Адуней апсуа-абаза конгресс ауысхагIвчва анхара ауысквала Египет йцатI, араъа ауат АбазаргIа рткъвым йрынйатI.
Барганджиа Саид
Адуней апсуа-абаза конгресс ауысхагIвчва анхара уысквала Египет йцатI, араъагьи йтапI апсыуа-абаза диаспора. АщтийыгIвчва гвып йрылапI АААК архъйагIв секретарь Гицба Инар, Апсны агIвымакъраль уысква рминистерства йаланакIуа МарагIайырта Аргваны йгьи Африка рдепартамент аунашвахъцIагIв, АААК ЙхIаракIу асовет йалу Алшунба Инвер йгьи йазалху хъвдаквцIара зырхъйауа Апсны агIвымакъраль уысква рминистерства ауысхагIв, АААК чкIвынргIа рсовет йалу Асабуа Альас.
Гицба Инар йшихIвазла, агвып рпахь хачIв хъадата йгылапI Египет йту адиаспора рабадырра йгьи «щата багъьа зму ащтаныкъвара ащаквыргылра». Египет апсыуа-абаза диаспора лкIгIара джьащахъвата йгIадырбитI зымгIвагьи АбазаргIа рткъвым йъарыланакIуа, ашвъаква йгIадырбауата атдзахьыз Абаза ъацынкъвыргауа. Ауаса йшаъугьи аткъвым рызбжагIв рапхъанчIви тдзахьызква гьырдырхуам.
Каир йаннадза агвып дгIарпыралтI аткъвым йрыуу Абаза (Маан) Рауф. Ауи йакIвпI Египет апны АААК ргвып рынхара программа архъйара йацхъарагIауа. Апрель а 22 атшын Гиза апны йауацIыхта йакIвшатI асасчви АбазаргIа ргIащтийыгIвчви йапхъахауа ранйара.
«Анйара йгIадгылтI Каир, Александрия йгьи Египет анахьанат ашIыпIаква йгIартыцIыз хIабашталагIвчва. ЩардагIвы йшгIалыркIгIазла, ауат Апсны йауу рабашталагIвчва йапхъахауата йрынйитI. Анйара пхата йакIвшатI, араъа йапшым ахъатаква гIарыцIанакIуата уыс щарда йрылачважватI», – йхIватI Гицба.
Анйара апны АААК ауысхагIвчва цIолата йахадыргIвазатI АбазаргIа рбзазара шщаквгылу.
«Йшбергьыльхазла, АбазаргIа рткъвым йгIандыршатI чвалатшычпарадъа йынхауа ахIбачва йгьи чкIвынргIа рсоветква. Египет аполитика лкIгIараква ршвхIаусыгIвала аткъвым щарда цIуата йгьамайззастI, апхъала аткъвым йадыркIылуаз ауагIа рпхьадзара 500-гIв йгIашIарышвта 1000-гIвыдза йнадзун», – йхIватI Гицба.
Ауи йширытамамызла, адуней гIаншараква ршвхIаусыгIвала аткъвым райззараква апсыуа культура апны йцIасу ахцIараква рыламкIва йакIвшун – йззыхIхIвауа ауагIахъа гIахIвраква, ашваква, афольклор ахъвква, ауагIахъа фачIвква рмацIаура агьиква ракIвпI. Ага ауаса йаъазтынгьи, АААК ауысхагIвчви дари ранйара апны йщаквдыргылтI сынчIва адзын АбазаргIа рткъвым райззара ду акIвдыршарныс».
А-Конгресс ауысхагIвчва дара рхъатала АААК анхара йауацIыхта йаквчважватI: адкIылара адунейла апсыуа-абаза уагIа ращтаныкъвара арыбагъьара, аэтнокультура цIасква рауацIыхра, адиаспоракви ауат рапхъанчIви Псадгьыли рацынхара уысква рырхъйара йшацхърагIауа гIархIватI. Ауи амщтахь, Гицба йшихIвауала, анйара йалакваз «акультура ацIасква тшрыхадыргIвазарныс, ауат рбзазара йаларцIарныс гIартахъхатI».
«ЩардагIвы йшырхIвузла, йанакIвызлакIгьи йрылархIвун «йызлу йшрапшым», – йгIацицIахтI АААК архъйагIв секретарь.
Адуней апсуа-абаза конгресс ЙхIаракIу асовет йалу Алшундба Инвер йшгIаликIгIазла, анйара ажвала йузымхIвушта йгвапан. ХIабашталагIвчва йрымаджьащахъвата йрызцIгIун рапхъанчIви псадгьыл йцарныс, чкIвынргIа рабабара адыргалырныс ахъазла амальта йаъу.
«Араъа йаъаз зымгIва рыхъазлагьи анйара гвыргъьахъв духатI. Ахърыкъьара аламкIва йсхIвитI араъа йгIаншуз анубара йалкIгIата арат йрапшу анйараква рмагIны шуылаухIвауа, хIугIахъа радкIылра ауыс рахIагьи ушазгIашыкъхауа», – йхIватI Алшундба Инвер.
Анйара агвапара йацикIтI АААК чкIвынргIа рсовет ауысхагIв Асабуа Альасгьи. Ауи йгвы йасуата йхIватI «АбазаргIа дрыуата апсыуа йа абаза бызшва здыруа заджвгьи дшгIарнымйаз – ахIбачва рпынгьи айцIбачва рпынгьи».
АгIаджвыквцIараква тшауацIырхырныс, апхъахьыла ацынхара зламгIвайсуаш анархараква йрылачважварныс ахъазла АААК ауысхагIвчва йыргвыгъапI Египет апны адиаспора йрыуата джьгарта йынхауа агIвычIвгIвысква кIьыдата йрынйарныс – акультура анхагIвчва, АбазаргIа рткъвым атурых анархарала йынхауа аъачIвагIагIвчва, датшагьи.
швталра йа тшаншвцIара атахъыпI.