Черкесск апны ансисквша йадыргалуа акультура-спорт фестиваль «Абаза» йаланакIуата йдыртлапIатI Апсуа-абаза культура амш йгьи Апсны абаракъ амш.

Айсан Людмила

Июль а 23 атшын Черкесск апны йдыртлапIатI Абаза культура амш йгьи Апсны акъральыгIва баракъ амш. Агвыргъьарамш адыргалтI Абаза-апсуа уагIа ртшауацIыхра ацхърагIара знархару адуней адкIылара «Алашара» йгьи Адуней апсуа-абаза конгресс.

Агвыргъьарамш ГIвадахь Россия апны рыцIа йпхатшу атшпсщара парк «АдзыгIвбжьа йачIва» апны йакIвшатI. Ауи ансисквша йакIвшауа акультура-спорт фестиваль «Абаза» йахъвыпI. VI Абаза хъвмарраква рымщтахь «АдзыгIвбжьа йачIва» апны знархараквала йапшымыз ауатыквква рынхара адыргалтI.

Асасчва гIальаматра ду азрыман абаза пшцIа, ауи йтшкIарагылаз апхъанчIви тдзы апхъала йынкъвыргуз аунагIва хIапчыпквала, амачваквала йадгалан. Асасчва абаза рызкъква рыздрыхIазыртI. Ауат зшIашваз зымгIвагьи йрымаджьащахъвата рхъгIари ррыхIазырщи гIалыркIгIатI. Абаза ашвакви акъвабыз макъымкви йашIамсуа йгун, хвыцгьи дугьи ауи йгIащтIнахуа агIахIвраква йрылалуан.

ЙалкIгIата ауагIа щардан абаза уагIа ртурых йгIарыквчважвуз астендква, анапIлачпара ршIыйара апкъыгIваква ргIарбарта йгьи АААК астенд рыдзхъа. Араъа йбаргвым анкета йтагIвыта йызтахъу зымгIвагьи а-Конгресс йалалырныс амаль рыман.

Агвыргъьахъв гIахъыртIуата ауатыкв йгIатаргатI зганла, зурала йдууыз абаракъ. АпшыгIвчва, асасчва тшырзынадырхауата йрайхIвахIвтI акъральыгIва уысхагIвчва, ажвлара уыснкъвгагIвчва, агIвымакъраль гIащтийыгIвчва, акультура анхагIвчва. ЗымгIвагьи йгIалыркIгIауата йалачважватI агвыргъьарамш хIаракIыта йшадгалу.

«Алашара» адкIылара авице-президент Мыхц Рамазан йшихIвазла, ауат «адгалра нхара ду акIвдыршатI», ауи йащтагIайыз адахIвраква уагIа щардагIв ргIапсара алапI: акъральыгIва нхартаква, ажвлара руысхагIвчва, зтахъырала адгалра уысква йгIарылалыз, згвы цхIауата хъатакIла йгIанымхаз ауагIа.

«Асквш 2014 агIан Къарча-Черкес республика ауагIахъаква рминистерства аъачIвагIагIв Айсан Людмила дгIахIцхърагIан ареспублика зымгIва гIацIанакIуата йакIвхIыршатI афестиваль, ауи амщтахь ауагIахъа азазаъащаква рагъьчIвра знархараз агрантгьи гIатыгIгатI. Ауищтара гIамтата йагIвсыз гьщардам, абар ужвы агIвыма къральквагьи алата абаза уагIа адызкIылуа адуней спорт-культура фестиваль ду хIаквшахIатта йакIвшитI», – йхIватI Мыхц Рамазан.

АААК ЙхIаракIу асовет аунашвачпагIв йуысхарта ахъада Таниа Кан йшгIаликIгIазла, амагIны швабыж йдупI Апсны Республика акъральыгIва баракъ амшгьи Абаза культура амшгьи аквшвауата йъакIвшауа – ари апш щаквыргылра гIазгыз адгалагIвчва ракIвпI.

«Ажва аламкIва ауи хIуагIи адунейла къраль 50 райхIа йтабзазауа агIвымакъраль диаспори араргванитI, йаднакIылитI», – йхIватI Таниа.

Ауи йгIаликIгIатI анцIралагьи йхIхъмаштылуата хIгвы йтазара атахъу: хIкъральыгIвара ащаквгылра, атшауацIнарыхра йырдамыгъу акъральыгIва баракъ гIащаквхара ахъазла «Апсны апачва, апхIчва щардагIвы рхъа пшцIарцIатI».

«ХIара хIгьахвитым ауи хIхъхIраштылырныс. Ари амш хIадгылри хIабаргвышхвари йырдамыгъата хIаргванызчIвуа цIас пшдзата йанакIвызлакIгьи йщаквгылазтI», – йхIватI Таниа Кан йажва найырдзахуата.

Агъырдзы шашIамсуазгьи агвыргъьахъв рыцIа-рыцIа тшауацIнахуан. АуагIа йрымаджьащахъвата агIарбартаква йгIарыкIвшун.

Араъа зымгIва йрахIбаз, сквшы 89 зныбжьу амшIычпагIв ъаза Айсан Кьащиф йгвапата йынхараква гIайырбун – амшI швындыкъварачкIвынква.

