АААК аинфопортал аиааира агеит Аԥсны ажурналистцәа реидгыла имҩаԥнаго аконкурс аҟны, иреиӷьу ажурналисттә усумҭазы апремиагьы анашьахеит.
Аԥсны ажурналистцәа реидгыла имҩаԥнаго аконкурс «Иреиӷьу ажурналисттә усумҭа 2019» алауреатс дҟалеит Адунеизегьтәи аԥсуа-абаза конгресс апортал аҟны аус зуа акорреспондент Саид Барганџьиа. Иара иочерк «Лыԥсҭазаара аскульптураҿы: раԥхьатәи аԥсуа ԥҳәызба-аскульптор Марина Ешԥҳа лҭоурых» актәи апремиа анаршьеит аноминациа «Арадио, аинформациатә маҵзурақәа, аинтернет ҭыжьымҭақәа» аҟны.
Ари ахҭыс ахҳәаа азуа, Адунеизегьтәи аԥсуа-абаза конгресс Иреиҳаӡоу ахеилак ахантәаҩы Мусса Егзакь иазгәеиҭеит аамҭа кьаҿк иалагӡаны АААК апортал хьӡы змоу, акыргьы зҵазкуа информациатә хыҵхырҭас иҟалеит ҳәа аԥсуааи абазақәеи ркультуреи, рҵас-қьабзқәеи, рҭоурыхи ҳаҭыр ззақәу, иахьатәи ҳажәлар рыԥсҭазаашьа иазҿлымҳау зегьы рзы.
«Ҳколлегацәа рҟынтә ахәшьара ҳаракы аиура – узеигәырӷьаша акоуп, ҳәарада, аха уи агьдыргоуп – иҿыцу аҩаӡарақәеи, иҿыцу ахықәкқәеи рызцара шаҭаху ҳзырбо. Апортал ахыдҵақәа ԥсахрада ишыҟоу иаанхоит: адунеи зегьы иалаԥсоу аԥсуа-абаза диаспора ахаҭарнакцәа зегьы еимаздаша ҭыԥны иҟазароуп», – иҳәеит Мусса Егзакь.
АААК Иреиҳаӡоу ахеилак ахантәаҩы аиааира згаз ажурналист иқәҿиара идиныҳәалеит.
«Сара сеигәырӷьоит, Саид Барганџьиа иеиԥш иҟоу абаҩхатәра змоу ажурналистцәа Адунеизегьтәи аԥсуа-абаза конгресс ахықәкқәа ахьынарыгӡо. Иара иигаз аиааира – аколлектив зегьы ириааироуп ҳәа сыԥхьаӡоит. Гәыкԥсыкала идысныҳәалоит Саид», – иҳәеит Мусса Егзакь.
Апремиа зауз аочерк автор, АААК ажурналист, апресс-маӡаныҟәгаҩ Саид Барганџьиа – Аԥсуа телехәаԥшраҿгьы амҩаԥгаҩыс дыҟоуп. Иара иазгәеиҭеит ари аҳамҭа иара изы иҷыдоу аҵакы шамоу, избанзар иусумҭа раԥхьаӡа акәны аконкурс иалахәын, насгьы, ажурналист излаиԥхьаӡо ала, бызшәарацәала аус зуа АААК аинфопортал ахаҭа иахьатәи ҳаамҭазы аҵак ду амоуп.
«Еиҳаракгьы сгәы иахәаз – аҳамҭа Аконгресс аинфопортал аҿы иҭыҵыз сматериал иахьанаршьаз ауп. Ф-бызшәак рыла ицәажәо аҭыжьымҭа адунеи еиуеиԥшым атәылақәа ирықәынхо ҳауаажәлар алшара рзаԥнаҵоит Марина Ешԥҳа леиԥш иҟоу иналукааша ҳмилаҭ ахаҭарнакцәа рыӡбахә адырра», – иҳәеит Барганџьиа.
Иара иҳәеит убасгьы, ари аиааира АААК аинфопортал аусзуҩцәа зегьы рџьабаа шаду, хаҭалагьы иаликааит: афотоҭыхҩы Наала Аҩӡԥҳа, аредактор Ольга Солдатенкова, апортал анапхгаҩы Амина Лазԥҳа.
«Ари аус знапы иҵыҵыз сара сымацара сакәӡам. Апортал аҿы иҭыҵуа ҳматериалқәа зегь реиԥш ари аочеркгьы аус адырулеит афотоҭыхҩы Наала Аҩӡԥҳа – лара еидылкылеит иуникалтәу афотоархив, аредактор Ольга Солдатенкова – уи еснагь исҳәарц исҭахҵәҟьоу лныруеит, иара убасгьы, ҳәарада, ҳнапхгаҩы Амина Лазԥҳа – лара амаҷ-аду ҳәа еилых ҟалҵаӡом, аматериал аус адаҳулонаҵы ахы инаркны аҵыхәанӡа уааигәа дыҟоуп», – иҳәеит ажурналист.
Адунеизегьтәи аԥсуа-абаза конгресс аинформациатә портал анапхгаҩы Амина Лазԥҳа лакәзаргьы ажәа ҳалҭеит, аколлектив ари нахысгьы аԥхьаҩцәа рзы аинтерес зҵоу аматериалқәеи апроектқәеи шаздырхиало.
«Ҳколлегацәа иҭабуп ҳәа раҳҳәоит иҳарҭаз аџьшьаразы!» – лҳәеит Лазԥҳа.
Аԥсны Ажурналистцәа реидгыла есышықәса имҩаԥнаго аконкурс аихшьалақәа ҟарҵоит ҳтәыла амассатә-информациатә хархәагақәа русзуҩцәа рымш инақәыршәаны. Сынтәа аиааира згақәаз иреиуоуп еиуеиԥшым амассатә-информациатә хархәагақәа рҟны аус зуа ажурналистцәа. Убас, аноминациа «Ателехәаԥшра» аҿы иреиӷьу ҳәа иалкаан Аԥсуа телехәаԥшра ажурналист Наала Мықәԥҳа лдырраҭарақәа рцикл «Ахьыԥшымра». «Апериодикатә кьыԥхь» аноминациаҿы актәи апремиа ианаршьеит акыршықәса раахыс агазеҭ «Аԥсны» иазааԥсо Борис Қаџьаиа иматериал «Ҳаамҭазтәи ажәамаана» азы.
шәҭалароуп, ма шәыҽҭажәыҩроуп.