АААК агвчIагIвчпара акция «Агвы апхара» йгIвбахауа ахъвы акIвшауата агъын чгIвыча йгьи ащапхъацIа комплекткви ахъыза пхакви цхърагIара йазыбжу атгIачваква рсабиква йырзыршуштI.
Барганджиа Саид
АААК агвчIагIвчпара акция «Агвы апхара» атаджвыквцIахуата ашвахьа щымта, февраль а 4, Согъвым апорт йгIадгылтI агъын чгIвыча комплекткви ахъыза пхакви зныз ахъвыхI. АгвчIагIвчпара хIатлара зхъахIара мачIу Апсны абзазагIвчва йырзыршуштI.
Адуней апсуа-абаза конгресс архъйагIв секретарь Гицба Инар йшихIвазла, акция йгIвбахауа ахъвы акIвшауата Апсны йгIаргтI гъын чгIвычата комплект 1120, цIахьцIацIата – 1008 (аколготкаква, атлапад айшысква), гъын хъызата – 200.
«ЙахьчIва хIара йатаркIвах агвчIагIвчпара хIатлара гIахIадзатI, хIызту амыз ацIыхъвадза ауи агвынхIыргIвыта рыцIа паса йадыгIгалыз цхърагIара йазыбжу атгIачваква рашIыпхьадзара швъала йхIшуштI», – йхIватI архъйагIв секретарь.
АААК акция апкъ йтата Согъвым асаби реабилитация квта апны йаъу асабиква йрырттI чапхъацIа комплект 30.
АААК чкIвынргIа рсовет аунашвачпагIв Торчуа Леван йгIаликIгIатI арат йрапшу акцияква ракIвыршара амагIны шдуу.
«ГвасрапI, ауаса Апсны апны бжара ду зму атгIачваква швабыж йщардапI, йаъапI саби чгIвыча пха ъарымам ахъазла агъныла апхьарта йзымцауата, йалкIгIата акытква рпны. Ауат асабикви ранчва-рабачви шразхауа аныгIбара хIаргьи хIгвы йалахIитI», – араса йгвгIанаграква хIыцагIвишитI Торчуа Леван.
Асаби реабилитация квта аъачIвагIагIв Абухба Ирма йшгIалылкIгIазла, а-Конгресс атланыкъвала апхъалагьи йгIарайдзатI цхърагIара.
«Асабиква рыхъазла ари согIа дупI. Анчва-абачвагьи швабыж йразыпI йъархъмаштылуа, йъагIарцхърагIауа ахъазла. Ауат ащардагIв руыс зкву швабыж йгьмайрам», – йгIалылкIгIатI Ирма.
АААК агвчIагIвчпара акция йапхъахауа ахъвы Асквш шIыц агIаталымта йджвыквылтI, ауи агIан апроект йгIацIанакIуа атгIачваква жвабапхьадзара йнадзауата гвчIагIвчпара цхърагIара ддрадзатI. АщапIхъацIа шIыцква акция адгалагIвчва йдрыхIазырыз ашIыпхьадзара швъаквала цхърагIара йазыбжу атгIачваква йырзыршатI. Ауат рыхьызква ашIыпхьадзата йызну ашвъаква ацдрыхIазыртI АААК, «Алашара» адкIылара, Трыквшта апсыуа культура квтаква рфедерация, репатриация ауысла Апсны Республика аминистерства, анхара, анхара адкIылазлара йгьи ажвлара адгалра рминистерства арайон хъвшараква, «Киараз» адкIылара йгьи Аджьуар къапщы.
Апхъала, асквш 2018 сентябрь мыз агIан, Трыквшта йтабзазауа хIабашталагIвчва йадыркIылын Апсны абзазагIвчва йырзыгIарщтитI хъацIа йгьи пхIвыс чгIвычата комплект 1200.
швталра йа тшаншвцIара атахъыпI.