Барганджиа Саид

ЙагIвсыз амчыбыжь ауацIа Апсны апны коронавирус рыхьуата ужвыгьи 161-джвы гIараутI, азгIва рыхьуи йрымхьуи гIаддырдыруата архъвыхра 1468-гIвы гIакIылстI. Ауи апш хабар аргатI АуагIа коронавирус згIва йачвыхчарала аоперштаб.

Аштаб ауысхагIвчва йшырхIвазла, ужвы ари асахIат Гвдауыта Аквта район чымазагIвтара апны 34-гIв щтIапI, ауат йрыуата 28-гIвы коронавирус рыхьуата йщаквдыргылхьатI. АгIгIвы хIатлапI, 19-гIв ауи апшта йгьхIатладзам. Согъвым йтагылу ашIашIкIгIара згIваква зхьуа йъарайъазауа ачымазагIвтара апны COVID-19 шрыхьуа щаквдыргылхьата жвагIвы щтIапI, Очамчыра район аквта чымазагIвтара апны – пщгIвы, Ткъварчал апны – хгIвы, Гагра апны – 11-гIв.

Ари амчыбыжь агIан Россия йырчIву йатдрыпауа айсра чымазагIвтара анхара йалгатI. Апсны р-Президент Бжаниа Аслан ауаъа йынхауа акъвырльыкъвхагIвчва Апсны апны COVID-19 ауысла аъащаква рахIа йанбаргвха цхърагIарата йгIандыршаз ахъазла дшырзыразу райхIвтI.

«Пандемия гIаджвыквлищтара Апсны апны коронавирус зхьуата йщаквдыргылыз зымгIва шалу 12861-джвы йнадзитI. Ауат йрыуата 12387-гIвы бзихахтI, 202-джь псытI», – хабар аргитI аоперштаб.

АуагIа коронавирус згIва йачвыхчарала аоперштаб ауысхагIвчва ауагIа азгIва тшачвыхчарала амальта йаъу шнарахвуаш йаквгIазшIыртитI.

Апсны апны COVID-19 ауыс уазцгIата аъачIвагIагIвчва рбжьагажва уаздзыргIвы йызлауаш йанакIвызлакIгьи йынхауа ателефон номерква аъапI.

Согъвым абзазагIвчви асасчви 995–02–07 йгьи 935–30–71 номерквала телефон йас йауаштI, Очамчыра – 925–10–09, Ткъварчал – 925–10–03, Гала – 925–10–07, Гагра – 925–10–05, Гвдауыта – 925–10–02, Агвдзера – 925–10–04 номерквала.