Аҧсуа режиссер имшира инақәыршәаны, АААК аинформациатә ҟәша иазнархиеит уи иҧсҭазаареи ирҿиареи ирызку аматериал.
Аҧсуа режиссер, Аҧсны зҽаҧсазтәыз артист, Урыстәыла акинематографистцәа реидгыла алахәҩы, аконостудиа «Аҧсуафильм» аиҳабы - абарҭқәа зегьы зыхҳәаау, аҧсуа кинематограф ахыҵхырҭаҿы игылоу Виачеслав Аблоҭиа иоуп.
Виачеслав Андреи-иҧа диит 1942 шықәсазы, Аҧснытәи АССР ақалақь Гәдоуҭа, Аџьынџьтәылатә Еибашьра Ду анцоз аамҭазы. Виачеслав иаб аус иуан Гәдоуҭатәи ачаӡырҭа аиҳабыс, иан – аҩны аныҟәгареи ахәыҷқәа рааӡареи лнапы алакын. Виачеслав хәыҷаахыс аҟазара дазҿлымҳан. Еиуеиҧшым аамҭақәа рзы, инапы алакын ашәаҳәара, акәашара уҳәа егьырҭ аҟазаратә хырхарҭақәа. Уи зегьы иацхраауан иан лааӡашьа.
«Хәылбыҽхала аҩны ҳаизаны, ҭаацәашәала ашәақәа ҳҳәон. Бзиа иаҳбон акино ахь аныҟәара. Исгәалашәоит, Гәдоуҭатәи акинозал, абӷанҷ зықәҧсаз аҟәардәқәа, аибашьратә фильмқәа. Ҳара ҳзы усҟан уи иллиузиа дуун».
Иага ус иҟазаргьы, хаҭала Виачеслав Андреи-иҧеи уи иуацәеи арҭ азҿлымҳарақәа ҧхьаҟа акы рылҵуеит ҳәа иҟамызт. Аибашьрашьҭахьтәи аамҭазы, ауаа бзиа еицырбоз занааҭқәас иҧхьаӡан аҧырреи амшынтә офицарреи. Виачеслав хәыҷгьы иҭахын иҧсадгьыл ахьӡ-аҧша иацызҵаша иакәны дҟалар.
Убас иагьыҟеиҵеит иара. Аха Аҧсадгьыл аҿаҧхьа иџьабаақәа зыдҳәалахаз арратә занааҭ акәымхеит, иӡбахә ауаа ираҳаит акинематограф ала. Аблоҭиа дрежиссерхеит.
Аҷкәын аҧшьбатәи акласс даналга ашьҭахь, иҭаацәа Гагратәи алицеи-интернат дҭарҵеит, избанзар уаҟа ашколтә леишәеи аҵареи рыҩаӡара ҳаракын.
«Уаҟа ибзиан, даара ибзиан. Исгәалашәоит абаракқәа – рацәак идумыз аҩнқәа. Ҳара уаҟа ҳанхон. Исгәалашәоит цәгьала иҳаиҷаҳауаз ааӡаҩцәа».
Ажәа ҟәанда мацаралоуп арежиссер ишигәалашәо аинтернат аҿы иҵара. Убри инаркны ауп Виачеслав аҟазаратә мҩа дшанылазгьы. Ашколхәыҷқәа ирыдыргалеит еиуеиҧшым аҟазаратә хырхарҭақәа.
Виачеслав дыхәмаруан ашколтә амузыкатә оркестр аҿы. Ашколтә ҵара ашьҭахь, ҩышықәсеи бжаки арратә маҵзура ихигон. Анаҩс, дҭалоит Қарҭтәи атеатртә институт актертә факультет. Ҳара ҳгәыҧ хьӡыс иаҳҭеит «Станиславски ихылҵ».
Абарҭқәа зегьы зыхҟьаз ҳҟазацәа руаӡәк – Анзор Тавзорошвили – еицырдыруа арежиссер Борис Сушкевич иҿы Ленинград аҵара ахьиҵоз ауп. Сушкевич ихаҭа Константин Станиславски диааӡамҭан. Убри аҭагылазаашьоуп ҳгәыҧ ахьӡгьы зыхҟьаз».
