ХIуагIа ргвбайара тынха йазынарху Адуней апсуа-абаза конгресси «Алашара» жвлара адкIылари рпроект шIыц «Амазара» апкъ йтата апсуа уагIа рашва «Нарҭаа рышҭыбжь» Хвынцариа йыхьыз зхъу аоркестр асуата видео ахъырхтI.
Барганджиа Саид
Апсны апны бзи йырбауа Хвынцариа Отар йыхьыз зхъу ауагIахъа ъамапсымаква роркестр гIазсуа апсуа уагIа рашва «Нарҭаа рышҭыбжь» (апсуа бызшвала – «НартыргIа ргьарпагьаджь» гIаныцIитI – аредакция ррытаразга) апсуа-абаза уагIахъа ргвбайара тынха йазынарху АААКи «Алашари» рпроект шIыц «Амазара» йаланакIуа йащтагIайуа уыста йалтI.
ЙгIашвгвалахIыршвахпI «Амазара» (апсуа бызшвала – йазкIкIу байара, байара хчарта гIаныцIитI – аредакция ррытаразга) зхьзу апроект гIалазгаз а-Конгресс ЙхIаракIу асовет аунашвачпагIв Эгьзакь Мусса шйакIву. Апроект апсуа-абаза уагIахъа ркультура апны рахIа магIын ду зму агIаншараква йгIарыквчважвауа ахъвквала йалапI.
ХъвыкIипхьадза йацIыхъвагIарбарахуштI а-Конгресс ахабарргарта портали антахьгьыт аинтернет тыпкви йгIартарцIуш авидеороликква.
АААК йаланакIуа апхIвыс советква рунашвачпагIв Ардзынба Гета йапхъахуз амш йгIашIарышвта ароликква ррыхIазырра джьгарта далапI. Ауи «Амазара» амагIныла апш аъамкIва йылпхьадзитI, апсуа-абаза уагIахъа ргвбайара тынха йазынархата ауи апш щарда гIазцIазкIуа проект йапхъахауата йшдырхъйауагьи гIалылкIгIитI.
Ардзынба АААК йаднакIылыз агвып роликипхьадза йшадынхалуа гIалхIватI: зымгIва йрапхъата зуыс бзидздзата йыздыруа аъачIвагIагIвчва гIаланаркIра атахъыпI.
«ХачIвыта хIпахь йгылапI аролик уыла хънахуа йпшдзата, йджьащахъвата йыззыччпуш аъачIвагIагIвчва гвыпкIта йадхIкIылырныс. АгIарбаща швабыж магIын ду амапI», – ауыс зкву гIахIгвынлыргIвытI апхIвыс советква рунашвачпагIв йгьи йгIацылцIахтI апсуа уагIа рмакъым йазынарху аролик арыхIазырра «ачкIвынчва зымгIва йнамкIгIамкIуа йшадгылыз – анчва дырзыразхатI».
НОЯБРЬ А 16 ХIСАЙТИ АСОЦИАЛ СЕТЬКВИ РПНЫ АВИДЕО ЙАПХЪАХАУАТА ЙГIАТАХIЦIУШТI.
FACEBOOK ЙГЬИ INSTAGRAM РПНЫ АААК АНАПАКВА ТШРЫНШВЦIА.
Хвынцариа йыхьыз зхъу аоркестр йалу ахIвссаква ари анхара ахъазла Согъвым йаъу «Мода-текс» дзахырта апны йазалхта блузон рзырдзахтI.
«ХIара зымгIвагьи швабыж йгIахIцхърагIитI. ХIымгIвайсра мчхитI. Апроект «адзхъынхIвырта» ъачIвагIагIвчва щардагIв танахIвахьатI, ауат дзачIвызлакIгьи ауи ргвгьи рпсгьи адкIылата йынхитI. Ауи цIабыргдзата Интернет агьагьара апны Апсны йгIаннажьуа щтапI. ХIара хIгвыгъитI апшыгIвчва ауи йаквнагауа хвы аквырцIушта», – лажва аллыргатI Ардзынба Гета.
