Апсны Очамчыра район апны йакIвшуз ашвахIвагIвчва шIаква ранкъвакъвра «Орфей» йалу апхIвыспачкIвын Адуней апсуа-абаза конгресс йазалху асогIа лыртатI.
Барганджиа Саид
Очамчыра апны йакIвшуз ашвахIвара проект «Орфей» апкъ йтата АААК йгIандыршатI йгьи йпшцIырщттI йазалху асогIа апсыуа бызшвала йагъьу ашва йазынархата. АсогIа лквнадыргатI анкъвакъвра йалаз ашвахIвагIв шIа Азизова Саида.
Адуней апсуа-абаза конгресс архъйагIв секретарь Гицба Инар йшихIвазла, йазалху асогIа ауыс ауатыкв йангIатал АААК йалакву йацыркIтI, йауа ухIварыквын апроект «цIабыргыта ажвлара рыхъазла сабап гIазлыцIуа гIаджвыквцIарапI».
Анкъвакъвра йалалыз асабиква рщардагIв ъабзазауа ашIыпIа бзита йгьадгалам. Очамчыра район акытква йыртабзазауа арат асабиква талант рымазтIхIва зынгьи рнапIквала микрофон гьрымкIысызтI. Ауи апшта, а-Конгресс йгIалыркIгIаз 14 сквша зныбжьу Азизова Саида амузыка дырраква гьлымам.
«Йазалху асогIа, асертификат, абзирала анкъвакъвра апхъагылагIв йлылшуштI йбергьльу апсыуа композитор Гумба Анри йпны ашва шIыц анылцIарныс», – йхIватI Инар.
АшвахIвара анкъвакъвра «Орфей» гIазхъвыцыз Адлейба Валерия лакIвпI – Россия телебара канал НТВ апны йбергьльу ашвахIвара проект «Уара усуперпI» йапхъахауа агIамта апхъагылагIв. Ауи йшылпхьадзауала, апроект ашIаква асцена апны рылшараква злагIадырбуш амальква рзыгIаннаршитI, ауи акIвпI нархарата йаму.
«Сара ауралагьи йздыруан Очамчыра апны талант зму асабиква шщардагIву йгьи йстахъын зны сара йшсызшахаз апшта ауатгьи асцена апны агIахъвмарра рылшарныс, апшыгIвчва рнапIасра ззырхIвауа рбарныс. Сгвтара сан йанласхIв ауи Очамчыра район ауысхарта апны чкIвынргIи аспорти рхъвшара тшырзыналырхатI. Абар ужвы хIадкIылата апроект хIадынхалитI», – лхIватI Валерия.
АААК йазалху асогIа анкъвгагIвы анкъвакъвра апны йбергьльу апсыуа ашва «Щищ нани» лхIватI. Ауи гарашвапI, й-ХIХ-хауа асквшышв агIан апсыуаква антыргуз ахъвыхI апны ан йпсыз лсаби йзылхIвун. Ауи асхъан азгIвакви амли тшырчвырхчауата ахъвыхI апны йпсуаз ауагIа атенгьыз йтарпсун. Апхъапхъа йпсуа йалагаз асабиква ракIвпI. АпхIвысква чвзабакI дрылан. Ауи апхIвыс рыцхIа лсаби дчмазагIвхан дпсытI, ауаса ан ауи лгвы дадылкIылуа «дщаквылкIуан».
«Сара щарда цIуата йсхIварныс стахъын ари ашва, ауи угвгьи упсгьи йрылалитI, уыладз гIанащтийитI. Ауи хIуагIахъа шабгу йырхьыгIапI», – араса лгвгIанаграква хIыцагIвылшитI Азизова Саида. АпхIвыспачкIвын а-Конгресс дшырзыразу йгьи апхъала зынгьи астудия апны ашва шанлымцIасыз лхIватI.
«Ауи сара сыхъазла швабыж йсогIа бзипI, Анчва дшвзыразхатI! Швабыж йсгвапапI!» – лхIватI ауи.
Анкъвакъвра йгIалалуаш йырзыпшгIауата адгалагIвчва Очамчыра район акытква зымгIва йгIарыкIвшатI, саби 100-гIв райхIа йрыздзыргIвытI.
«Асабиква йгвыргъьауа йгIахIпылуан, бзигвыгъа рымата йхIызпшуан. хIара талант зму асабиква хIщардапI, ауаса ауат аъачIвагIагIвчва рцхърагIара йазыбжапI, ауи йгIалцIла ари апроект ауат рыхъазла лшара бзи гIаннаршитI», – лхIватI АААК ахабарргарта портал разцIгIараква джьауап гIарылтуата ашвахIварала арыпхьагIв Цвижба Лика. Ауи лакIвын акастинг апны асабиква ашва шырзыхIвауа ахIисап зчпауата йрыздзыргIвуаз.
АшвахIвара проект «Орфей» апны йагъьу ашвахIвагIв хьзы йазабакIитI 17-гIв йнадзауа ачкIвынчви ахIвсси. Ауат ргIахъвмарра ауыс йазъазу ажюри хвы аквырцIитI. Апроект ххъвыкIта йшапI. ЙгIвбахауа ахъвы апны асабиква цри бызшвала ашваква рхIватI. АшвахIвагIвчва шIаква рапхъала йщтIапI йхпахауа агIахъвмарра. Араъа акIвпI апхъагылагIв дъагIабергьыльхуш. Анкъвакъвра йапхъахауа агIвхъвыкI ргIарбараквала а-18-гIвгьи афинал йазынадзатI.
швталра йа тшаншвцIара атахъыпI.