Атеатр гIарбартаква рпны йапхъахауата йдыргылтI Апсны апны зыхьыз ауагIа йгIарылахаз апхIвыс – совет заман агIан йкъральыгIва уыснкъвгагIв дууыз ЛакIоба Нестор йхъапщыла – йгIалыквчважвауа спектакль. Апсны адрама театр апны «Сариа» лыргылтI арежиссер Аргвын Мадина.

ЛакIоба Сариа зымгIвагьи рыцIа дызлардыруа «ауагIа драгъата» зхьырцIаз лхъацIа йычвгьа лхIварныс дъазадырцалуаз НКВД (АуацIа уысквала АуагIа ркомиссариат – СССР акъральыгIва хъахчара зыхъвдаквыз аквта къральыгIва уысхарта – аредакция ррытаразга) атутанакътара апны багъьарата йгIалырбаз акIвпI. ЛакIоба Нестор данырщы амщтахь йзаъачва ркIуа йалагатI, ЛакIоба Сариа асквш 1937 август а 17 атшын дыркIытI. Йызбаз йшырхIвахуазла, Сариа хъацIара лылата гIвысквша руацIа йылхътырхуаз лчхIан сквш 35 дыртата Грузия атутанакътара ачымазагIвтара апны дпсытI. ДъацIарцIаз заджвгьи йгьидырам.