«Аквафон» компания аунашвачпагIв хъада, акоронавирус абакIра знархару апсуа хIаракьатчпагIвчва рымгIвайсра «ХIара хIадгылтI» агIаджвыквцIагIвчва йрыуазаджву Аргвын Алхас АААК ахайыргIвазатI амгIвайсра шгIаншаз, ауи анхара шакIвшауа, апхъахьыла хачIвыта йаргылуа.
Акоронавирус тшауацIнахырныс йаншварагIвару абари агIамта хьанта апны апсуа уагIахъа йырбжьу амакIыраква ныржьта йацIагылырныс рылшуштI, йхIватI АААК ахабарргарта портал дгIарачважвауата «Аквафон» компания аунашвачпагIв хъада, «ХIара хIадгылтI» мгIвайсра апхъагылагIвчва йрыуу Аргвын Алхас.
Ауи йгIайхIватI акоронавирус абакIра ауысла Апсны йырцхърагIарныс ахъазла апсуа хIаракьатчпагIвчва рымгIвайсра шгIандыршаз. Убальарыгъ йшамуашыз зымгIва хIыхъазлагьи «зынла йгвынгIвырахатI».
«Ачба Ники («Апсны ачагIыркви адзкви» компания аунашвачпагIв хъада, апсуа бзихагIв – аредакция ррытаразга) сари телефонла хIайчважватI. Ауыгьи хайыр зцIата йчпачIву дшазхъвыцуа йхIватI. Зынла тшгIахIыдыркIылтI «Амобайл» телефон компаниягьи. Ауи амщтахь апрезидент йхъвдаквцIараква зырхъйауа тшизынахIырхатI, ауи йтайымщахIауата ахIаракьатчпагIвчва хIирайгватI. Йапшым анхартаква ргIащтийыгIвчва ймачIгIвымкIва йгIайззатI. ХIшвапхала ауагIа ауыс йгIадхIкIылырныс хIгвыгъун. Сшхъвыцуала, ауи хIылшатI, датшагьи магIны ду зму шIыцракI гIахъхIтIытI: хIара абари йапшу аъаща хьанта хIанташвара хIамакIыраква хIырзымхъвыцхуата тшадхIкIылырныс хIылшитI», – йхIватI ахIаракьатчпагIв.
Ауи йшгIайхIвазла, Апсны апны апандемия абакIра ахъазла ахча алазцIуз ахIаракьатчпагIвчва йгьырхъазым – акъраль анахьанат абзазагIвчвагьи йгIаларцIун, йаъан згIалацIара бзидздза йнадзузгьи.
«Ахча апны йаннадзара, йанакIвызлакIгьи хIвансхIван щарда гIаншитI: йъаргауа, йызквдрыдзуа ауысла. Ауи ахIатырла, магIны ду аман ауагIа йшхIызхъарцIуш апшта ауыс хIадгылырныс. Ахчаква АзгIвадарахчара аминистерства йазалху асчет йалахIцIарныс йщаквхIыргылтI. Ахчаква шагвындыргIвуа йара амгIвайсра «ХIара хIадгылтI» ащтийыгIв, «Амобайл» компания аунашвачпагIв хъада Барцыц Борис йырхъвыхырныс далхIхтI. Ауи абзазагIвчва акоронавирус шIкIгIара йачвхъыхчара ауысла йгIаныршу а-Координация штаб далапI. ХIара ауи йыхъвдаквхIцIаз ауыс швабыж йгьмайрам. Йаргьи ари ауыс йнардзата йшахъвдаквищтыз хIара уахьчIвала хIаквшахIатпI», – йгIаликIгIатI Аргвын Алхас.
ЙатахIхIвахпI, «ХIара хIадгылтI» мгIвайсри Москва апсуа диаспори алата гIамта айшысла Апсны апны авирус шварагIвара йабакIырныс ахъазла сом мильуан 50 райхIа азыркIкIытI. АуагIа ари апш джьгарра ъагIадырбаз ауысла Аргвын Алхас йхIваз ари акIвпI: ауагIа хъатакIла йшымгылуаш хIайгвгъун, ауаса акIвпI йаргьи йшцаз – «ргвы шцхIауа гIадырбатI».