«Сара апхъалагьи салан афестиваль, швабыж сайгвыргъьитI абазаква шIырпшыра змам абари алшара ъахIыму хIабабарныс, хIыршIыйара гIайырбарныс ахъазла», – йхIватI ауи йгвгIанаграква хIыцагIвишауата.

Хъачва щардагIв напIыла пшдзата йчпаз ахIваспаква разкIкIра йахъагылан. ЙшгIацIцIызла, ауат анхараква зчIву ТхIаквщын Зураб йакIвпI, ауи йнапIква айха, амшIы йгьи асахтан йрызъазапI, афестиваль йапхъахауата дгIалалтI. «Арат йгIасырбауа абаза хIваспапI», – йхIвитI Зураб арыпшдзагаква абаза цIасла йшчпу гIаликIгIауата.

Ауи Хъвыжвду кыт дауапI, гIамта ауыра йцришта дачвыхъарата дбзазатI, хвысквша рапхъала дгIайхтI. Сквшы 20 райхIа цIитIта ахIваспаква рчпара дхънахитI, ужвы ауи йынхараква интернет амальла йтйитI. Йуыс йхънахыз ачкIвынчвагьи ъайбжьаз йхъа аладухитI. Ауат йрыуапI Джьджьу Зураби Гьадыгв Мурати. Ауи магIны ду амапI абаза культура азъазари аршIыйари ргIахчара апны.

ЙгIванхауата афестиваль дгIалалитI Черкесск йтагылу Гагарин Юрий йыхьыз зхьзу асаби ршIыйара атдзы арыпхьагIв Шармат Жанна. Ауи йылгвапата йгIалырбитI йылбжьауа асабиква рынхараква: алапарала, тыдзахрала, кIыдцIларкIлара йадгалу аршIыйара. Сквшы 33 цIитI Жанна асабиква напIлачпара-ршIыйарала дрыдынхалуищтара. Ауыс йазычпу чкIвынргIа рыхъазла абари йапшу ауатыкв ъагIаншаз магIны ду амата йылпхьадзитI. Швапхата дгIалгтI дыздынхалуа апхIвыспачкIвын КIарма Самира. Самира аларпара амальла йылрыхIазыруа анхараква йхIаракIу анкъвакъвраква рпны йызнымкIва апхъагылара гIатыргатI.

АПСНЫ АПНЫ АБАРАКЪ АМШ ШДЫРТЛАПIАЗ. АСУРАТКВА>>

Афестиваль апрограмма байан, ауи йалазгьи асасчвагьи хъызхуаз щардан. ЩардагIвы гIальамтра ду азырбатI хвноминациякIла йадгалаз ауагIахъа фашаква ранкъвакъвра, ауи йалан 20-гIвы райхIа – зыбызшвала йапшым Къарча-Черкес Республика абзазагIвчва.

«Асквш ащхъагIв» хьзы ачкIвынчва рпны йквнадыргатI Хачиров Бислан, ахIвссаква рквтала – Микитова Олеся. АпшыгIвчва ргвапхарала йгIалырхыз асогIа лыквшватI Йуан Марина. РахIа йшIу анкъвакъвыгIвчва рыхъазлагьи йазалху асогIаква аъан – ауат рквнадыргатI ГIвытакъвыл Амири КIвращын Амалии.

Хъвлапны аннадза уагIа 1000-гIвы райхIа амфитеатр апны тшазыркIкIытI, араъа йакIвшун апсуа-абаза ашвакви агIахIвракви рконцерт. Йазалху сасчвата аконцерт йалан Азизова Саида (ашвахIвара анкъвакъвра «Орфей» йалаз йгьи апсуа бызшвала йагъьу ашвахIварала АААК асогIа зквнадыргаз – аредакция ррытаразга) йгьи Таниа Саниа.

ВидеогIвыра амальла афестиваль йалаз тшырзынадырхан йрайхIвахIвтI Адуней апсуа-абаза конгресс ЙхIаракIу асовет аунашвачпагIв Эгьзакь Мусса, Трыквшта апсуа культура квтаква рфедерация аунашвачпагIв Аквсба Атанур йгьи АААК ЙхIаракIу асовет йалу, Апсны республика ауагIа рыршIыйара аквта аунашвачпагIв Кварчиа Нури.

Агвыргъьахъв ажвгIванд йаларыжьуа амзакIкIара зигIва пшдзаквала йалдыргатI. АуагIа кьахвта, рнашх лашарата, хIапхъагьи Абаза культура агвыргъьахъв атшын йатанйахырныс йайгвгъауата йамцIыцIхуан. Афестиваль апны йагIвзачва шIыцхаз рыцIа пасагьи йаташIашвахырныс рмурадпI. Черкесск апны акультура-спорт фестиваль «Абаза» ансисквша йакIвшитI. СквшигIадзапхьадза ауи йгIалалуа ауагIа рыштаква рыцIа-рыцIа тшауацIырхитI, агвыргъьахъв программа рыцIа-рыцIа йдухитI, йгIащтIнахуа ахъатаквагьи йрылахIитI.