, ауат йрыуата сом 27 018 000 а-Конгресс афонд гвчIагIвта йаларцIатI АААК ЙхIаракIу асовет аунашвачпагIв Эгьзакь Мусса йгьи Москва апсуа диаспора рхъада, АААК ЙхIаракIу асовет йалу Агрба Беслан, алазара швачIвква рпхьадзара сом 27 000 йнадзитI. Мыква Мурат йширытамамызла, йгIарбу апхьадзара йаланакIитI Согъвым апны а-Конгресс анхагIвчва рынхаша хIакъ, аналогква, уыснкъвцарала агIамдараква йрыквыдзыз ахча, агуманитар проектква рырхъйара акврыдзраква, ауысхарта арчIаджьри анкъвгари знархараз акврыдзраква, апсауатла йгьи аоргтехника злархвгIаз ахча, ахабарргарта портал анхара акврыдзраква датшагьи.
«Аревизия комиссия йшырпхьадзауала, афинанскви амлыкви руысла а-Конгресс анхара уарыразуата йаъапI, ауи анхара йазарархауа мыгIвхъгара кIара аъата акомиссия йгьгIадымрыбергьыльтI», – йхIватI Мыква Мурат.
АлачIвара йалакваз йащтагIайуата йызлапшыз асквш 2019 апны а-Конгресс анхара аплан акIвпI. Аплан йалапI Апсны апны АААК ашIыпIа хъвшараква ргIаныршара, агIвымакъраль нхара уысква рырхъйара, йалкIгIата, Трыкв, Египет, Иордания йгьи Германия рцара, агвчIагIвчпара акцияква ракIвыршара, датшагьи йапшым апроектква.
Эгьзакь Мусса йрытамамтI аплан дрыбагъьазтынгьи йанатахъхара ансимш нхара йаццауата ауи псахра шаларцIалуш.
АлачIвара йхпахуз ахъвы ззынархаз Къарча-Черкес апны «Абаза хъвмарракви» Апсны Республика абаракъ Амши радгалра акIвын. Ари ауыслагьи Мыква Мурат дгIачважватI. Ауи адгалра комитет анхара, апсуа-абаза диаспора ргIащтийыгIвчва гвыпква радкIылра шакIвшауа далачважватI.
ЙакIвшуш ахъвмарраква рунашва даквгIашIасуата Эгьзакь Мусса йгIаликIгIатI «агвыпква гIалалырныс ахъазла зымгIвагьи лшарата йрыму абгата йгIадрысабапра шатахъу. СынчIва ахъвмарраква цIыпх ацкIыс рыцIа йагъьта йакIвхIыршарныс хIмурадпI», – йгIацицIахтI ауи.
Адуней апсуа-абаза конгресс ахабарргарта портал анхара апычIв гIарбараква дрыквчважватI Лазба Амина. Ауи йшгIалылкIгIазла, уахьчIвала ахабарргарта портал гIаншищтара йапшым аформатквала йадгалата хвбызшвакIла материал 1500 райхIа гIаквшвахьатI.
«ЙцIыхъвахауа ахмызкI руацIа асайт йапшхьатI гIарысабапыгIвчва зыкь 20-гIвы раъара. Джьгарта апортал агIвыраква йрыпхьитI Россия, Грузия, Апсны, Трыквшта, Ирландия, Армения, США, Германия, Азербайджан, Великобритания, датшагьи къраль щарда рбзазагIвчва», – лхIватI Лазба Амина.
Ауи йшгIалхIвазла, хIызту амыз ацIыхъва гIарып бызшвала апортал аверсия анхара джвыквыржьуаштI. УахьчIвала асайт агIвыраква апсуа, урышв, трыкв, ангьльыз йгьи абаза бызшвала йгIаквшвитI. Асквш ацIыхъвадза апортал апны йапшым амаль шIыцква гIандыршуштI, ауи йапшта араъа йабадырныс, йащтаныкъварныс, йайчважваларныс рылшуштI апсуа-абаза диаспора, йгIацылцIахтI ахабарргарта портал аунашвачпагIв.
«АлачIвара атшын гIаргванхауата амаль шIыц гIаншатI – ужвы алазлара швачIвква, а-Конгресс апроектква ахчала йацхърагIарныс зтахъу ауагIа онлайн амаль гIадрысабап йауаштI. УахьчIвала ари амаль Апсны апни Россия апни йынхитI, уыжв ласыла ауи апш амаль рауаштI адунейла анахьанат акъральква рпынгьи», – лхIватI ауи.
Анйара алйыргауата Адуней апсуа-абаза конгресс аунашвачпагIв Эгьзакь Мусса ЙхIаракIу асовет йалакву тшырзынайырхауата йаквгIазшIиттI а-Конгресс апроектква джьгарта йрылалырныс йгьи агIаджвыквцIара шIыцква гIадрахарныс.
Адуней апсуа-абаза конгресс ЙхIаракIу асовет алачIвараква йапымшвтуата йакIвшалитI. ЙхIаракIу асовет йалакву йцIыхъвахауата йананйа асквш 2019 январь агIан акIвын, ауи асхъан анйара ъакIвшаз Астомбыль апны акIвпI. Ауаъа йагIвсыз асквш апны АААК анхара агIарбара хъадаква йрыквчважватI.
швталра йа тшаншвцIара атахъыпI.