Адуней апсуа-абаза конгресс «АААК йалу ршIахъаква» ахьызта агвып йгIарыквчважвауа, видеота йхъыху айчважвараквала йалазлуш проект гIаланагатI. Ауи дагIаджвыквцIагIвпI а-Конгресс ахабарргарта портал аредактор хъада Лазба Амина.
Амичба Амра
АААК «АААК йалу ршахъаква» зхьзу апроект апкъ йтата а-Конгресс йалакву ргIачважвараква рабаркIыра аднагалуа йалагатI, лхIватI АААК ахабарргарта портал аредактор хъада Лазба Амина. Ауи лакIвпI апроект йагIаджвыквцIагIву.
Лазба йшылхIвауала, ари хвысквшахауата а-Конгресс апны гвып шIыц нхитI (асквш 2017 декабрь а 8 йакIвшаз Адуней апсуа-абаза конгресс VII айззара ду апны адкIылара а-Устав рпсахын а-Конгресс апрезидент йъанатIа нырххтI, ЙхIаракIу совет гIандыршатI, ауи даунашвачпагIвта зымгIвагьи йацшIакIта Эгьзакь Мусса далырхтI – аредакция ррытаразга), йаргьи ауи агвып йалу ауагIа йауацIыхта йгIарыквчважварныс щаквдыргылтI.
Апроект гIалазгакваз СогIвым йаъу а-Конгресс ауысхарта анхагIвчваквакI ргIачважвараква ахъырххьатI. Ауи амщтахь Санкт-Петербург йаъу АААК аквта аппарат ауысхагIвчви АААК ЙхIаракIу асовет йалаквуи гIадырчважварныс ргвыгъапI.
Йапхъахауа апщгIацIщтракI рпны Лазба Амина йгIалырчважвауа хIъачIвагIалагIвчва рхъи рынхари йрыквчважвитI.
«Аинтервьюква зымгIва агIвзачва шайчважвалауа апшта йакIвшатI. СайчважвалагIвчва йшгIабзазаз, рынцIра рыцIа магIны змаз гIаншарата йалаз, бзи йырбауа ауысква, ргвалаква, йапшым ауысквала ргвгIанаграква гIасархIвитI. Сызцынхауа рызджьакI хIанцIайызищтара йыздыритI, азджьакI санстудентыз срабадыртI, азджьакIгьи а-Конгресс апны срыднагалтI, зымгIвагьи хIаларпата ауыс хIазынхитI. Ауи йгIалцIла сара ауат срачважварныс, азцIгIара рыстырныс, уыскI йазсырхъвыцырныс – ауыла апшыгIвчва сайчважвалагIв рыцIа бзита йабасырдырырныс сзымайрапI», – лынхара даквчважватI Лазба Амина.
Ауи йгIацылцIахтI ари айчважвараква йапхъахауа рхъвы шакIву. Апроект гIаджвыквызцIата йакIвзыршауа айчважвараква джьащахъвата йакIвшата, апхъахьылагьи йара ауаса йакIвшалушта, Апсны йахъазымкIва анахьанат акъральква рпынгьи ауат йырпшуа йрымагIальаматхушта дгвыгъитI.
Лазба йылхIватI апроект агIацIщтраква зымгIва АААК ахабарргарта портал зланхауа ахвбызшвакIла йатаркIта асайт йшгIатарцIуш – адуней ахъатаква зымгIва рпны йбзазауа хIабашталагIвчвагьи а-Конгресс анхагIвчва рыцIа бзита йырдырра ахъазла. Лазба Амина апхъапхъа йгIалырчважвушыз шгIалылхызгьи гIахIгвынлыргIвытI.
«ХIара хIгвы йтан «АААК йалу ршIахъаква» апкъ йтата зымгIва рапхъа хIыргвышхвагIв, хIадкIылара йалакта хъадата йалуа ЙхIаракIу асовет аунашвачпагIв Эгьзакь Мусса дгIахIырчважварныс. Ауаса Апсны Республика АуагIа Райззара (а-Парламент) апны уыжвласыла алхраква шакIвшуш, ауат хIара йхIыцынхауа хIынбжьагIвчвакIгьи шрылазлуш гIахIпхьадзауата апхъапхъа ауат ргIачважвараква анхIцIарныс йаквхIкIтI. Ауат Гьыцба Инар, Хагба Изольда, Реквава Темур, Жьыба Дмитрий ракIвпI», – лхIватI апроект агIаджвыквцIагIв.
Апроект хабарргарала йацхърагIуштI Абаза ТВ телеканал. АгIацIщтраква зымгIва АААК апортал апны йахъазымкIва телебаралагьи йгIадырбуштI.
Абаза ТВ адиректор хъада Хашыг Руслан «АААК йалу ршIахъаква» аканал аэфир шIыцракI гIаланацIушта, апшыгIвчвагьи рыцIа йщардагIвыта йгIахънакъьалуашта йхIвитI.
«ЙамгIануысызлакI апынгьи дахIвра уаназынадзуш зкъаруква шабгу анхара йазтуа агIвычIвгIвысква ануыму акIвпI. ХIыуа дзачIвызлакIгьи проекткI йа йхъвыцракI анйырхъйауа мгIвакI амидитI. Ателебара эфир ахъазла къральгIвипхьадза йапшым ауысква йырхъйауата швапхата йырхIаз гIальаматра алапI, ауи уыдзхъа йаъу ауагIа йырчпауа, йгIарыдахIвуа унардыритI», – йхIватI Хашыг.
Ауи арыпхьара апны йгIашIарышвта акыт млыкврхIарадза гIазцIазкIуа, сабапра злу апроект джьащахъваква зырхъйауа а-Конгресс анхара хвду аквицIатI.
«ЙцIыхъвахауа асквшква а-Конгресс анхара йапшым анархараквала тшауацIнахтI. ХIара хIканал апны АААК йарыхIазырыз арыпхьара йазынарху аконтент гIатахIцIун. Ауатква зымгIва хIацынхара рыцIагьи тшауацIнарых йшауаш уаздырхъвыцитI. Ауи абзира апшыгIвчвагьи йрыквшвитI – хIэфир апны [йгIауыхъвуш] аматериалква рыцIа йщардахитI», – ауыс хIзалйыргатI Абаза ТВ адиректор хъада.
а-Конгресс архъйагIв секретарь Гьыцба Инар дызлу «АААК йалу ршIахъаква» проект йапхъахауа агIацIщтра Абаза ТВ аэфир апны мартI а 1 асахIат а 21 йгIадырбуштI.
Апроект АААК ахабарргарта портал акъарула йдырхъйатI: операторта йзыргылыз Хварцкиа Илона, аоператор лцхърагIагIв АгIвдза Наала, йабызтыз Хварцкиа Илони Кьырвал Камилли, видеографика зчпаз Хьышба Науыр, йадызгалыз йгьи йакIвзыршаз Лазба Амина ракIвпI.
швталра йа тшаншвцIара атахъыпI.