Адуней апсуа-абаза конгресс Айкьангьашырта клуб аъачIвагIагIвчва гIанарайгвауамца йапшым ауысква йырзынарху алачIваква акIвнаршитI. Йызкьазууыз алачIвара нархарата йаман «Абаза уагIа руагIахъа макъымква: йацы, уахьчIва, уачIвы».
«Абаза уагIа руагIахъа макъымква: йацы, уахьчIва, уачIвы» нархарата йызмаз Адуней апсуа-абаза конгресс Айкьангьашырта клуб алачIвара уатыкв айчважварата а-Конгресс апресс-квта апны ноябрь а 10 атшын йакIвшатI.
Экспертта ауи йалан амакъымршIыйагIв йгьи амакъымалацIагIв Агрба Тимури аэстрада ашвахIвагIв Кучубериа Ильди.
АААК Айкьангьашырта клуб аунашвахъцIагIв Зантариа Рустам ауатыкв айчважвара гIахъитIуата ауи амурад хъада гIаликIгIатI: абаза уагIа руагIахъа макъымква гIащаквыжьра йгьи тшауацIдрыхра.
«Псы зхъу закIыта йалуа, тшауацIызхуа йгьи тшызпсахуа абаза уагIа рмузыка гIащаквыжьра – уахьчIва хIалачIвара ззынарху уыс хъадапI. Азаман хIбзазара анахьанат ахъатаква рапшта амакъымршIыйарагьи псахра аланацIитI. ХачIв хъадатагьи йгIагылитI абаза уагIа рмакъым антахьгьыт йызларапшым агаща гIащаквыжьра», – йгIаликIгIатI ауи.
АмакъымршIыйагIв Агрба Тимур сквшщарда дызпщылу ауыс йгIайнатыз адырраква йайззаз йрыцагIвишатI. Ауи зымгIвагьи йырдыруа апхъанчIви макъымква абыжьгаща шIыц «ачгIвыча ршвицIитI». АршIыйагIв йшипхьадзауала, ауагIахъа музыка – абаза уагIа адуней анахьанат ауагIахъаква йызлагIарылркIгIауа закIыпI.
«АуагIахъа макъымква ауагIа рпсы рылапI. ХIара уахьчIва тшазыгIдырра атахъыпI музыка апны стилизация гIарысабап йшауаш, йара ауи атахъума, йгьатахъымма. ПроектквакI рыхъазла йа альбомкI ангIацIущтуа стилизация ауыс датшата уадгылитI. Ауаса ауи ауагIахъа рлакта йагIарбагата хIанаквчважвауа швабыж хIсакъуа хIадгылра атахъыпI. АуагIахъа рмакъымква хIанрыдынхалуа хъашвхIхвитра гIанхIыршата амаль гьамам», – йхIватI ауи.
АъачIвагIагIв ауагIахъа макъымква рпсахра датша хъатакIлагьи дадгылтI. Ауи дшхъвыцуала, ауыжвгIанчIвиква амакъымква ргвауырпхара ахIатырла азаман уацчIвырхъара атахъыпI.
«АгIвычIвгIвыс тшидыруа даналагара йгIашIарышвта йынцIра шабгу музыка йыц дгIабзазитI. Амакъымква «цкьата» абанпаракI абанпаракI йгIаршIыркIгIауамца йгIамгIвайсра атахъыпI. Ауаса ауат гвыбзыгъата урыдынхалырквын ауагIа рыцIагьи йыргвапхуштI», – йгIаликIгIатI ауи.
Аэстрада ашвахIвагIв Кучубериа Ильда сквшквакI цIитIта лара лстудия апны ашвахIвара йазылбжьитI. Ауи лбжьаматаква Апсны йапшым ашIыпIаква йрыуу цIайпI. Лынхарагьи амакъымршIыйара апны ауагIахъара гIащаквыжьрагьи йрыщата хъадата ашвахIвагIв йылпхьадзауа цри бызшва адырра акIвпI. Ильда йгIалылкIгIатI апсуа уарадква ауагIа ргвы амч, рбзазаща шгIадырбауа. Ауаса йанаъазара мгIан ду амапI йамгIаналалразлакI, концертызлакI, анкъвакъвразлакI апсуа ашваква рылазларныс.
«УахьчIва музыка апны модата йщаквгылазлакIгьи са кьангьаш гьазгIазгуам дзачIвапсыуазлакIгьи йгвы апсуа макъымква штггIауа. Ауи хIбзазара йузалымхуаш йахъвыпI», – лхIватI Ильда.
Айчважвара йалаз зымгIва ауагIахъа макъымква ауагIа йрылагара йацхърагIуш апроект шIыцква лыхра шатахъу гIалыркIгIатI.
РыцIа пасата апсуа-абаза уагIахъа ргвбайара тынха йазынарху АААКи «Алашара» жвлара адкIылари рпроект «Амазара» апкъ йтата апсуа уагIа рашваква йгIарыквчважвауа фильм хъырхтI. Абзазара йгIахъыху афильм «Апсуа ашва» ажвлара хабарргагаква рыхъаз сынчIва май а 16 агIан а-Конгресс ауысхарта апны йгIадырбатI.
швталра йа тшаншвцIара атахъыпI.