Барганджиа Саид

Трыквшта апны хIадагIвачата йгIадрыбергьльытI алагъь провинция Зонгулдак йаланакIуа Чанджум къала (ауагIа датшата «Салтыково» - хIва йапхьитI – аредакция ррытаразга) йачвыхъарамкIва йчIву агIвкыткI - ГIвадахь Ихсаанье йгьи Лагъь Ихсаанье – рпны апсуа щайдза зму тгIачва 300 райхIа шбзазауа. Ауат апсуаква йшрыуу рдыритI, ауаса уыжвгIандзара рапхъанчIви псадгьылгьи Трыквшта йту апсуа-абаза диаспорагьи йгьрабамдыруазтI. Ари ахабар АААК ахабарргарта портал йгIарайхIвтI Трыквшта апны йазалху хъвдаквцIара нкъвызгауа Апсны ауысхагIв Харазиа Вадим.

Ауи йширытамамызла, ауат акытква рунашва гIардырищтара мызквакI ракIвпI йцIуа – Апсуафед (Трыквшта апны апсуа культура квтаква рфедерация – аредакция ррытаразга) ауысхагIвчви йари атрыкв къала Синоп йанцуз асхъан.

«АмгIвала кыткI хIталтI, ауаъа апсуа-абаза диаспора ауысхагIвчва хIызпшуан, 12-15-гIв йнадзуата. Ауат ракIвпI йгIахIазхIвыз акытква ГIвадахь Ихсаанье йгьи Лагъь Ихсаанье рхабар», - йхIватI Харазиа.

ЙшгIацIцIызла, ауат акытква рбзазагIвчва йырдыритI рапхъанчIвиква шапсыуаз, сквшышвпхьадзара рапхъала амхIаджьырра азаман рцришта зальмагIала йштыргаз. АбзазагIвчва йгьырхъмаштылтI апсуа мацIауыщагьи, рыцIа йхъаду арызкъква рмацIауитI: мамырса, къвыд, ачапа.

«ЦIабыргыта, рыуа заджвгьи апсуа бызшва гьидырам, ауат зымгIвагьи Трыквшта апсуа диаспора йакъвгата йбзазитI. Ауи хIара зымгIвагьи йджьахIщатI. Сквшы 25 райхIа ари анархарала (Трыквшта апны апсуа-абаза диаспора адкIылараква – аредакция ррытаразга) йынхауа щардагIвы йапхъахауата йырдыртI арат акытква апсуаква шыртабзазауа. РахIа йгвасругьи, акытква рбзазагIвчва йапхъахауата йыргIатI апсуа бызшва, уыжвгIандзара атрыкв диаспоранадзара (Трыквшта апны апсуа-абаза диаспора – аредакция ррытаразга) йрыуата заджвгьи йгьйабадырам», - йхIватI Харазиа.

Ауи дшхъвыцуала, баргвыпI йухIварныс, агIвкытI рбзазагIвчва адиаспора йрыуу анахьанат ауагIа йзрабамдыруаз.

«Ауат йраргванта йчIвапI акъала пхатшаква, акыт дуква. Бартын – амшын атшпы йчIву къала дупI. Ауи акъала йгIатыцIитIта Апсны ахъвыхIква цитI. Зонгулдак (Зонгулдак провинция йауысхарта квтапI – аредакция ррытаразга) – ахIахъврачвагIацIхыртаква ъауацIыху ашIыпIа йчIву къалапI. Карабюк къала Трыквштала рыцIа йпхатшу айхархарджьырта тагылапI. Йарауаса архарджьра ъауацIыху, хIахъврачва ъагIацIырхуа къалапI Деврек, Чанджум, Кара Эльмас. ЙгIаншаз, ауат рыщта зыдзыз йашвхIаусыгIву гьсзыхIвушым, - йалныс ауыпI рбзазара хIатлата йъагIамгIвайсуаз акIвхарныс», - йхъа дтахъвыцитI Харазиа Вадим.

Арат акытква рбзазагIвчва йапхъахауата йддырбатI апсуа гербгьи, агимнгьи, абаракъгьи.

«ЙрымаджьащахъвахатI. АцIабырг схIвапIта ауаъа сылахь аквыта сгIайхтI. ХIара йщаквхIыргылтI ауат хIрынйарныс, рыхьызква ашвъа йанхIцIарныс, хIрабадырныс, апхъахьыла хIшрыцынхуш апшта амальква нахIахвырныс. ХIзыргвыргъьауа ари акIвпI – дара абзазагIвчвагьи джьгарта ауыс йалалтI, хIтгIачва (Трыквшта апны апсуа-абаза диаспора – аредакция ррытаразга) йгIарылалырныс гIартахъхатI», - йхIватI Харазиа Вадим.

Ауи датшагьи йгIацицIахтI арат агIвкыткI рбзазагIвчва йрыдынхалуа йшалагаз репатриация ауысла Апсны Республика аминистерствагьи. Уыжв ласыла адиаспора ауысхагIвчва нхара уысла ГIвадахь Ихсаанье йгьи Лагъь Ихсаанье рпны йцуштI.