АААК йаланакIуа Ан-абачва рклуб йапхъахуз анйара сабап ду алата йакIвнаршатI, асаби психологква ракIвын спикер хъадата ауи йалаз.
Барганджиа Саид
АААК йаланакIуа Ан-абачва рклуб сабап ду алата йапхъахуз анйара акIвнаршатI, ауи йасасын асаби психология ауысла йхъаду апсуа ъачIвагIагIвчва Кайтан Заири Ходжа Руслани.
АААК йаланакIуа а-Дискуссия клуб аунашвачпагIв Турава Ирина йшгIалылкIгIазла, ан-абачва гIальаматра ду азырбатI асаби психологква рынйара, ауи ахIатырла уахьчIвала багъьата йхIзыхIвуштI – Ан-абачва рклуб дахIврала абзазара йалалуа проектпI. ЙгIашвхIыргвалашвахпI, Ан-абачва рклуб АААК йаланакIуа а-Дискуссия клуб йазалхта йгIандыршаз проектпI. Аныгьи арыгьи сынчIва ноябрь мыз агIан рынхара джвыквырцIатI.
«Анчва а-Клуб гIальаматра ду шазрыму гIбитI, хIгвыгъитI апхъахьыла абачвагьи ауи йхIызгIадкIылырныс. УахьчIвала йгIахIрысабапуа апещ уагIа 25-гIв гIвнашвазтIхIва йгьхIызхъум. Ауаса ауи бзипI, йшпакIву ухIварыквын ан-абачва рквтала йгIащтIыхIхуа атемаква ауат гIальаматрата йазрыму ари аъара йдухапIхIва хIгьымгвыгъузтI. Апроект шIаркIвапI. Ари анйара шпычIвызгьи сасчвата йгIадгылыз 20-гIвы йрайхIан, апхъахьыла, Ан-абачва рклуб ахабар рыцIагьи йауацIыхта ауагIа йанрылалра, ауи йгIалалуа ауагIагьи йшрылахIуш гвынгIвырапI», – араса дхъвыцитI Турава.
Ан-абачва рклуб аунашвачпагIв Квициниа Кама йшылхIвазла, анйара сахIаткI айхIа йшакIвшазгьи ауи йалаз заман гьырзымхъатI: йаналгагьи йамцIыцIхырныс ргвы гьамуазтI.
«Ан-абачва апхъахьылагьи араъа йгIайларныс ргвыгъапI. Йапшым апроектква гIаларгитI, анйараква квпшыра шIыц рымата йаъазларныс ртахъыпI, ауатква зымгIвагьи гвышхвара гIахIыларцIитI», – лхIватI Квициниа.
Асаби психолог Кайтан Заира йшылпхьадзауала, Ан-абачва рклуб ауатыкв асабапра шIырпшыра гьамам, араъа уахьчIвала магIны зму тема щарда гIащтIых йауаштI.
«Ан-абачва араса уанрынйауа апсихология ауысла дырра ъарауагьи сабап гIалцIитI, кьангьашратагьи йырзалитI. Запыт ауатыкв йгIаталитI йалыргара атахъу абаргвыраква, ауат руыслагьи йара араъа зынла хIайкьангьашитI. РыцIа щарда йыззцIгIуз ауысква йрыуан асабиква ракъыль атшауацIнарыхра», – анйара ауысла лгвгIанаграква хIыцагIвылшитI Кайтан.
Анйара йалаз хгIвысабичва ран Квициниа Нара йшгIалылкIгIазла, Ан-абачва рклуб магIны зму уыс щарда урылачважварныс амаль гIанзыршаз проектпI.
Аклуб алачIвара шабгу АААК YouTube канал апны швапшы йауаштI>>
«Сара заджвыла шIыцра щарда здыртI. Асабиква рбжьара сшадгылуаш ауысла, ауат ртахъыраква руысла щарда гIасгвынгIвытI. СгвыгъитI анйараква йапымшвтуата йакIвшаларныс. ХIызлачважварныс стахъу уыс щарда аъаркIвапI», – лхIватI ауи.
Апсихолог Ходжаа Руслан Ан-абачва рклуб агIаджвыквцIараква зымгIва йрыцикIырныс дшхIазыру йхIватI. Ауи ажванахъа гIайгтI ан-абачвагьи асабиквагьи алата анйара адыргалырныс йгьи йгIаликIгIатI «ауаъа асабиква рщагаща рхъвых йшауаш».
«Ари апроект гIахъвыцра бзидздзапI, ауи апхъахьылагьи тшауацIнарыхра атахъыпI. Асабиква ракIвпI хIуачIвбзазара апны хIзайгвыгъауа, ауи ахIатырла психология дыррала йрыбагъьу ргIадзныргылра магIны ду амапI, ан-абачва ауат адырраква рымазара атахъыпI. Йаргьи ауи апш лшара а-Клуб йгIаннаршитI», – йхIватI Ходжаа.
Ан-абачва рклуб апны йаъаз датшагьи аныкI, Барчан Инна, йшылхIвазла, кьангьаш аламкIва а-Клуб апны апхъахьыла йакIвшауа анйараквагьи дгIарылалуаштI.
«Ан-абачва рклуб агIахъвыцра хIыжвлара рыхъазла сабапра ду алапI. Аклуб абзирала ан-абачва рхъвыцраква агIвыршалуштI, ауысква йацрылачважвуштI, ауат рырхъйара ауысла амаль йацырзыпшгIуштI. ЙахьчIва йакIвшаз анйара швабыж йджьащахъван, аспикерквагьи гIвычIвгIвыс гIальаматын. АзцIгIараква щардапI, ауи ахIатырла а-Клуб йалаквуи аъачIвагIагIвчви аргваныта йацынхарквын рыцIа йбзихушшва йызбитI», – лхIватI апхIвыс.
Адуней апсуа-абаза конгресс йаланакIуа а-Дискуссия клуб йазалху проектта йгIаннаршатI Ан-абачва рклуб. Ауи анхара ноябрь а 30 атшын йджвыквылтI. Ан-абачва рклуб йалалырныс рылшитI анчва, абачва зымгIвагьи. АдгалагIвчва йшырпхьадзауала, ауи ауысла йхъаду «азыгIальаматри, атахъыри» ракIвпI.
швталра йа тшаншвцIара атахъыпI.