АААК ауысхагIвчва ргвып нхауищтара йцIуа асквшыкIи бжакIи руацIа Апсни Трыквшти рпны а-Конгресс ашIыпIа хъвшара 30 гIанхъыртIытI. АААК аргIапсща шаъула йгIауахвырквын, ауат ашыпIаква рпны абаза уагIа рабадырра йазынхитI, ауи абадыррагьи ауысква рырхъйара ымайритI.
Барганджиа Саид
Адуней апсуа-абаза конгресс Апсны апни Трыквшта йту апсуа-абаза диаспора йалакIыта йъабзазауа аштаква рпни а-Конгресс ашIыпIа хъвшараква штшауацIырхуашла анхара джьгарта йакIвнаршитI. УахьчIвала йгIахъыртIытI, рынхарагьи джвыквырцIахьатI шIыпIа хъвшара 30.
АААК ЙхIаракIу асовет аунашвачпагIв Эгьзакь Мусса зымгIвагьи йгIаргвалайыршвахтI асквш 2020 ауацIа а-Конгресс «Апсны акъалакви акыткви йшрылшауа апш рахIа щардата» йгIарыцIаркIырныс хачIвыта йшаргылыз. Ауи йшипхьадзауала, ари ауыс ареспублика апны акъральгIв жвлара тшауацIнарыхра щатата йазалуаштI: ашIыпIа хъвшараква затахъу ауагIа йыртахъу дара рпны йгIаууырдырта даргьи анхара йазгIащтIухырныс ахъазла акIвпI.
«АуагIа рбзазаща хIпсахра ахъазла апсыуа, абаза тгIачвипхьадза шбзазауа гIдырра атахъыпI. Ауат аргваныта хIрабадырра, хIрыцынхара атахъыпI. ЙамгIануысызлакIгьи хIацыта йхIымчпакIва йгьауашым: акытква рбзазагIвчва йдырхъйарныс йыртахъу йгьи йрылшуш апроектква хIдырбитI, дасу ауат рырхъйара йкъару алайцIитI. АААКгьи ауи анхара йалалитI, йызлатахъула йацхърагIитI», – йхIватI анхара адгалазара шатахъу ауысла Эгьзакь Мусса.
Швапхата йгIайгтI ауи Гвдауыта фыркъала: ауаъа йгIаныршу ашIыпIа хъвшара аджьгарри ацынхари рбзирала заман айшысла хпроекткI дырхъйатI – аспорт тшыбжьартаква рчпатI, анышвкъваратапсартаква дыргылтI, рапхьарта адзцагагьи дырчIаджьтI.
АААК архъйагIв секретарь Гицба Инар йшихIвазла, АААК ауысхагIвчва Апсны акытква йцалитI, йара ауи апшта Трыквшта апынгьи ашIыпIа хъвшараква гIаныршарала нхара акIвдыршитI. Ахъвшараква зымгIва йара джыпхакIла йгIандыршитI: анйараква адыргалитIта а-Конгресс йаквчважвитI, ауи мурадта йаргылуа, уыста йаднагалхьу рхIвитI, ауагIа йрабадыритIта ашIыпIа апны ауысква зкву ддырдыритI, уызцынха йауаш агIвычIвгIвыс джьгарква гIалыркIгIитI.
«Ауат анйараква рпны гвыхътIыла акытква рбзазагIвчва баргвырата йзынйауа хIрылачважвитI, дасу акыт зтагылу аъаща ауысла йгвгIанаграква йхIвитI. Абарауасамцара кытипхьадза йазынархата азцIгIарата йаъу швъата йагвынхIыргIвитI. Кытипхьадза йазалхта уыста йчпара атахъу лыхIхитI. ЗымгIва йрапхъу – агIвычIвгIвыс джьгарква ргIаура акIвпI, ауат адукIылырквын абзазара уысква узагвныргIвуаштI. Мурадта йхIыму – ари ахъвыцща акъраль арайонква зымгIва рпны кытипхьадза абзазагIвчва йрыладыркIра акIвпIта, ужваресахIат ауи хIащтапI», – йхIватI Гицба.
АААК ауагIа йъарабадыруа анйараква шадыргалуа даквчважватI АААК йаланакIуа апхIвыс советква рунашвачпагIв Ардзынба Гета.
Ауи йшылхIвазла, а-Конгресс анхагIвчви апхIвыскви чкIвыныргIи рсоветква йрылаквуи йъацуш акытква рпны пасата згвы цхIауа ауагIа гIарауитI.
