Алшараква рыцIа йъащарду анархараквала ацынхара ауысла ангIалра мачвы ацIарцIатI Адуней апсуа-абаза конгресс ЙхIаракIу асовет аунашвачпагIв Эгьзакь Мусси Санкт-Петербург акъральыгIва бюджет нхарта «Фрунзенский» чкIвыныргIа ртшпсщарта квта (СПб ГБУ «ПМДЦ «Фрунзенский») адиректор Соколов Евгенийи.

АнгIалра йгIанахIвитI ауи адызчпалыз чквыныргIи збальыгъ йнадзаз ацIайкви рквтабжьара ауагIахъа азазаъащаква рыбагъьара, абагвынгIвра щаквыргылра, ашIаква зыбызшвквала йапшым ауагIа ращтаныкъвара акультура йазыбжьара йшазынхуш.

Анйара апны агIвхъатакI ангIалтI йацыта апроектква, аконцертква, афестивальква, амузыка анкъвакъвраква, датшагьи чкIвыныргIа рабадырра атшауацIыхра йазынарху анхараква йрылалларныс.

АААК ЙхIаракIу асовет аунашвачпагIв Эгьзакь Мусса дшапшуала, ангIалра культура нархарала ацынхара ахъаз алшара шIыцква гIаннаршитI.

«А-Конгресс ахачIв хъадаква йрыуазакIыпI апсуа-абаза уагIахъа йрыуу йъабзазауа аштаква зымгIва рпны йадкIылра, знархарала йапшым, сабап злу анхараква йрылажьра. А-Конгресс йапшым анхартаква ангIалра рыдначпалхьатI. Ауат рбзирала абаза уагIа йрыуу дзачIвызлакIгьи акъала абзазара рыцIа джьгарта далалырныс, дырри пышви амидауамцара йхъагьи дгIакIвзыршауагьи йрызйырхIарныс лшара йауитI», – йхIватI Эгьзакь Мусса.

Анйара йалаз «Фрунзенский» тшпсщарта квта адиректор йтарагылыгIв КIвадза Рафаэльгьи акультура бзазара апны ауагIахъа азазаъащаква тшауацIдрыхра йгьи йрыцкIра шатахъу йхIватI.

«АнгIалра хIацыта йапшым ауысква адыгIгалырныс лшара гIахIнатитI. ЙаъапI абагвынгIвра, культура уысла ацынхара знархару йхIазыру апрограммаква, апсуа-абаза уагIахъа ртурых йапщылу ахъмаштылра уысква акIвшалитI. ЙлыхIхуа ахачIвква зымгIва гIамта-гIамта йащтацауата йхIырхъйуштI», – йгвгIанаграква хIыцагIвишатI ауи.

АнгIалра йаныпI ауи адызчпалыз йакIвдыршуш ауысква рхабар азаджв азаджв йшидырдырлушгьи.