Аспециалист қәыҧш иҟазаратә мҩа алагеит ауниверситет ашьҭахь, 1968 шықәсазы аусура дахьалагаз Аҧсуа театр аҿы. Ганрацәала аҿиара змаз Виачеслав дзызҿлымҳаз рацәан. Атеатр аҿы иусура анаҩсангьы, актиор қәыҧш афотоҭыхра инапы алакын. Уи иобиектив иҭнахуан атеатр артистцәа, акулисақәа рашьҭахь, адекорациақәа.
Виачеслав Андреи-иҧа илшарақәа рхы аадырҧшит амҿыуасҭараҿгьы. Арежиссер игәалашәоит, иҧхасҭахаз акы рҽеитәхар, иколлегацәа хымҧада ишидҵаалоз.
«Слава, ирацәаны идырла акы азы, хәҷык-хәҷык дырла зегьы рзы» - абас иҳәалон Аблоҭиа арратә маҵзура ахьихигоз аӷәыҵәа адҵаҟаҵаҩы.
Актертә ҟазарахь ҳхынҳәуа: Виачеслав бзиа ибаӡомызт ароль хадақәа. Иҟан ароль хадақәа анынаигӡозгьы, аха ҧыжәара риҭон ахәаҧшцәа ргәаҵаҿы иаанхоз, аамҭала ирацәамкәа асцена иқәгылоз ароль лахҿыхқәа. Артист итеатртә кариера қәҿиарала ицааиуан.
Шәарах Ԥачалиа инапхгарала, иколлегацәа Амиран Ҭаниеи, Сергеи Сақаниеи, Мажара Зыхәбеи ицырхрааны, Аблоҭиа иааиртит асатиреи алафи ртеатр «Чарирама».
Артистцәа рсатиратә миниатиурақәа рыманы атәыла зегьы иалсуан, уи алагьы жәлар рыбзиабара иаҧсахеит. Аблоҭиа инапы злеикуаз зегьы гәыла-ҧсыла дазыҟан, аха адырра ҿыцқәеи азҿлымҳарақәеи ҭынч ддыртәомызт.
Абарҭ аусқәа рыла ихыркәшан Виачеслав Аблоҭиа иусура раҧхьатәи ажәашықәса. Анаҩс, аҩаӡара ҿыцқәа рхаларазы Виачеслав атеатр ааныжьны, Москва арежиссерра иреиҳау акурсқәа дырҭалеит. Аблоҭиа бзиабара ҷыдала игәалаиршәоит аҵараиурҭа данҭалози, аҵара аниҵози, ирҵаҩцәеи, иҩызцәеи.
Азеиҧшсоиузтә еицлабрахь иаларҵеит 170 зыҳәара. Агәыҧқәа напхгара рызҭашаз Ельдар Риазанови, Никита Михалкови, Гьаргь Данелиеи аҧышәаратә комиссиаҿы инеины, акинематографистцәа алырхуан. Аихшьаалатә еицлабра иахысыз 12-ҩык роуп.
«Адкыларатә ҧышәараҿы иргәалашәеит 1979 шықәсазы Қырҭтәыла ҳадҵны, Урыстәыла ҳадлар шаҳҭахыз. Уи инадҳәаланы, иҳаҳәеит жәабжь лахҿыхк еиҭаҳҳәарц. Сара саахәыцны, ирзеиҭасҳәеит анаҩстәи… Иҟан уи аҩыза ахҭыс… ажәлар ашҭа хадаҿы итәан шаанӡа, Урыстәыла адлара зыҳәарас ирыман. Кыраамҭа итәан. Ус, быргк аҵх агәҭаны дааҧшын, иганаҿы итәаз дразҵаауеит: «Иааулсыртә ихьҭахеит, Урыстәыла ҳадырҵама?». Адкыларатә комиссиа алахәцәа кыраамҭа иччон», - ҳәа игәалашәоит Аблоҭиа.
Абасала, Виачеслав Андреи-иҧа қәҿиарала адкыларатә ҧышәарақәа аҭаны, Гьаргь Данелиа напхгара зиҭоз агәыҧ даанахәеит.
Астудентцәа аҵара ддырҵон Гьаргь Данелиа, Ельдар Риазанов, Никита Михалков, Андреи Тарковски, Евгени Евстигнеев, Леонид Трауберг уҳәа реиҧш иҟаз асоветтә кинематограф аметрцәа.
Алекциақәа даара аинтерес рыман, ҷыдалкаалатәи аҟазшьа рыман. Астудентцәа ирылшон аспикерцәа рааҧхьара, мамзаргьы мап рыцәкра.