«Ауыс хъйара айауаши йамайауаши ауат ауагIа щардала йырпщылапI, хIаргьи ауат пасата АААК уыста йархъйауа йалыргата йгьи йауацIыхта йрахIхIвитI. Ауат йрыхъвдаквхIцIитI рыцIа «зпсы пIатIауа», йджьгару, а-Конгресс амурадква йрыцызкIуашта йаъу, анахьанат ауагIагьи ззадкIылуаш, акытуысква замангьи къаругьи рзалызхырныс зылшуш ркытлагIвчва йапхъахауа анйара йгIардырныс», – йгIахIгвынлыргIвытI Ардзынба йгьи йгIацылцIахтI: «АААК ауысхагIвчва дара рхъвыцраква ауагIа йрыладдыркIырныс, ауыс йгIацIадыргылырныс шрылшауа акIвпI ашIыпIа хъвшара уагIата йалазлуш, ауи анхара анадзара шаъазлуш зпщылу».
АпхIвыс советква рунашвачпагIв йылхIватI а-Конгресс ашIыпIаква рпны йынхарныс йхIазыру ауагIа ауи апхъала зджьакIы йлырххьата, уызшIпшуамцара укыт ахъазла рыцIа магIны зму анархараквала уызланха йауаш апроектква шддырбалауа.
«ХIара (АААК) хIыхъазла швабыж магIын ду амапI ауагIа штшгIахIзырчпауа, йшгIахIачважвахуа: ауи йгIаквхта акытква рбзазагIвчва рахIа ргвы йтыхъуа абаргвыраква хIыла йгIацIагIжьитI, ауат хIызларыдынхалуаш ахачIвква лыхIхитI, ауатква хIъадзарылу дара ахъвшара йалаквугьи апроектква рлыхра тшадрыщцитI – ауыс ахчата йаквыдзуашнадзара рзыпхьадзауа, ауат акврыдзраква шдырмачIуаш амальква гIарауа тшырбжьитI. Абарауасамцара ашIыпIа хъвшара здынхалуаш ахачIвква бергьыльхитI, ауат швъата йагвныргIвыта а-Конгресс аналитика хъвшара анхагIвчва йырнапIыцIашвитIта ауаъа цкIыцкIы йалдыргитI, йаквдыргIапситI», – лхIватI Ардзынба Гета.
Ауи йгIалылкIгIатI уацIыхъван а-Конгресс ауысхагIвчва Апсны арайонква рпны йгIаныршу ашIыпIа хъвшараква аргваныта йабадырдырта йдырхIауа ашвапха абархIвуамцара рынхара асабапра шщтIырхуаш апшта ауысква шандыргIалуаш.
А-Конгресс йаланакIуа чкIвыныргIа рсоветква рунашвачпагIв Торчуа Леван гвы шайтызла, анйараква рпны акытква рбзазагIвчва рахIа йызквчважвауа ансимшбзазара йапщылу абаргвыраква ракIвпI.
«ХIара акытква рбзазагIвчва йшырхъазым, тшадхIкIылырквын щарда шхIызпсахуаш гIаргвынхIыргIвныс хIащтапI. Ага йгвасразтынгьи, уахьчIва, ХХI асквшышв агIан, хIара йыгIгIитI апхьартаква рпны асабиква йырквнагу аъаща шырзыгIандмыршауа, дзы шрымам, апхьартаква шдмырпхауа. Ауаса унапIква акврышв учIвапIхIва магIны гьамам. Щардала йгIахIыхIвитI апхьартаква хIырцхърагIарныс: автобус рымапI, ауаса былчIвы гьгIарыртуам; кыт щарда рапхьартаква рпны айъазарта пещква хъвшвыла йгьадгалам. Арат йрапшу ашшраква щардадзапI», – йхIватI Торчуа Леван.
Ауи йгIацицIахтI АААК ашIыпIа хъвшараква йызларангIалыз ауысква рырхъйара шджвыквнацIахьаз.
УахьчIвала Апсны апны ашIыпIа хъвшараква Эшера, Дурыпщ, Лыхны, Квланырхва, Гвдауыта, Агвдзера, Дранда, Адзюбжа, Джьгарда, КвтIол, Атара, Тхина, Очамчыра, РекIа, Тамщ, Моква, Ткъварчал, ЧхваратIол, Бедиа, Гала, Уарча, ЛашкIьындара, МеркIвыл рпны йгIахъыртIхьатI. Трыквшта апны ашIыпIа хъвшараква гIахъыртIытI Астомбыль, Измит, Сакарйа, Бурса, БиледжьыкI, Эскиншихир, Инегель рпны. АААК ЙхIаракIу асовет аунашвачпагIв хачIвыта йшйыргылыз апшта сынчIва апрельдза Апсны апны ужвыгьи шIыпIа хъвшара 20 гIандыршуштI, ауылагьи йгьашIасуашым: апхъахьыла ашIыпIа советква Апсны кытти къалати йаъу зымгIва рпны йгIандыршарныс хачIвы гылапI.
швталра йа тшаншвцIара атахъыпI.