Апсны апны АААК ЙхIаракIу асовет аунашвачпагIв Эгьзакь Мусса йсогIакваква рыхъазла хвитта абакIрала Х Адуней анкъвакъвра алагатI.
Адуней апсуа-абаза конгресс ЙхIаракIу асовет аунашвачпагIв Эгьзакь Мусса йсогIакваква рыхъазла хвитта абакIрала йюбилейу Х Адуней турнир гIахъыртIытI Афон ШIыц апны асабша, декабрь а 10 атшын. Анкъвакъвраква «Абаза» спорт клуб 10 сквша ъахъыцIуа ахьызла йгьи Адуней апсуа-абаза конгресс асквш 30-и АААК VIII Айззарадуи йырзынарху ауысква йрыуата йакIвшитI.
Анкъвакъвра ангIахъыртIуаз йгIачважватI АААК ЙхIаракIу асовет аунашвачпагIв Эгьзакь Мусса, хвитта абакIрала Апсны йалакIу акоманда рбжьагIв хъада Бениа Джьарназ, Апсны Республика а-Олимп комитет апрезидент Аршба Валерий, чкIвыныргIи спорти руысквала Апсны АкъральыгIва комитет аспорт хъвшара аунашвачпагIв Зантариа Жанна.
Атурнир адгалагIвчва датшагьи йрыуапI «Абаза» клуб адиректор Боджгуа Леонид, хвитта абакIрала Европа йгьи СССР рчемпион Хутаба Раш йгьи «Абаза» клуб абжьагIвчва – Апсны апны пIатIу зкву спорт амастер Бениа Дзуки СССР аспорт амастер Берая Игори.
Алалра сасыта йалан Апсны ауацIа уысквала йаминистрыз Дзяпщба Леонид, Афон ШIыц къала аунашвахъцIарта ахъада Уатырба Темури ауи йтарагылыгIв Харабуа Беслани.
Анкъвакъвраква ргIахътIра «Адац» гIахIвчва гвып йгIадырбаз ауагIахъа гIахIвраквали Григолиа Инесса йылхIваз ашваквали йджвыквырцIатI.
Эгьзакь Мусса асасчви аспортсменкви сальам пха райхIвтI, анкъвакъвраква йрылазлуш дахIвра рымазларныс драйхIвахIвтI.
«УахьчIва хIара хIцри адгьыл апны хвитта абакIрала Х Адуней анкъвакъвра гIахъхIтIитI. Са ауи йалу спортсменипхьадза схъа йыладухитI. Швари хIари хIацыта уыжвгIанчIви Апсны атурых гIгIвитI, адуней спорт гIарбартаква рпны ауи атурасы щаквхIыргылитI. УахьчIва араъа айгвари ацзакIыри айгIайргIатI!» – дхIвахIвтI Эгьзакь Мусса.
Боджуа Леонид Эгьзакь Мусса йсогIакваква рыхъазла хвитта абакIрала Адуней анкъвакъвра йанакIвызлакIгьи Апсни России йапшым рыкъалаква йгIартыцIуа апрофессионалква шазнакIкIлауа, чкIвыныргIа рбзазара апны спорт гыларта багъьа шамазлуш йшазынхауа йхIватI.
Анкъвакъвраква ныбыжьта хгвыпкIта йшу абакIыгIв 130-гIв раъара рылапI. Гвыпипхьадза апны асортсменква рхIатларалагьи йахъццахпI.
Атурнир йапхъахуз амш анкъвакъврала йырчвын. Бениа Джьарназ йшихIвазла, аспортсменква зымгIва бзита йазыхIазырта, абакIра акъвльейраква йырзычпата тшгIадырбатI, ауи йгIалцIла асогIаква рыхъазла амакIра аквыргъвгъвазлуштI.
«УахьчIва араъа абакIра йазъазу ачкIвынчва гIайззатI, ауат Россия апынгьи, адуней апынгьи апхъагылара гIатызгахьаз рылапI. ЗымгIвагьи бзита тшгIадырбатI», – йгIаликIгIатI Бениа.
АААК ЙхIаракIу асовет аунашвачпагIв, ажвлара йгьи акъральыгIва уыснкъвгагIв, абзихагIв Эгьзакь Мусса йсогIакваква рыхъазла хвитта абакIрала Адуней анкъвакъвра ракIвыршара Апсны апны асквш 2011 йгIашIарышвта йцIасхатI. Ауи азаман ауацIа анкъвакъвраква России Апсни йрыуата спортсмен швкIыгIвпхьадзара гIарылалхьатI. Йюбилейу Х атурнир Къарча-Черкес, Къабард-Балкъар, Дагъстан, Краснодар, Швача йгьи Апсны акъалаква зымгIва йгIартыцIыз спортсмен 130-гIв раъара азнакIкIытI, ауат ныбыжьла хгвыпкIта, хIатларала 15 категориякIла йшапI. ЙайгIайыз рыхьызква декабрь а 11 агIан йакIвшуш афинал амцIасраква рымщтахь йыгIдыруаштI.
Адуней апсуа-абаза конгресс VIII Айззараду ахабар дыргауата йацынхитI: Апсны акъральыгIва телерадиуакомпания (АГТРК), «Абаза-ТВ» телеканал, Sputnik Апсны хабарргарта агентства.
швталра йа тшаншвцIара атахъыпI.