АААК архъйагIв секретарь Гицба Инар нхара уысла Трыкв Республика даъан, ауаъа уыста йырхъйаз даквчважватI.
Барганджиа Саид
АААК архъйагIв секретарь Гицба Инар Трыкв Республика дъадзаныз Трыквшта акъалаква рпны Адуней апсуа-абаза конгресс ашта хъвшара советква быжьба йнадзауата йгIаншатI. Атрыкв къалаква Астомбыль, Инегёль, Измит, Эскишехир, Биледжик, Бурса гьи Сакарйа рпны йаныргIалу апсуа культура квтаква рунашвачпагIвчви йари анхара уысква йрылачважварныс йананйа асхъан акIвпI асоветква ангIанша.
Гицба йшихIвазла, анйараква йрылан Трыквшта йтабзазауа апсуа-абаза диаспора ргIащтийыгIвчвагьи.
«Сара йауацIыхта срыквчважвун АААК амурадкви ахачIвкви, адуней апсуа-абаза тгIачва ращтаныкъвара арыбагъьара знархару хIпланква, уагIахъа нархара зму апроектква абзазара ралажьра ауысла АААК ЙхIаракIу асовет аунашвачпагIв Эгьзакь Мусса йхъвдаквцIараква. Апсны, Россия рпны йахъазымкIва хIдиаспора ъатабзазауа МарагIайырта Аргваны акъральква рпынгьи АААК йакIвнаршауа анхара йауацIыхта хIалачважвун. ЦIолата хIрылачважвун Трыквшта апны а-Конгресс йылнахуа анхара планква», – йхIватI Гицба Инар.
Ауи йгIаликIгIатI анйараква йрылаз ауагIа ргвы цхIауата ауыс азыгIальамтра ду шгIадырбуз, ауи йаквшахIатхауата ашта хъвшара советква гIандыршатI.
Анйараква рымщтахь апсуа-абаза диаспора йгIарыцIанакIуа ауагIа а-Конгресс йалалырныс рылшун. Йара зынла анкетаква йыртагIвытI уагIа 70 раъара, йаъапI а-Конгресс асайт апны онлайн амальла АААК йшалалуала ахIвара швъа згIвызгьи. Анйараква анакIвшуз атрыкв къалаква рпны йаныргIалу апсуа культура квтаква рунашвачпагIвчвагьи йгIалыркIгIатI Трыквшта апны Адуней апсуа-абаза конгресс джьгарта йъанхауа магIны ду шазырбауа.
«ХIара йхIымапI акультура квтаква, апсуа культура квтаква рфедерация. ЙыгIдыритI а-Конгресс агIаныршара турыхта йаму, швабыж хIайгвыргъьитI а-Конгресс анхара ужвы Трыквшта апынгьи йъащаквгылыз. ЙыгIдыритI АААК ауысхартаква араъа йахъазымкIва Россия апынгьи, Мсыр (Египет) апынгьи, анахьанат акъральква рпынгьи йшаъу. Ауи хIайгвыргъьитI. ХIабадырра шIыцква йрылахIуштI, хIащтаныкъвуштI, хIуысква бзита йымгIвайсуаштI», – йхIватI Эскишехир къала апсуа культура квта аунашвачпагIв Ашуба Тургай.
Атрыкв къала Инегёль апсуа квта рахIба Сангулиа Селим йшгIаликIгIазла, апсуа-абаза этнос хачIв хъадата рпахь йгылу адкIыларапI.
«ХIара (апсуакви абазакви – аредакция ррытаразга) хIыздыруа зымгIвагьи гIахIайхIвапситI тшадхIкIылырныс хIъащту, тшъадхIкIылуа ахъазла, ауи лкIгIарата йхIымапI. УахьчIва анйарагьи адуней зымгIва йднарбуштI йатаркIвах хIара тшадхIкIылырныс шхIтахъу, ауи ахIатырла швабыж сшвзыразпI швунагIва швгIаркъвыцIта абари апш магIны ду зму ауысква ъашвырхъйауа», – йгIаликIгIатI Сангулиа.
Трыкв Республика нхара уысла данаъаз агIан АААК архъйагIв секретарь Гицба Инар Трыквшта апны Россия Федерация агенерал кIьыкIва (консул) Буравов Андрейгьи дйынйатI. Апсуа-абаза диаспора йадкIылата йъабзазауа акъральква рпны йаныргIалу Россия Федерация адипломат кIьыкIвараква рунашвачпагIвчва райкьангьашра цIас бзита йшщаквгылыз апшта йакIвшатI ари анйарагьи.
«Сара агенерал консул йауацIыхта дахасыргIвазатI Трыквшта апны АААК нхарата йакIвнаршауа, йгIалскIгIатI а-Конгресс апсуа-абаза абадырраква, ащтаныкъвара арыбагъьара йшащту, аэтнокультура абайара шгIанахчауа, анхара нархара хъадата йаму аспорт, азгIвадарахчара, атгIачви асабикви шракIву», – йхIватI Гицба Инар.
Ауат АААК адунейла анхара ауысла райчважвара нархара щарда гIацIанакIтI, Мсыр йгьи Иордания рпынгьи АААК нхарата йакIвнаршауа, ауаъагьи «Россия адипломат кIьыкIвараква рпны анйараква шакIвдыршаз» гIадрахатI.
Гицба Инар йшихIвазла, Россия Федерация агенконсул йрыбагъьатI Трыквшта апны Россия адипломат уысхагIвчва Адуней апсуа-абаза конгресс анхара йацыркIырныс йанакIвызлакIгьи йшхIазыру.
АААК архъйагIв секретарь Апсны йауата Трыквшта апны йапхьауа астудентквагьи дрынйатI. Ари анйара астудентква рбзазари рапхьари йырзынархата, азыгIальаматра алата йакIвшатI. АшIаква данрачважвуз Инар хъадата йгIаликIгIатI араъа йгIацIыргауа адырраква рпсадгьыл апны йыздгылуа анхара апны ргIарысабапхра магIны ду шаму.
«Астуденткви сари хIайчважвара гвхътIыла йакIвшатI, йаргьи ауаса акIвпI йаъазара шатахъу», – йгIацицIахтI Гицба Инар.
Ауи йпрограмма йалата Сакарйа къала апны йдыргылуа акультура квта атдзы апынгьи даъан (апхъала Адуней апсуа-абаза конгресс ЙхIаракIу асовет аунашвачпагIв Эгьзакь Мусса Сакарйа къала апсуа культура квта ауыхвара доллар жвыхвынзыкь алайцIатI – аредакция ррытаразга).
«Аквта атдзы ауыхвара йашымтапI. Акв аквцIара апны йнадзахьатI», – йхIватI Гицба.
АААК архъйагIв секретарь Гицба Инар Трыкв Республика апны нхара уысла октябрь а 5 йгIашIарышвта октябрь а 13 агIандза даъан. АААК апсуа-абаза диаспораква ъабзазауа акъральква рпны йапымшвтуата йцалитI. Ауаъа апсуа-абаза жвлараква йрынйитI, ауат а-Конгресс анхара, амурадкви ахачIви йрыхадыргIвазитI, ацынхара нархараква йрылачважвитI. Абгата йгIауахвырквын ари анхара а-Конгресс амурад хъадаква йрыуазакIу ауыс йазынархапI – адуней акъральква йыртабзазауа апсуа-абаза диаспораква йгIарыцIанакIуа ауагIа радкIылра.
швталра йа тшаншвцIара атахъыпI.