Апсны апны агвчIагIвчпара акция «Агвы апхара» йапхъахауа ахъвы акIвшауата цхърагIара йазыбжу абзазагIвчва гъын щапхъацIа рзыршатI.
Барганджиа Саид
АгвчIагIвчпара акция «Агвы апхара» джвыквылуата Апсны апны апроект йгIацIанакIуа абзазагIвчва цхъарагIара ддрайдзуштI. ЦхърагIара йазыбжата зыхьызква гIадрыбергьльыз атгIачваква щапхъацIа шIыц рзыршатI. АшIыпхьадзара швъаква зрыхIазырыз акция адгалагIвчва ракIвпI – АААК, «Алашара» адкIылара йгьи Трыквшта апсыуа культура квтаква рфедерация.
АААК архъйагIв секретарь Гицба Инар йшгIайхIвазла, ащапхъацIаква ршара акция йаланакIуа йапхъахауа чIвырхъапI. ЙащтагIайуата йгIаргуаштI гъын чгIвыча пха: акурткаква, асвитерква, ашашыхвква.
«ХIыззпшуа йгIванхауата йгIаргуаш ацхърагIара хIатлара ангIадзара гъын щапIхъацIа ззыршаз атгIачваква зымгIва ажва аламкIва анахьанат ачгIвыча пхаквагьи рзыргахуаштI», – йхIватI Инар.
Ауи йшгIацицIахызла, атгIачваква швабыж пхата йгIарпылитI адгалагIвчва.
«ЙалкIгIата Асквш шIыц агIаталымта ауагIа ари ауыс гвыргъьахъв гвщтIыхрала йарчвитI. ЦIабыргыта, ауат йхIшауа ачгIвычаква швабыж йырзыбжу тгIачвапI», – йхIватI а-Конгресс архъйагIв секретарь.
ЦхърагIара зайдзаз Какалия Асмат хвгIвы сабичва дранпI. Ауи адгалагIвчва зымгIвагьи дшырзыразу лхIватI, йгIалылкIгIатI лтгIачва швабыж йшрыгхуз арат рапш щапхъацIа, асогIаква зымгIва шшIыцугьи гIацылцIахтI.
Асквш шIыц йадахIвуа согIата йгIаргыз ащапхъацIаква йалкIгIата драйгвыргъьатI афутболасыгIв шIа Гиробелидзе Дамир.
«Анчва дшвзыразхатI. Швабыж йхIгвапапI», – йхIватI ачкIвын.
АгвчIагIвчпара акция «Агвы апхара» йаланакIуата йыршарныс рмурадпI зымгIва шалу чгIвыча йгьи щапIхъацIа комплектта 1060 райхIа. Акция адыргалитI Адуней апсуа-абаза конгресс, Трыквшта апсыуа культура квтаква рфедерация йгьи «Алашара» адкIылара.
Трыкв Республика апсыуа-абаза диаспора ари апш цхърагIара апхъалагьи йадыргалхьатI. Асквш 2018 сентябрь мыз агIан Трыквшта йауу хIабашталагIвчва йазыркIкIын Апсны атгIачваква йырзыгIартитI чгIвыча комплект 1200 раъара.
швталра йа тшаншвцIара атахъыпI.