Апсуа режиссер дангIадрийыз амш йадахIвуата АААК хабарргарала ахъвшара ауи йбзазари йыршIыйари йгIарыквчважвауа гIвыра арыхIазыртI.
Апсуа режиссер, Апсны ауагIа рартист, асценарист, Россия акинематографистква РадкIылара йалу, «Абхазфильм» киностудия адиректор – арат зымгIва апсуа кинематограф агIаджвыквцIара ахъа йгылаз Аблотиа Вячеслав йызлайыпхьауа хьзыпI.
Вячеслав Андрей йпа Апсны АССР, Гвдауыта къала апны Абашта айсра Ду йанашымтаз асквш 1942 агIан дгIадритI. Йаба Гвдауыта ачIахъварыдзырта завод дадиректорын, йан рунагIва нкъвылгун, асабиква лыгIзун. АршIыйара ауи дшчкIвыныркIваз дхънахуа далагатI. Аблотиа ашва йхIварныс, дгIахIвырныс бзи йбун, датша ршIыйарагьи тшапищылуан. Араъа ауи йгIайыхъвун йан лбжьаща.
«Уахъынла хIпны тшазхIкIкIуанта ахъазыкI уарад хIхIвун. Бзи йыгIбун акино хIцарнысгьи. ЙыздырхитI Гвдауыта акиногIарбарта, хIакъвара зквпIлаз аквчIвартакви айсра йгIаквчважвуз афильмкви. ХIара хIыхъаз ауи йжьагу закI акIвын».
Ауаса ауатква зымгIва йара Вячеслав Андрей йпагьи ауи йаргванквагьи магIын дукI гьырзырымбузтI. Айсра амщтахь щардагIвы алетчик, атенгьыз апны къвырльыкъв зхауа афицар ръачIвагIаква йхъырхуан. З-Псадгьыл ртшхъварала ахьыз зыргарныс зтахъыз дрыуан йшIаркIваз Вячеславгьи. Йаргьи ауи гIайыдахIвтI. ЦIабыргыта, ауи ъайылшаз ар апны гьакIвым – кинематограф апны акIвпI. Аблотиа дрежиссерхатI.
Йпщбахуз акласс дангIалга ауи йани йаби Гагра алицей-интернат дрырттI. Ауи згIалырхыз ауаъа аъадаб ъамчыз, бзитагьи йъадрыпхьуз акIвын.
«Ауаъа бзийын, швабыж йбзийын. ЙыздырхитI хIзыгIвнабзазуз йдучвамыз абаракква. ЙыздырхитI хIбжьагIвчви ауат шхIзаъази».
Пхата акIвпI йшгIайгвалашвахуа ауи аинтернат данапхьуз асквшква. Абарауи агIан акIвпI ауи йгвабызта йгьи джьгарта азъазара тшанадикIыл. АпхьагIвчва йапшым анархараква рзыхътIын. Вячеслав апхьарта аоркестр дрылан.
Апхьарта дангIалга гIвысквши бжакIи ар апны къвырльыкъв йхатI. Ауи амщтахь акIвпI Тбилиси атеатр институт актер факультет даныцIал.
«ХIара хIгвып «Станиславский йтынхаква»-хIва ахьхIцIатI. ХIызбжьуз рыуа азаджв – Тавзоришвили Анзор – Ленинград апны йбергьльу арежиссер Сушкевич Борис йпны дапхьатI, йара Сушкевич йарыпхьагIвыз Станиславский Константин йакIвын. Ауи йгIахъыхIхын Станиславский йпа йпа хIипахта тшыгIбун, йаргьи ауаса йгIахIхъхалтI».
АршIыйара нхара Апсуа театр апны йджвыквицIатI, ауаъа ауи ауниверситет дангIалга асквш 1968 агIан дгIайтI. Ауаса Слава атеатр йахъазымкIва датшагьи уыс щарда тшырпищылуан. КIарт хъихуан, ауи йкIартхъыхга йгIанакIуан атеатр артистква, ауат асцена ащтахьла рбзазара, адекорацияква. Дырзычпан ауи амшIгьи, электрикагьи. ЙгIайгвалашвахитI йыцынхаквуз закI анпыртшрыз йырзичпахырныс йшгIайыдгылуаз.
