Адуней апсуа-абаза конгресс Гвдауыта йаъу Дбар Сергей йыхьыз зхъу Апсны ауагIа р-Абашта айсра АкъральыгIва музей аэкспозиция йахъвыкIу агараква гIвымшкIла йатдрыпауа ргIарбарта адгалра йацхърагIатI.
АгIарбара агIахътIра Апсны ауагIа р-Абашта айсра апны айгIайра асквш 30 артлапIари Гвдауыта амузей ангIахъыртIыз амши йрыквдыршван йадыргалтI. АгIарбарта апны гара 30 гылапI – ауат зны йчкIвынчвахвыцыз, уацIыхъван хъачва-фырхата з-Псадгьыл Апсны ахъазла зхъа щтIазцIаз айсчва ртгIачваква йырчIвын. Гарипхьадза йызчIвыз атгIачва рхабар зну швъа ацпI. Аэкспозиция йалапI айсра агIан йхъырхта амузей йрыму акIартквагьи. ЙгIалырхыз акIартква афронт йаъаз айсчва гвыпква рныпI. АгIарбара йапшныс йгIайыз ауагIа сквш 30 зхъыцIуа асуратква рбатI, ауат рпны йырдыруа, йырцрийу рыгIвычIвгIвысквагьи гIараутI.
СогIвым йаъу АААК ауысхарта аунашвахъцIагIв Реквава Темур асасчва йрайгвауата тшырзынайырхатI.
«Асасчва тлапIаква, йхIгвапапI араъа швгIахIрайгварныс. Адуней апсуа-абаза конгресс йанакIвызлакIгьи хIтурых, хIуагIахъара, хIгвбайара гIащаквызжьуаш анархараквала йшынхуш йащтапI. Ари апроект хIъалу хIара чIахIратагьи хъвдаквцIара дутагьи йыгIбитI. АААК ЙхIаракIу асовет аунашвачпагIв Эгьзакь Муссагьи анхагIвчва гвыпгьи рыхьызла пIатIу шшвыквхIцIауа швасхIвра, афырква зыгIзаз анчва квырмыш рзысчпара стахъыпI. ХIара хIгIархвитыгIвчва хвду рзыгIбитI, зынгьи йгьхIхъаштылуам. ХIшырзыразу расхIвра стахъыпI Дбар Сергей йыхьыз зхъу Гвдауыта амузей анхагIвчва гвып шабгугьи кIьыдата – Гвагвыца Шалико йпхIагьи. Ари хIара хIацыта йхIырхъйаз йапхъахауа проектпI, ауаса ауи шымцIыхъвахуш кьангьаш гьазгIазгуам. ХIара мурадква щардапI, ауат зымгIва дукI йнамиуата хъйара рауаштI. УахьчIва араъа, «Гвма» ауатыкв апны йадгалу агIарбара – хIара хIтурых шIыц акIвпI. Ауи хIуагIахъа йырхъмаштылрапI йгьи йыруахьчIвамшпI!» – йхIватI ауи.
Амузей адиректор Джьыкьырба Гвагвыца ари аэкспозиция шгIаншаз, аэкспонатква шазыркIкIуаз гIалгвалашвахтI.
«Сара зпа айсра даладзыз пхIвыскI дгIасыхIватI лпа йгара хIмузей йыгIвнахIыргылырныс. Зынла сгьадымгылтI: са сшхъвыцуазла, ауи аунагIва йгIанхара, атшгIва адзхъа йгылазара атахъын. Ауаса мшкIы йкIадрышвхыз гаракI хIадагIвачата сахъанагатI. Сгвы гIасыцIастI, Анчва мгIва сыквицIауата йызбан апхIвыс йылхIваз садгылхтI. Абарауаса йапхъахуз айсыгIв йгара согIата йгIасахвтI. УацIыхъван Апсны шабгу ауат азскIкIуа сахъыкIвшатI. Йаргьи абари аэкспозиция гIаншатI», – лхIватI ауи.
АААК йынхауа Квициниа Есма СогIвым апны агIарбарта адыргалырныс ргвы йшгIанагыз лхIвахтI.
«Ари аэкспозиция Гвдауыта йаъу Дбар Сергей йыхьыз зхъу амузей йачIвыпI. Апроект гIалазгаз Джьыкьырба Гвагвыца лакIвпI. АААК йатдрыпауа агIарбарта СогIвым апны йадгалра ауыс йацнакIтI. Араъа йгIарбу апсуа гараква рщарда сабита йыртарыгIзаз йгьабанпаракIым. РахIа «йахIбу» агара сквшышвкI аъара ахъыцIитI. Ауи Апсны агIв-ФыркI – Игори Марини гIазлыцIыз ТаниаргIа ртгIачва йырчIвыпI. ДзачIвызлакIгьи йбзазара ахабар угвы цIолата йалалитI. Ауат хIара хIадызкIылуа, хIбзазарныс лшара хIызтыз турыхпI», – йгIалылкIгIатI Квициниа.
АгIарбарта гIвымшкI йынхатI. Ауи агIамта ауацIа ауаъа сасчва бзидздзагIв гIадгылтI. Ауат агIарбара йгIарыланацIаз алахIвараква хIыцагIвыршатI.
«Апхъапхъа тIакIвгьи хIъанквынхатI – ари агIарбара йамагIну зынла хIакъыль гьазымцатI. Ауаса адекция хIаназдзыргIвы йыгIдыртI: йапхъахауата – арат аэкспонатква «агара»-хIва йшрыпхьауа, йгIвбахауата – араъа йгылу гарипхьадза турых цIола шапщылу. Ауи угвы йнадзитI йгьи уарыгвмачIитI. ЙахьчIва асабиква а-Псадгьыл, афырква рыхъазла уыса йгIапхьун, анчваквагьи дасу рхабарква рхIвун. ХIара ажваква зымгIва гьгIахIгвнымгIвуазтI, ауаса йхIылахIхIвун… Квырмыш ду рзыхIчпитI афырквагьи ауат ранчвагьи. Шв-Апсны амамыри арахIмати агымхатI!» – ллахIвараква хIзыгIахъылтIтI Воронеж йауу асас Ирина.
Ари йапшу ахъмаштылра уысква алдзгIараква рхьыгIали айгIайра алахIварали йырчвыпI. Ауи йацта араъа йанакIвызлакIгьи йубитI насып гIазныпщуа асабиква рылакви хIкъраль агвыргъьахъв хъада азпшри. Айсра ахъмаштылра йгIаныцIитI айбащраква рпны йгIахънымхIвыхыз шухъмаштылуа. Ауат хIгвква йъадзарту хIуагIахъа бзазитI.
«Гвма» акультура уатыкв апны йадыргалыз агIарбара анхара алгитI. Аэкспозиция экспонатипхьадза «хъацIакIырта гIанайаута» йапынхаз Гвдауыта йаъу Дбар Сергей йыхьыз зхъу амузей йцахитI.
швталра йа тшаншвцIара атахъыпI.