Апсны апны йагIвсыз ауахъи атшыни руацIа COVID-19 ауысла гIаншара шIыцкIгьи гьгIадымрыбергьыльтI, йхIватI амедицина уысквала аоперштаб аунашвачпагIв йтарагылыгIв, Апсны Республика азгIвадарахчара аминистр йтарагылыгIв Конджариа Алхас Апсны абзазагIвчва йрызцауа йансимш тшазынархара апны. Ауи акIвпIта, уахьчIвала COVID-19 згIва шрыхьуала йдрытамамта Апсны Республика апны йаъу гIвыджь ракIвпI. АгIвчымазагIвчвагьи Гагра йбзазитI, тгIачвакI йрыуапI.   

Конджариа йшихIвазла, акоронавирус шIкIгIара зхьуа ачымазагIвчва Гвдауыта аквта чымазагIвтара апны йрайъазитI, йашIамсуата йырхъпшылитI.  

«Йапхъахауата йчмазагIвхаз квтанайта дхIатлапI, мачIкI рыцIа дагъьхауа далагатI. ЙгIвыджьхауа йуыс рыцIа уарыразуата йаъапI. АчымазагIвчва йрыщтаныкъвуз зымгIвагьи рхъа дыркIьыдатI, ауат ткIьийта йырхъпшылитI», – йхIватI ауи. 

Аоперштаб аунашвачпагIв йтарагылыгIв йшгIацицIахызла, йагIвсыз ауахъи атшыни руацIа ужвыгьи жвагIвы атестква йыркIылстI. Ауат зымгIвагьи ргIарбараква удрыразитI.  

Йацы COVID-19 ъагIарауыз Гагра район ашIыпIа апны комендант сахIат щаквдыргылтI. МВД а-ГАИ аунашвахъцIарта аунашвахъцIагIв Агрба Батал ауи ауысла абзазагIвчва тшырзынайырхатI йщаквдыргылыз ацIасква нкъвыргарныс йгьи Апсны Республика апны акоронавирус шIкIгIара тшауацIнамхра ахъазла ауи ашIакIра знархару абжьагажваква рыларкIырныс дахIвауата. Акомендант гIамта асахIат а 20.00 йгIашIарышвта щымта асахIат а 07.00-дза йщаквгылапI. Акомендант сахIат ацIасква мгIвхъызгауа гIашIадрыста ауи алганадзыкIьара йкIыта йрымазлуштI. 

Асквш 2020 мартI а 24 йгIашIарышвта Апсны аунашвачпагIвчва акоронавирус ашIашIкIгIара згIва Covid-19 йабакIуата Апсны абзазагIвчва ргIахчара знархару амальква нарахвтI. Ауи апшта, уагIа щарда злу айззараква гьакIвдыршахуам, Апсны Республика йгьтарыжьхуам турист гIамдара мурад змата йгIайуа агIвымакъраль бзазагIвчва йгьи къральгIвра швъа змам агIвычIвгIвысква, афачIвтйыртакви аптакькви ракIвымкIва анахьанат аткванква зымгIва адыркIытI, ауагIа хвитта йгьынкъвырыжьуам, датшагьи.

АААК Апсны апны акоронавирус ашIашIкIгIара згIва COVID-19 абакIра джьгарта йалалтI

Асквш 2020 мартI а 28 йгIашIарышвта ГвжважвагIва аъаща хабза щата амата йщаквдыргылтI: Апсны йгьи Россия ркъральгIвына хъысырта хъыргIватI, ахъысра йахвиту арра къвырльыкъвхагIвчви адипломаткви йырхъазыпI. АкъральгIвына ахъысра дрымчтI зпсадгьыл ахьыла йгIацапахуа Апсны акъральгIвчва рыхъазла.

Апсны ахIаракьатчпагIвчва йгIащаквдыргылхыз агвчIагIвчпара мгIвайсра «ХIара хIадгылтI» йгьи Москва апсуа диаспора ауысхагIвчва Апсны абзазагIвчва ргIахчара йгьи азгIва шIыц абакIра йырзынархата Апсны йызлацхърагIуш ахча шазыркIкIуа ахабар дыргатI. УахьчIвала ахчата йазыркIкIхьатI сом мильуан 50 раъара.

Апсны апны акоронавирус ашIашIкIгIара згIва COVID-19 атшауацIыхра абакIра йацхърагIарныс зтахъу зымгIвагьи амаль рымапI ахча аларцIарныс Апсны Республика апынгьи Россия Федерация апынгьи Москва апсуа диаспора абанк реквизитквала йа«ХIара хIадгылтI» мгIвайсраареквизитквала йгьи Трыкв Республика ахьыла Адуней апсуа-абаза конгресс ареквизитквала, йа а-Конгресс асайт апны онлайн амальла ахча аларцIарныс. Ахчата йгIаталуа зымгIва Апсны абзазагIвчва рынцIри рызгIвадари ргIахчара йазалхта акоронавирус ашIашIкIгIара згIва COVID-19 абакIра йазынадырхуштI.