«ЩардагIвы йшырпхьадзауала, ари совет заман йатынхата акIвпI сшазхъвыцуа, ахIаракьатчпагIвчва йынкъвырцауа абгата рфайдагIваца акIвпI. Ауи гьцIабыргым. АхIаракьатчпагIвчва дара ргIапсарала нхарта гIандыршитI, ахча майрата йшгIамиуа рдыритI, араса йшаъугьи йгIархъахIауа агIвыршарныс йхIазырпI. Апсны рылата адуней шабгу зташваз аъаща баргвы йшгIанарбауала, йалкIгIата ахIаракьатчпагIвчва йрайгвгъушта йаъапI хIуагIагьи хIкъральыгIвагьи», – йгIаликIгIатI Аргвын Алхас. Ауи хIгватра азынайырхатI уахьчIвала абзазагIвчва йрапшдзата ахIаракьатчпагIвчвагьи рхъахIара швабыж йшщаквысуа.
«Баргвыра щарда аъапI. Ауаса ари аъаща хьанта апны абзазагIвчва рхъазы йшгIаныгIмыжьуаш хIакъпI, йхIылшауа зымгIва хIчпуштI», – йхIватI багъьата ахIаракьатчпагIв.
Аргвын Алхас йазхъайцIитI «йзапш гIамта баргвызлакIгьи амаль шIыцква рлыхра йшаквыргIапсу». Ауи йшихIвазла, йгIаргванхауа агIамта апны къарута йаъу шабгу акытмлыкврхIара атшауацIнарыхра йазынархара атахъхуштI.
«Йалныс ауыпI фачIвгьи хIымахымкIва, курорт гIамтагьи гIанымшауата, ауи йгIалцIла хъахIарагьи хIмауата хIгIанхарныс. Ужвы азаман йхIылшауа зымгIва абгата йгIахIрысабапта агIайыраква лахIцIара, ауат хIырхьпшра атахъыпI. Ауи хIэкономика алащагьи датшата йхIпсахырныс ахъазла лшара гIахIнатуаштI», – араса йпхьадзитI Аргвын Алхас.
АргвынргIа ртгIачва ужвы Апсны акъральгIвчва зымгIва рапшта рхъа дыркIьыдан рпны йаъапI, акоронавирус шIкIгIара тшауацIнамхырныс ахъазла акъраль аунашвачпагIвчва йнарахвыз агIашIакIра амальква зымгIва нкъвыргитI.
«АтгIачва йрыуата агваны йгIаджвылцIуа сара йсхъазыпI. Анхарта, ачагIыр гIацIщтырта рпны сцалитI. ЙъакIвызлакIгьи напIтарагьи маскагьи ахъасцIитI. Сзынйауа ауагIа мачIыгIвдзапI», – йхIватI Аргвын Алхас.
Апсуа хIаракьатчпагIвчва рымгIвайсра «ХIара хIадгылтI» йгьи Москва апсуа диаспора ркъару алата йадыргалын Апсны йгIаргтI акоронавирус абакIра ахъазла гуманитар айъазара цхърагIара.
Агуманитар айъазара хIатлара агIваша апрель а 14 атшын Апсны йгIадзатI. Ауи ацхърагIара йаланакIитI ИВЛ аппаратта 21, ауат ангIадрысабапуа йгIартахъхауа апкъыгIваква, апульсоксиметрква, контакт змам атермометрква, айъазагIвчва рхъа злархчуш апкъыгIваква – йазалху ахъыхчара чгIвычаква, аларбгIвыгаква, ареспиратор медицина маскаква, зынгIарысабапрата йгIартахъхауа амедицина пкъыгIваква.
швталра йа тшаншвцIара атахъыпI.