«Слава, уыскI бзита йуырдыр, анахьанат ауысква зымгIвагьи мачIкI-мачIкI рылудыргIауата уаъазтI», – арежиссер дайсыгIв шIата ар апны йрота йаунашвачпагIвыз йгIайайхIвыз арат ажваква анцIрала йгвникIылтI.
Актер нхара хIазгIайхуата йхIхIвапI ауи атурасы хъадаква бзи йшйымбуз. Ауатлагьи дгIахъвмарлун, ауаса зын-гIванкI ахIа ауатыкв йгIатамылуаз, лкIгIаракI змаз, апшыгIвчва ргвы йгIатахуз аперсонажква рыцIа йгIалихуан. Атеатр апны ауи йуысква ласыта йхъалуан. Пачалиа Шарах йунашва дацIата ауи дызцынхуз Таниа Амиран, СакIаниа Сергей, Зыхвба Мажар дрыцта алакъырдри амшыркъвари ртеатр «Чарирама» гIандыршатI. Артистква йхъыччахъваз рыргылчIвква гIадырбауа акъраль йахъыкIвшун, рыцIа-рыцIа рыхьыз гун, ауагIа бзи йырбун. Аблотиа йнапIы зхьысуаз зымгIва йызтлапIан, ауаса адырра шIыцква, дхъызхуаз ауысква дгьдмыртынчуазтI.
Абарауаса йалйыргатI Вячеслав Андрей йпа жвасквша гIазцIазкIыз атеатр апны йынхара. Ауи Апсуа театр дгIарылцIхтI, ахIагIара шIыцква дырзынадзара йтахъыта Москва дцан арежиссерква йхIаракIу ркурсква дрыцIалтI. Йгвапата йгIайгвалашвахитI ауи ауаъа дшыцIалыз, дшапхьуз, дазрыпхьуз, дызцапхьуз.
Анкъвакъвра Совет Союз шабгу йауата 170-гIвы алан. Агвыпква йрунашвачпагIвчвахушыз Рязанов Эльдар, Михалков Никита, Данелиа Георгий йыцIалквауа зырхъвыхуаз акомиссия йрыланта акомедиографква гIарылырхуан. Архъвыхра йызкIылсыз 12-гIв ракIвпI.
«Архъвыхра апны ауат йырхIватI 79-хуз асквш агIан Грузия хIгIарылцIхта Россия хIрылалырныс тшгIащтIыхракI шхIылаз. Ауи ауысла йзырхъыччуш закI расхIвырныс хачIвыта йгIасыздыргылтI. Сара схъвыцтI-схъвыцын – схъа йгIаташвахтI. Ари апш гIаншаракI аъан. АуагIа Россия йшрыларцIуш алозунгква рымата аплощадь апны ацIх шабгаз йчIван. ЛыгажвкI ачва днанауахвын, дангIашIыхах араса йхIватI: «РачвакI йхьшвашвахатI – хIнарахвхьама?» Акомиссия йчIвакваз йхъыччауамца йагIвкъьахуан, зымгIва щтIалтI», – йгIайгвалашвахитI Аблотиа.
Абарауаса Вячеслав Андрей йпа архъвыхраква дахIврала дыркIылсын Данелиа Георгий дызхъпшылуаз агвып дрылашватI.
Данелиа Георгий, Рязанов Эльдар, Михалков Никита, Тарковский Андрей,
Евстигнеев Евгений, Трауберг Леонид датшагьи совет кинематограф апны пIатIу зквыз аршIыйагIвчва астудентква адрыпхьун. Алекцияква джьащахъван, йазалхта аъачIвагIа йазынархан. Астудентква згIачважваща ргвапхуз гIазшIырт, йрымгвапхуз рымуырныс йахвитын.
