АААК ЙхIаракIу асовет аунашвачпагIв Эгьзакь Мусса йгьи а-Конгресс анахьанат ауысхагIвчва Иордания апны Россия акIьыкIварта аунашвачпагIвчва йрынйатI. АААК ащтийыгIвчва арат амшква руацIа Амман апны нхара уысла йаъапI.
Хагба Изольда
Иордания Хашимит ПаштахIыгIвара ацара-гIайра йаланакIуата амтшаша август а 25 атшын АААК ащтийыгIвчва гвып Иордания апны Россия акIьыкIварта аунашвачпагIвчва йрынйатI. АААК ртланыкъвала анйара йалан ЙхIаракIу асовет аунашвачпагIв Эгьзакь Мусса, а-Конгресс архъйагIв секретарь Гицба Инар йгьи АААК ЙхIаракIу асовет йалу Алшундба Инвер.
Анйара апны Эгьзакь Мусса йшгIаликIгIазла, АААК ащтийыгIвчва агIвыма къральква йыртабзазауа апсуа-абаза диаспора йанрызцара адиаспора зту акъраль аунашвачпагIвчвагьи араъа йтанхауа Россия Федерация адипломатия кIьыкIвартаква рунашвачпагIвчвагьи йрынйитI. Ауи цIаста йщаквгылапI.
«ХIара хIыхъазла магIны амапI адиаспора йырзынархата хIынхара злалу ауысква акъраль аунашвачпагIвчвагьи йырдырырныс. А-Конгресс зтагылу амгIва злалу бзирапI, йхIчпауа зымгIва хътIыпI», – йхIватI Эгьзакь Мусса. Иордания йтабзазауа апсуа-абаза диаспора рахIварала Эгьзакь Мусса анйара апны акIьыкIварта зхъпшылуа ауысквагьи гIащтIихтI, ауат йрыуапI Апсны ларпшра йцауа абашталагIвчва Россия атранзит йгьи асасра визаква йалкIгIу адгалща рымата йгIарыртларныс.
«Россия авизаква ргIапшцIгара рыцIа ймайрахарыквын, йшыгIбауала, адиаспора йрыуу ауагIа рапхъанчIви псадгьыл апны рцарагьи арымайруштI, акврыдзраквагьи йрылнардзгIуштI, рлахIвара бзиквагьи арыбагъьуштI», – йгIаликIгIатI Эгьзакь Мусса.
Иордания апны РФ акIьыкIварта дара ртланыкъвала йгIархIватI АААК цхърагIарата йыззыбжахауа шддрайдзуш йгьи йдрыбагъьатI а-Конгресс йрыцынхарныс йшхIазыру.
Ауи апхъала, йара август а 25 атшын, Иордания ацара-гIайра знархару ауысква йрыланакIуата АААК ЙхIаракIу асовет аунашвачпагIв Эгьзакь Мусса ажвлара адкIылара «Диуан Абаза» (Иордания йту апсуакви абазакви рыжвлара адкIылара – аредакция ррытаразга) ауысхарта апны апсуа-абаза жвлара йрыуу гвыпкI дрынйатI.
Ажвлара адкIылара «Диуан Абаза» ахъада Абаза (Чычба) ХIасан йшгIайырбазла, Иордания апны уахьчIвала апсуа-абаза диаспора йрыланакIуата уагIа 4000-гIв раъара тапI, ауат йрыуата 700-гIвы райхIа Апсны Республика акъральыгIвра гIапшцIыргахьатI.
АААК аунашвачпагIвчва Иордания Хашимит ПаштахIыгIвара август а 27 атшындза йаъазлуштI. Ауат ауаъа рцара-гIайра асквш 2019 аурала а-Конгресс аунашвачпагIвчва агIвыма къральква ргIарыкIвшара знархару аплан йаланакIитI. Ауи аплан асквш 2018 агIан ЙхIаракIу асовет йдрыбагъьатI. СынчIва асквш ацIыхъвадза АААК датшагьи йгIарыкIвшарныс ргвыгъапI Сирия, Германия, Голландия йгьи Трыквшта.
швталра йа тшаншвцIара атахъыпI.