АААК ахабарргарта портал Апсны Республика ажурналистква радкIылара анкъвакъвра апны йайгIайын йагъьу ажурналист нхара знархару асогIат гIатнагатI.
Апсны ажурналистква радкIылара йаднагалыз «Асквш 2019 апны йагъьу ажурналист нхара» зхьзу анкъвакъвра далауреатхатI Адуней апсуа-абаза конгресс апортал акорреспондент Барганджиа Саид. Ауи йбзагIвра «ЗынцIра скульптура йалата йызгаз: апсуа хIвсысаква йрыуата йапхъахуз аскульптор Эшба Марина лхабар» аноминация «Арадиуа, ахабарргарта агентстваква, аинтернет-гIацIщтраква» апны йапхъахауа асогIат гIатнагатI.
Ари агIаншара даквчважвауата Адуней апсуа-абаза конгресс ЙхIаракIу асовет аунашвачпагIв Эгьзакь Мусса йшгIаликIгIазла, гIамта айшысла АААК апортал апсуакви абазакви ркультура, рцIасква, ртурых хвы аквызцIауа, уахьчIвала ауат рбзазара аъаща гIальаматра азызбауа зымгIва рыхъазлагьи йбергьыльу йгьи магIны зму хабарргарта гIалцIыртата йщаквгылтI.
«АцынхагIвчва йгIадырбаз ахв хIагIа – агвыргъьара йашвхIаусыгIвагIвацата йгьгIанхум, ауи йгIахIнардыритI рыцIа йхIагIу амурад шIыцква хIпахь йхIыргылра шатахъу. Апортал ахачIвква багъьата йщаквгылапI: ауи адунейла апсуа-абаза диаспора адызкIылуа квтахара атахъыпI», – йхIватI Эгьзакь Мусса.
АААК ЙхIаракIу асовет аунашвачпагIв айгIайра гIатызгаз ажурналистгьи йхъатала дйайхIвахIвтI.
«Швабыж сайгвыргъьитI Адуней апсуа-абаза конгресс ахачIвква Барганджиа Саид йапшу ажурналист гврыхваква йъадырхъйауа. Йшспхьадзауала, ауи йдахIвра агвып шабгу йыргIатгарапI. Сара Саид гвыхътIыла сйайхIвахIвитI», – йхIватI Эгьзакь Мусса.
АсогIат гIатызгаз абзагIвра автор, АААК ажурналист, апресс-секретарь Барганджиа Саид Апсны ателебара апынгьи акIвыршагIвыта дынхитI. Ауи йгIайквнадыргаз асогIат хвду шаквицIауа йхIватI: йапхъахауата, ауи йынхара пычIвта анкъвакъвра йалан, йгIвбахауата, ажурналист йшипхьадзауала, бызшва щардала йынхауа АААК агIацIщтра уахьчIва уыста йархъйауа амагIны швабыж йдупI.
«ЙалкIгIата сара швабыж йсгвапахатI хIхабарргарта портал йгIаквшваз агIвыра ахъазла согIат ъагIасквнадыргаз. Апсуа, абаза гIвычIвгIвыс дудздзаква цбызшвакIла йгIарыквчважвауа агIацIщтра абзирала йапшым акъральква йыртабзазауа хIабашталагIвчва йрылшитI ауат рхабар дара йраргвану абызшвала тшахадыргIвазарныс», – йхIватI Барганджиа.
Датшагьи ауи йгIаликIгIатI АААК ахабарргарта портал анхагIвчва гвып ари ауыс къару ду шаларцIаз, ауат йрыуапI асуратхъыхыгIв АгIвдза Наала, аредактор Солдатенкова Ольга, апортал аунашвачпагIв Лазба Амина.
«Ауи апш уыс йадынхалуа йгьзаджвым, йгьгIвыджьым. ХIгIвыраква зымгIва йрылата ари сгIвырагьи йадгIапсалтI асуратхъыхыгIв АгIвдза Наала (ауи асурат гIальаматква адылкIылырныс лылшатI), аредактор Солдатенкова Ольга (ауи сгIвыра апны йгIасырбарныс стахъу йанакIвызлакIгьи тамамта йлылалхIвитI) йгьи хIунашвачпагIв Лазба Амина. Амина лыхъазла ду-хвыц гьаъам, ауи агIвыра йъадзадынхалуа аъара дахъагылапI», – йгIаликIгIатI ажурналист.
Адуней апсуа-абаза конгресс ахабарргарта портал аунашвачпагIв Лазба Амина йшылхIвазла, агвып апхъахьылагьи апхьагIвчва агIвыра джьащахъваквали апроектквали йдыргвыргъьуштI.
«АцынхагIвчва хIынхара гватра ъазырбаз ахъазла швабыж хIырзыразпI», – лхIватI Лазба.
Апсны ажурналистква радкIылара анкъвакъвра ансисквша Ахабарргарта нхагIвчва рымш йадахIвуата йакIвшитI. СынчIва айгIайра гIатызгаз йрыуапI йапшым ареспублика хабарргартаква рынхагIвчва. Ауи апшта, «Ателебара» номинация апны йагъьу нхарата йгIалыркIгIатI Апсны ателебара ажурналист Мыквба Наала йакIвлыршауа атра абаркIыра «Ахъахвитра». «Ансимш аквцIара гIацIщтраква» («Периодическая печать») номинация апны йгIвыра «УыжвгIанчIви хIвар» гIалыркIгIан йапхъахауа асогIат йквнадыргатI «Апсны» газет анхагIвчва йрахIбадзу ажурналист Каджая Борис.
швталра йа тшаншвцIара атахъыпI.