ЙгIвбахауа авидео (йапхъахуз хъырххьатI, ауи ауагIа ргIахIвра йазынархан – аредакция ррытаразга) режиссерта йадынхалтI йшIаркIву, ауаса зыхьыз зыргахьаз апсуа кинематографист Логуа Дауыти ауи йвидеостудия VERTIGO апны йыцынхаквауи. Ауи йшихIвазла, щарда цIуата «ари апш закIы» хъихныс йтахъын, йаргьи а-Конгресс ауысхагIвчва «Амазара» проект далалырныс йангIайыхIва зынла дадгылтI.
«ЗымгIва йрапхъата сызлахIваз ари акIвпI: апсуа макъым ъамапсымаква ахъысхырныс стахъыпI. Ауи апш гвып аъата ангIасархIв сгвыргъьачIвауа садгылтI, йауа ухIварыквын, сара щарда цIуата амакъымршIыйара хъысхырныс сымагIальаматын. Ауи уагIахъа фгIвы ахъыхIитI, пшдзапI, хъагIата йгIарба йауаштI. Ужвы зымгIвагьи ауи тшъацырчпауа гьакIвым: ауи хIара йхIхъвыкIпI. ХIара ари ашва шбайу, ауаъа ъамапсыма щарда рбыжьква шгауа гIахIырбарныс йаквхIкIтI, ачкIвынчва шасуаш йазынархата шIыцракIгьи алахIцIатI», – йхIватI йынхара даквчважвауата арежиссер.
Логуа Дауыт йъахъырхуашыз ашIыпIа зынла йгьйызгIалымхтI.
«Ари ауыс ауатыкв йангIатал йапхъахауата ауи ъахъыхIхуаш шIыпIата схъа йгIанагыз Эшера Хъахьы, Ауазаба ахъыкв акIвпI. Ауаъа апхъанчIви къала-багъьата гылапI, абна йузымхIвауата йпшдзадзапI. УацIыхъван, адгалра уысква хIрыдынхалуа хIаналага, ауаъа ацара шбаргвхуш гIахIгвынгIвытI: йшыжвбауа апшта, хIара гIважвагIвы хIнадзитI, ъамапсыма, хIатла хIцрахIвапI. РыцIа майрата уъазыцуш шIыпIа хIазыпшгIауа хIалагатI. Ари ашIыпIа аунашва араъа йаъахьаз чкIвынчваквакI йгIахIархIвтI. ЙшгIацIцIызла, йхIыцынхауа аоператор КIвакIваскьыр Валера араъа кIара хъиххьан, ауыгьи ари ашIыпIа шбзидздзу йхIватI. МчыбжьыкI цIуашта араъа хIгIайтI, хIнасгIастI, хIнапшыгIапштI – араъагьи швабыж йпшдзапI, ажва гьалам, амшын ангIаубауа акадр агалагьи йбайахитI. ХIаргьи араъа йхъыхIхырныс хIаквгIашIастI, йауа ухIварыквын, араъа угIайырныс майрапI, апшдзаралагьи анахьанат йгьгIархьшвум» – йхIватI арежиссер.
Аоператор-ргылыгIв, Alan Studio студия гIанзыршаз КIвакIваскьыр Валерий щарда мцIуата Апсны ащхъаква рпшдзара йазынарху йара йпроект джвыквйыжьтI. Ауи йсуратгIвыраква
Адуней апсуа-абаза конгресс ахабарргарта портал апынгьи уырпшы йауаштI. КIвакIваскьыр «Амазара» проект дахъвыкIхарныс дхIазырта дгвыргъьачIвауа далалтI.
«Ари йатаукIра атахъым, адуней йыкву дзачIвызлакIгьи йгIайгвынгIвуа абызшвала – амакъыми аршIыйари рыбызшвала адуней шабгу хIунашва разхIвуаш уызгIвымсхыз проектпI», – йхIватI аоператор.
