Апрель а 11 амшла Апсны апны COVID-19 згIва хгIвы йшгIарахвыз гIадрыбергьыльтI. ЙчмазагIвхаз зымгIвагьи Гагра апны йбзазитI.
Апсны апны йагIвсыз ауахъи атшыни руацIа акоронавирус шIкIгIара йхынхауата йгIадрыбергьыльтI, йхIватI амедицина уысквала аоперштаб аунашвачпагIв йтарагылыгIв, Апсны Республика азгIвадарахчара аминистр йтарагылыгIв Конджариа Алхас акъраль абзазагIвчва йрызцауа йансимш тшазынархара апны.
Ауи йшгIайхIвазла, акоронавирус ауысла атест йгIанарбатI апхъа йчмазагIвхаз агIвыджь йрыщтаныкъвуз ужвыгьи заджвы ауи азгIва шгIайахвыз.
«АчымазагIв асквш 1925 агIан дйытI. Ауи йхъа йыркIьыдатI, аъачIвагIагIвчва йхъпшылитI. Ауи йзгIвадара аъащата йызтагылу, йшырпхьадзауала, квтанайта йхIатлапI. Ауи акIвпIта, уахьчIвала ареспублика апны акоронавирус згIва хгIвы йшгIарахвыз щаквдыргылтI», – йхIватI Конджариа йгIачважвара далгауата.
Аминистр йтарагылыгIв йшихIвазла, апхъа йчмазагIвхаз агIвыджь Гвдауыта аквта чымазагIвтара апны йщтIаркIвапI, ауат раъаща тшгьампсахтI.
ЙагIвсыз ауахъи атшыни руацIа ужвыгьи пщгIвы коронавирус ауысла атестква йыркIылстI. Ауат зымгIвагьи ргIарбараква удрыразитI.
Конджариа Алхас йатайхIвахтI Апсны апны акоронавирус ауысла «йбылуа» алинияква шынхауа.
«0303 номерла акъральгIвчва телефон йас йауаштI айъазара цхърагIара ауысла, 0404 номерла – психология цхърагIара ауысла, Апсны ауацIауысква рминистерства апынгьи йынхитI «йбылуа» линия, абар аномер – 920-20-95», – йхIватI ауи.
Гагра акъала унашвахъцIарта апны айззара
Апсны апны COVID-19 гIазахвыз ахыгIвгьи Гагра йауапI. РыцIа паса акъраль аунашвачпагIвчва ашIкIгIара тшауацIнадымрыхырныс ахъазла амальква нарахвтI, йалкIгIата Гагра апны комендант сахIат щаквдыргылтI.
Апсны Республика апрезидент йхъвдаквцIараква зырхъйауа, апремьер-министр Бганба Валерий апрель а 11 атшын Гагра район аунашвахъцIарта апны айззара акIвйыршатI. Бганба айззара йалаз йрыхъвдаквицIатI акъала йгьи арайон депутатква рунашва йацIата акъральгIвчва рхъаркIьыдара шакIвшауа йахъпшылуаш аджьгарыгIвчва гвыпква гIандыршарныс. ЗунагIваква рпны тшзыркIьыдарныс амаль змам абзазагIвчва 14 мшкIла тшандыргIал йъауаш атыпквагьи щаквдыргылтI.
Анйара апны арайон санитар-эпидемиология къвырльыкъвхарта йгьи айъазара нхартаква рынхагIвчва аправительства ахъада йпахь арайон апны нхарата йакIвдыршауа ауысла йгIачважватI:
«АцхърагIара ласы агIвмашинакI температура зму ачымазагIвгIвацаква йрызцитI. АйъазагIв акоронавирус шIкIгIара агIарыбергьыльра ауысла тест акIвыршара атахъыта йпхьадзузтын ареспублика санитар-эпидемиология къвырльыкъвхарта йрангIалитIта архъвыхраква злакIвыршачIву апкъыгIваква азыркIкIитI. Ажва ахъазла, йахьчIва ауат йрапшу ачымазагIвчва пщгIвы йнадзун», – йхIватI Гагра чымазагIвтара айъазагIв хъада Аргвын Вячеслав.
Ауи йширытамамызла, ачымазагIвтара ахъыхчара амальквала йнахъауата йадгалапI, компьютер томография зларчпуш ъамапсымагьи аъапI. АрапхIаква йызларайъазауа аъамапсыма ауысла баргвыра йанйатI, ауаса гIамта айшысдзала ачымазагIвтара ауи апш гIвъамапсыма шIыцкI гIаргуаштIта йазпшитI.
«Айъазарта йыцIу ачымазагIвчва гьщардагIвым, уахьчIвала ауат 25-гIв йнадзитI, ръапкътлапкъква йрыду азгIваква ракIвпI йыззыщтIу», – йгIацицIахтI айъазагIв хъада.
Асквш 2020 мартI а 24 йгIашIарышвта Апсны аунашвачпагIвчва акоронавирус ашIашIкIгIара згIва Covid-19 йабакIуата Апсны абзазагIвчва ргIахчара знархару амальква нарахвтI. Ауи апшта, уагIа щарда злу айззараква гьакIвдыршахуам, апхьартаква амцIырщттI, акъральыгIва нхартаква рынхаразаман ахъадрыстI, афачIвтйыртаква, йхъаду абзазага пкъыгIва тйыртаква, аптакьква ракIвымкIва анахьанат аткванква зымгIва адыркIытI, ауагIа хвитта йгьынкъвырыжьуам, ауасамцара.
Асквш 2020 мартI а 28 йгIашIарышвта ГвжважвагIва аъаща хабза щата амата араса йщаквдыргылтI: гIамтакIла Апсны йгьи Россия ркъральгIвына хъысырта хъыргIватI, ахъысра йахвиту арра къвырльыкъвхагIвчви адипломаткви йырхъазыпI. АкъральгIвына ахъысра дрымчтI ареспублика ахьыла йгIацапахуа Апсны акъральгIвчва рыхъазла.
Апсны ахIаракьатчпагIвчва йгIащаквдыргылхыз агвчIагIвчпара мгIвайсра «ХIара хIадгылтI» йгьи Москва апсуа диаспора ауысхагIвчва Апсны абзазагIвчва ргIахчара йгьи азгIва шIыц абакIра йырзынархата Апсны йызлацхърагIуш ахча шазыркIкIуа ахабар дыргатI. УахьчIвала ахчата йазыркIкIхьатI сом мильуан 55 раъара.
Апсны апны акоронавирус ашIашIкIгIара згIва COVID-19 атшауацIыхра абакIра йацхърагIарныс зтахъу зымгIвагьи амаль рымапI ахча аларцIарныс Апсны Республика апынгьи Россия Федерация апынгьи Москва апсуа диаспора абанк реквизитквала йа«ХIара хIадгылтI» мгIвайсраареквизитквала йгьи Трыкв Республика ахьыла Адуней апсуа-абаза конгресс ареквизитквала, йа а-Конгресс асайт апны онлайн амальла ахча аларцIарныс. Ахчата йгIаталуа зымгIва Апсны абзазагIвчва рынцIри рызгIвадари ргIахчара йазалхта акоронавирус ашIашIкIгIара згIва COVID-19 абакIра йазынадырхуштI.
швталра йа тшаншвцIара атахъыпI.