«ХIара закIы-гIвба лекция гIалхIхуан. АжвапIта, Чухрай Павел гIван дхIызнайтI. Ауи амщтахь дгьхIымаджьащахъвахмызтI. Ауаса Тарковский мызкIы дгьаухIымщтхуазтI. Ауи дгIвычIвгIвыс дупI».
Москва апны йбзийыз йстудент гIамта аналга Аблотиа Грузия дцан ауаъа йара-йара кино хъыйхуа далагатI. Асквш 1989-дза «Грузия-фильм» киностудия апны дынхатI. Ауаъа акIвпI Вячеслав Андрей йпа асквш 1986 агIан апсуа бызшвала йапхъахуз афильм «Сувенир» ъахъихыз. Афильм сценарий азыйыгIвтI арежиссер йыгIвза Зантариа Дауыр.
Ауи агIамта аквырджькви апсуакви разазаъащаква рыцIа-рыцIа йаквыргъвгъварахун, апшIагылра мчы йазцун. Тбилиси ауи ахIа дгIатахарныс йтахъымкIва ауи йтгIачвагьи йыцта СогIвым дгIайхтI.
Вячеслав йуыс гьныймыжьтI, йаргьи Апсны ахъаз азаман анбаргвыз культурала а-Министерства йаланакIуата йапхъахуз апсуа киностудия гIандмыршакIва дгьашIамстI.
«Абхаз-фильм» киностудия аштат хвыгIв ракIвын йнадзуз – суратчпагIвчваквакI, бухгалтер йгьи машинанкъвцагIв. Астудия йапхъахуз йадахIврата кьангьашра аламкIва йупхьадзушта йаъапI афильм «Колчерукий» («ЗнапIыкI айшысу»). Ауи хъырхра ахъазла «Абхаз-фильм» анхагIвчва Санкт-Петербург йцатI. Ауаъа ауат кино хъызхуа агвып йрангIалын Апсны йгIаргтI. Ахъыхраква 92-хуз асквш йбергьльу агIаншараква гIаламгаскIва йрылгатI, ауаса ауи амщтахьгьи абыжьква Санкт-Петербург апны йанырцIун, пычIвта акино ъагIадырбазгьи ауаъа акIвпI. Апсны апны айсра гIалагахьан.
«Ленфильм» анхагIвчва швабыж йгIахIцхърагIатI. Ахча гьхIзымхъузтI. Азаджв ахчала дгIахIцхърагIун, азаджв – хIапчыпла».
ТшытракI анцIы Аблотиа дызцынхуз йгвыпгьи йыцта Санкт-Петербург дгIатыцIхын Швача дцатI. Ауи агIан ауаъа Апсныла йгIахъыргуз артыгIвчви ахвчви йырцхърагIуз штаб гIандыршахьан.
«ХIара уахъгьи тшынгьи хIчIапщун. Ачба Лиана дхIыцта апорт апны йырхвызи йырщызи хIырпыралуан, айъазара йазыбжаз ачымазагIвтараква йхIщтиуан, йырщыз ртгIачваква йырзыгIгахуан».
Ймайрамыз ауи азаман агIан «ЗнапIыкI айшысу» фильм гIванхауата Швача апны йгIадырбатI.
«Швача апны апремьера апхъала ауахъ хабарргага дукI хIрыхIазыртI. Щымта ауи шпыркъыз гвы ахIттI. АцIарсыгьыгIвкI йчпата гIацIцIуаштI. Ауаса апремьера акIвшатI. Афильм Апсны йгIатыцIыз артыгIвчва зымгIва йдхIырбатI. ЗымгIвагьи ауи ргвапхатI».
Гагра гIадырхвитхгIвацата Апсны йангIайх Гвдауыта апынгьи апремьера адыргалтI.