«Иалҳхуан акы-ҩба лекциа. Иаҳҳәап, Павел Чухраи ҩынтәҟа даҳҭааит. Уаҳа аинтерес ҳамамызт. Аха Тарковски мызкы дауҳажьуамызт. Уи абаҩхатәра ду злаз уаҩын».
Москватәи иҵарашықәсқәа рашьҭахь, Аблоҭиа Қырҭтәылаҟа дцаны, ихала афильмқәа рҭыхра далагеит. 1989 шықәсанӡа аус иуит «Қырҭтәыла-фильм» акиностудиаҿы. 1986 шықәсазы, иара уброуп иахьҭихыз раҧхьаӡакәны, аҧсышәала ицәажәоз афильм «Асувенир». Уи афильм асценари иҩит арежиссер иҩыза, ашәҟәыҩҩы Даур Занҭариа.
Ақырҭуа-аҧсуа еизыҟазаашьақәа уи аамҭазы аанҿасрада аиҿагыларатә ҟазшьа шьҭырхуан. Убри инамаданы, Қарҭ аангылара мап ацәкны, арежиссер иҭаацәа иманы, Аҟәаҟа нхара диасит.
Аҧсны азы иуадаҩыз аамҭазы, Виачеслав ихы лаимырҟәит, илшеит Акультура аминистрра шьаҭас иҟаҵаны, раҧхьатәи аҧсуа киностудиа аартра.
Акиностудиа «Аҧсуафильм» аштат шьақәгылан хәҩык рыла – хҩык асахьаҭыхцәа, абухгалтер, арныҟәцаҩ. Астудиа раҧхьатәи алҵшәа акәны иҧхьаӡатәуп афильм «Напыхьараџь». Уи аҭыхразы астудиа аусзуҩцәа Санкт-Петербургҟа ицеит. Уаҟа аусеицуразы ирацәажәеит Аҧсныҟа иааргаз Ленинградтәи аҭыхратә гәыҧ. Аҭыхрақәа хыркәшан 1992 шықәсазы аибашьра алагаанӡа, аха абжьы ахаҵара иацҵан Санкт-Петербург. Уаҟоуп иахьымҩаҧысыз аҧхьарбарагьы, усҟан Аҧсны аибашьра цон.
«Ленфильмаа ҳәашьа амамкәа иҳацхрааит. Аҧара зынӡа иаҳзаанымхеит. Џьоукы ҟәрышьла иҳацхраауан, даҽа џьоукы маҭәала».
Маҷк анҵы, Аблоҭиа игәыҧ иманы Санкт-Петербургнтәи Шәачаҟа диасит. Уи аамҭазы уаҟа еиҿыркаахьан Аҧснытәи ахәцәеи ахҵәацәеи рыцхраара аштаб.
«Уахи-ҽни ҳҷаҧшьон. Лиана Ачҧҳаи сареи абаӷәазаҿы ҳарҧылон ахәцәеи аҧсцәеи, амедицинатә цхыраара зҭахыз ахәшәтәырҭахь иҳашьҭуан, иҭахаз рыҧсыбаҩ рҭаацәа ирықәҳаршәон».
Имариам аамҭазы, Шәача имҩаҧысит афильм «Напыхьараџь» ҩынтәны ауаа дырбара.
«Афильм арбара иаҧхьанеиуаз аҵх иалагӡаны, иазырхианы Шәача иқәҳаргылеит абаннер. Ашьыжь игәаҳҭеит џьоукы ишҧырҟаз. Хымҧада, уи провокациан. Аха афильм арбара қәҿиарала имҩаҧысит. Ахәаҧшра имҩахыҵит Аҧснытәи ахҵәацәа. Зеиҧшла, ари акиносахьа ауаа даара ибзианы ирыдыркылеит».
Аҧсныҟа ҳаныхынҳә, Гагра ахақәиҭтәра ашьҭахь, афильм дҳарбеит Гәдоуҭа.
«Шәхаҿы ишәзаагару, аибашьра цоит, ажәлар ашәы ршәуп, ҳара Аҧсныҟа акомедиа ааҳгеит. Ажәлар ари аҩыза ажанр шрыдыркыло сыздыруамызт, сгәы еихьнашьуан. Аха афильм арбара мҩаҧысит ибзиаӡаны, ауаа ргәалаҟазаара шьҭнахит. Иҟалап, ари ауаа ирылнаршазар ргәаҟра аамҭала ахашҭра».
