АААК ЙхIаракIу асовет аунашвачпагIв хачIвы шйыргылыз апшта КъЧР апны Дискуссия клуб гIандыршуштI.
Барганджиа Саид
АААК ЙхIаракIу асовет аунашвачпагIв йгIайыргылыз ахачIвы апкъ йтата Адуней апсуа-абаза конгресс Апсны апны йынхауа апш Дискуссия клуб Къарча-Черкес апынгьи йгIаннаршуштI.
Ари айкьангьашырта йгврыхву ачкIвынчви ахIвсси аднакIылта абаза уагIагьи Къарча-Черкес Республикагьи ртшауацIыхра йазынарху ауысква рлыхра йшазынхуш йацхърагIуштI.
А-Дискуссия клуб йалакву йызлачважвуш дара-дара йгIалырхуаштI, адгалагIвчва ауат ауысква здыруа аъачIвагIагIвчва гIадрайгвалуштI. АъачIвагIагIвчва аклуб апны йгIащтIырхуа ауысква гIазлыцIуа рхIвуштI, хачIвыта йгылу уырхъйа йшауаш алыхра йацхърагIуштI. Йапхъахауа ахъвы – аквчважвараква – аналгара апроектква лырхта АААК аунашвачпагIв йдырбуштI – дадгылуазтын грантла дшгIацхърагIуш апшта.
АААК ауысхарта унашва ахъызцIауа Таниа Кан а-Дискуссия клуб шгIаншази анхащи дгIарыквчважватI. Ауи гIазлыцIыз АААК агвып рпахь йгылаз ахачIвы акIвпI: «апсуа-абаза уагIахъа рыбызшва, ргвбайара, ртурых, рцIасква хчара йгьи тшауацIдрыхра ахъазла Эгьзакь Мусса йгIауищтуа агрантква рыцIа къвльейта йшгIарысабапхуш апшта анхара гIаршIыцра».
«ХIара хIазхъвыцтI: ауыс архъйара чкIвыныргIагьи аъачIвагIагIвчвагьи гIаланауыркI йшпауаш? Абарауаса Дискуссия клуб агIаныршара хIазгIайтI. Ауыс хIшапшуа Мусса ХIабальа йпа йанйахIхIв тIакIвгьи хIгIайрытамамын дадгылтI, абар ужвы Согъвым апны цри бызшва атшауацIыхра, апсабара ахчара, ани асабии рзгIвадара йырзынарху апроектква дырхъйауа йалагахьатI», – йхIватI Таниа.
Аклуб апны анйараква гIвымчыбжьа рпны зны ацкIыс ймачIымкIва йакIвшалуштI. Агрантква ргIатгара йахъазымкIва аклуб анхара датша нархараквакIгьи амазлуштI, «Ан-абачва рклубгьи» нхуштI, ауаъа анчви абачви рыхъазла йапшым алекциякви атшыбжьаракви акIвшалуштI.
КъЧР апны а-Дискуссия клуб йапхъахауа агвып йрыларжьуаш ауагIа рпхьадзара ахъарысызлуштI, ауи йгIалцIла адгалагIвчва ахIвитI аклуб йалалырныс зтахъу зымгIва анкета таргIвыта ауаъа йану аэлектрон адресла йа асоциал сетьквала йгIарщтийырныс, йа Черкесск апны «Алашара» адкIылара ауысхарта йнаргылырныс (Эгьзакь Мусса «Алашара» жвлара адкIыларагьи дапрезидентпI – аредакция ррытаразга).
Апсны апны Дискуссия клуб асквш 2019 ноябрь агIан йгIахъыртIытI. Ауи анхара йапшым анархараквала йакIвнаршитI: абаза уагIа рыбызшва, ргвбайара тынха гIащаквыжьра, ауагIахъа наука ажвлара йрылагара, апсабара хчара, датшагьи. Аклуб йалакву райхIарагIв шIапI. Асквшква 2019-2020 руацIа Согъвым аклуб экология нархара йадынхалуан. Ауи ахъвшара анхара 23-гIв гIаланакIтI. А-Дискуссия клуб апны «Ан-абачва рклубгьи» нхитI, ауаъагьи щардагIвы йыргвапхауата йгIадгыллитI.
швталра йа тшаншвцIара атахъыпI.