«Швыла йгIацIажвжьстI: айсра акIвшитI, ауагIа джьабитI – хIара Апсны комедия гIагIгтI. Ажва гьалам, сара ауагIа ауи ажанр штшазырчпуш сахъгвыргIвун. Ауаса зымгIва бзидздзата йакIвшатI, апшыгIвчва хъыччун. Йалныс ауыпI ауат афильм абзирала ргвмачIра тIакIв тшгIалыржвата».
Вячеслав Андрей йпа зметраж абгу фильмта гIвба ракIвпI йхъихыз – «Сувенир» йгьи «ЗнапIыкI айшысу». Анахьанат йынхараква зымгIва «зметраж айшысу» кинопI.
Айсра амщтахь арежиссер рыцIа тшыззынайырхаз атакIрапI. Ауи йашвхIаусыгIвахаз щардапI. Ауаса йхъадаз астудия абюджет ъамачIыз, ахъатачIв фондквала ахчакIгьи ъагIамиуаз, ахчадъа кино ъауызхъымхуаз акIвпI.
Йбаргвыз аъащаква арежиссер йыршIыйара апны агIамта шIыц гIадрыцIстI. Ауи афильмкви амультфильмкви атайкIуа далагатI. ЙхIвара атахъыпI ари анархара апынгьи Аблотиа щарда шгIайдахIвыз, Апсны апны ауи йакIвпI агIвымакъраль киноква йцри апсуа бызшвала йатазкIуа йалагаз ъачIвагIагIвта йалыз. УахьчIвала ауи йатайкIыз амультфильмква рпхьадзара бзидздза йнадзитI. Ауи йащтагIайтI афильмква рыдынхалра.
Ауи анхара гватшныта уадгылра атахъыпI, ауи заман щарда уыквнахитI. Зметраж абгу фильмкI атакIра сквшбжакI агитI, йхIвитI Вячеслав Андрей йпа.
«Дубляж апны рахIа йбаргву йырхIвауа атекст адынхалра акIвпI. Ажваква йызхIвауа йпыквква шичпауа йаквшвара атахъыпI. Ауи гIауыдахIвра ахъазла улымхIа амакъымршIыйагIвчва рапш йцIаразара атахъыпI. Ажва ахъазла, аперсонаж «А» йхIвузтын – йатаукIыз ажваквагьи «А»-ла йалгара атахъыпI. Турасыпхьадзагьи схъатала сапшитIта абыжькви артикуляции сырхъвыхитI».
АршIыйара йачIву Вячеслав Андрей йпа йтгIачва ацIаскви азъазара йазрыму абзибари тшгьырпсахуам. Йхъапщыла Марина – атеатр апны дактрисапI, йпхIа Анна атакIраква рпны дгIайцхърагIитI, йпа Сандро дрежиссер шIапI, апсуа пшыгIвчва агвацчпа киноква «АйцакIра», «МаскIа шкIвокIва», «Уыд» дйырбахьатI.
Апхъахьыла апсуа кинематограф йапхыцIахуш ауысла Вячеслав Андрей йпа араса йхIвитI:
«Ажва гьалам, ауи уачIвымш амазлуштI. ЙаъапI Анчва йхъвыкI злу ачкIвынчва шIаква, ауат нхитI, йабгу, йайшысу метр ахъырхитI, адуней кинофестивальква йрылалитI, асогIаква гIатыргитI – ауатква швабыж удыргвыргъьитI. Са сашIамсуа йсхIвитI: швгIай, закI хIырчIаджьпIта киногIарбартакI гIахъхIтIыпI. Ауи апсуа фильм йакинотеатрхаргIатI. Швыла йгIацIажвжьстI – ансимшы апсуа киноква уырпшырныс, асабиква хвыдъа йдуырбарныс, аэкранла апсуа бызшва угIарныс лшара уымазларныс йамагIну. Ажва гьалам, ауи ахча щарда алацIара атахъыпI, ауаса йхъаду – ауи злахIцIауа хIуачIвымш акIвпI».
швталра йа тшаншвцIара атахъыпI.