Зеиҧшла, Виачеслав Аблоҭиа иҭихит зметраж наӡоу ҩ-фильмк – «Напыхьараџь», «Асувенир». Егьырҭ иусумҭақәа зегьы, акино адунеи аҿы ишырҳәо еиҧш, «зметр кьаҿу» ҳәа иҧхьаӡоуп.
Аибашьра ашьҭахь, арежиссер абжьы ахаҵарахьы диасит. Уи зыхьҟьаз афакторқәа рацәан. Аха хадара злоу мзызын астудиа абиуџьет амаҷзаара, хаҭалатәи афондқәа рыҟнытә цхыраара рымамызт, ас еиҧш иҟоу афинанстә ҭагылазаашьаҿы афильмқәа рҭыхра уадаҩуп.
Абарҭ амзыз хьанҭақәа ирыхҟьаны, арежиссер иҟазараҿы ихацыркын аамҭа ҿыц.
Виачеслав напы аиркит афильмқәеи амультфильмқәеи абжьы рхаҵара. Иазгәаҭатәуп, ари аус аҿгьы Аблоҭиа дшеиқәҿиаз, аҧсышәала аҳәаанырцәтәи афильмқәа ширцәажәаз. Уажәтәи аамҭазы, абжьы зхаҵоу амультфильмқәа рсиа иану маҷым. Уи иашьҭалеит афильмқәа аус рыдуларагьы.
Ари аус ацклаҧшра аҭахуп, аамҭа рацәаны иагоит, иара мацара уаҿызароуп. Зметраж наӡоу афильм аиҭагара шықәсыбжак агоит – иҳәеит Виачеслав Андреи-иҧа.
«Абжьы ахаҵараҿы зегь реиҳа иуадаҩу – асинхронтә текст аус адулароуп. Атексти артикулиациеи еиқәшәароуп. Уи азы амузыкатә ҟазшьа змоу алымҳа ҵары умазароуп. Иаҳҳәап, аперсонаж «А» иҳәазар, иара убас ихыркәшатәуп. Арольқәа зегьы хаҭала сырхысуеит, абжьы агашьеи артикулиациеи еиҿсырҧшуеит».
Арҿиара злысны иҟоу Виачеслав Андреи-иҧа иҭаацәараҿы аҟазара ҧсахрада бзиа ирбоит. Иҧшәмаҧҳәыс Марина – атеатр аҿы актрисоуп, иҧҳа Анна афильмқәа абжьы рхаҵараҿы лаб дицхраауеит, иҧа Сандро – режиссер қәыҧшуп, аҧсуа хәаҧшцәа ирыдигалахьеит еиуеиҧшым асахьаркыратә усумҭақәа. Уахь иаҵанакуеит «Аицакра», «Асабрада шкәакәа», «Арупап».
Аҧсуа кинематограф ҧхьаҟатәи аҧеиҧш иазку азҵаара аниоу, Виачеслав Андреи-иҧа абас ала аҭак ҟаиҵеит:
«Ааи, ҧхьаҟатәи аҧеиҧш ҳамоуп. Имаҷым аҟыбаҩ злоу аҿар, урҭ аус руеит, иҭырхуеит зметраж наӡоуи икьаҿуи афильмқәа, жәларбжьаратәи акинофестивальқәа рхы рыладырхәуеит, аҳамҭақәа рҽаҧсартәуеит. Уи даара сгәы иаахәоит. Ааҧсарада еиҭасҳәоит, шәааи аиҭашьақәыргылара ҳалагап, акинозал ааҳартып. Уи акәны иҟазааит аҧсуа фильм акинотеатр. Шәазхәыц, уи иҳалнаршоит есҽны аҧсуа кинематограф иаҵанакуа аусумҭақәа рыхәаҧшра, ахәыҷқәа рзы хәыда-ҧсада арбарақәа реиҿкаара, аекран аҟнытә аҧсуа бызшәа абжьы аргара. Ҳәарада, ари зегьы аҧара рацәаны иаҭахуп, аха уи ҧхьаҟатәи ҳҧеиҧш азы уасхыр бзиахоит».
шәҭалароуп, ма шәыҽҭажәыҩроуп.