Апсуа уагIа рашва апхъаланаскIьара сквшщарда цIуата йадынхалитI Хвынцариа Отар йыхьыз зхъу ауагIахъа ъамапсымаква роркестргьи ауи ршIыйарала аунашвачпагIв Арухаа Денисгьи. Зынла йхIхIвапIта: агвып щарда цIуата Апсны апынгьи ауи утыцIтагьи апшыгIвчва йыргвапхадзитI.
«Ари апроект апны хIара апсуа уагIа рашва «Нарҭаа рышҭыбжь» хIаситI. Ари акомпозиция акомпозитор Хвынцариа Отар дадынхалтI. Ауи рыцIа йызгIалхIхыз араъа апсуа ъамапсымаква, зымгIвума ухIвушта, рбжьы гитIта акIвпI. Ари амакъым йшаъаз йаъапI, сквшы 70-80 рапхъала йшасуаз апшта йасыркIвитI. Йаргьи ауи ахв рыцIагьи йщтIнахитI. Йара йухIвушызтын, ауагIа рмакъымква рыхв гьузышвушым, йауа ухIварыквын, ауи хIуагIа йгIаргвмачIта уахьчIва йъагIадзаз йдымрыдзыз макъымпI. УахьчIва хIара ауи йшаъаз хIымпсахуата апхъала йнахIрыскIьарныс, йхIыщтагIайуаш абанпараква йрызгIаныгIжьырныс лшара хIымапI. Ауи хвду амапI», – йхIватI Арухаа Денис.
Аоркестр гIаншангьи ауи йалата ауагIахъа ъамапсымаква йрыситI Барганджиа Астани Аршба Марианни. АгIвыджьгьи йцIайищтарагьи ауагIа рмакъым бзибара ду азрымапI, рынцIрагьи ауи йаларцIарныс ртахъыпI.
«СхвыцыркIвата сара Хвап кыт апны Арухаа Денис йоркестр салалтI. Сара аккордеон саситI, ауи бзи йызбитI. Ауищтара хIара мгIва ауыра гIамыгIдатI, ужвы йъагIадзазгьи хIынхитI, хIаситI. ХIара апсуа уагIа рмакъымква ауагIа йшрылагIжьуаш хIащтапI. АААК апроект акIвпIта – са йшспхьадзауала, ауи йапшу апроектква рырхъйара магIын ду амапI. Сара съачIвагIала сынхара апны ари ауи йапшу йапхъахауа проектпI», – йгвгIанаграква хIыцагIвишатI Астан.
Марианна ачамгвыр (апсуа уагIа рмакъым ъамапсыма – аредакция ррытаразга) даситI, афольклор ашва ауагIа йрылагара атахъыта йылпхьадзитI.
«ХIызту азаман ауагIахъа ъамапсымаква йрысуа ауагIа швабыж ймачIыгIвпI. Са сакIвпIта – схвыцищтарагьи ауат бзи йызбитI. Ари апроект гIалазгаз тамамдзата йырчпатI. Са сшапшуала, ауи абзирала датша закIы йапшым хIкультура адуней шабгу йдхIырбарныс хIылшуштI», – лхIватI амакъымршIыйагIв.
А-Конгресс агвып апроект йацызкIуа зымгIва йырзыразпI, апхъахьылагьи кIара анхъырхуа йапшым аъачIвагIагIвчва гIадрайгвалуштI.
Апсуа-абаза уагIа ргвбайара йазынарху Адуней апсуа-абаза конгресси «Алашара» дуней адкIылари рпроект "Амазара" апкъ йтата ауагIа рашваква, ауагIахъа литература, цри бызшва, анапIылачпаракви апхъанчIви цIаскви гIазырбауа ароликква ащтагIайуаштI. Авидеороликква Апсни Къарча-Черкеси рпны йхъырхуаштI.
швталра йа тшаншвцIара атахъыпI.