Адуней апсуа-абаза конгресс ауысхагIвчва Гвдауыта йхвбахауа апхьарта дзцага азыргатI.
Барганджиа Саид
Гвдауыта апны йгIаныршу Адуней апсуа-абаза конгресс ашIыпIа хъвшара асовет ауысхагIвчва Гвдауыта йхвбахауа апхьарта дзцага азыргатI.
Асквш 1996 агIан апхьарта йаластI. Амцаблыра ауи агIан заджвгьи дгьаламдзтI, ауаса апхьарта ауищтара дзыдъа йгIанхатI: арат асквшква зымгIва араъа дзы пщырхIала йгIаргуан.
Апхьарта аунашвачпагIвчва цхърагIара йахIвауата АААК тшазынадырхатI. Гвдауыта апны йгIаныршу ашIыпIа хъвшара асовет зынла ауи ауыс архъйара ацIыхъва йтагылтI, йаргьи цымшкIла апхьарта апны метр 200 зыуру дзцага тарцIатI.
Гвдауыта апны йгIаныршу а-Конгресс ашIыпIа хъвшара асовет аунашвачпагIв ЛакIойа Амра йшылхIвазла, адзцага ахъазла ахча ауи апхъала йгIадрысабапхьаз амальла йазыркIытI. ЙгIашвгвалахIыршвахпI рыцIа пасата Гвдауыта апны йгIаныршу АААК асовет акъала агъьчIвра йазынарху гIвпроекткI «краудфандинг» ззырхIвауа амальла йшдырхъйаз, датшата йухIвушызтын, ахча шазыркIкIуала хабар дырган йзылшуз зымгIва йаларцIатI.
«Ахча, ауахьауи агIан апшта, сыгIвзачва йазыркIытI, ауат рыхьызква сымхIварныс йахIватI. Ахчаква рхъвыкI йгвалымсым акъала абзазагIвчва йгIаргтI. Гвдауыта абзазагIвчва Квеселава Эки Агрба Раульи апхьарта тшыджвджварта дзырпхагагьи ацта йазырхвгIатI, АААК йаланакIуа чкIвыныргIа рсоветква рунашвачпагIв Торчуа Леван шIаджвджвага рызгIайгтI. Акъала аунашвахъцIарта анхараква злакIвдыршушыз техника азалнахтI», – ауысква шцаз хIлырдыртI ЛакIойа Амра.
АААК ашIыпIа хъвшара асовет аунашвачпагIв йшылхIвазла, адзцага ахъазла сом 12-нызкьи 730 азыркIытI. Уыхвага пкъыгIвата йатахъыз азджьакI згвы цхIауа ауагIа йъагIаргыз абзирала ауи ахча нахъатI. ЛакIойа йгIалылкIгIатI адзцага амцIацIара сом 13-нызкь азытийра шатахъыз, ауаса адзцага АААК йаланакIуа чкIвыныргIа рсоветква рунашвачпагIв Торчуа Левани йазалху хъвдаквцIара зму АААК асекретарь, Апсны апны «Алашара» адкIылара ахъвшара аунашвачпагIв Айба Альйаси а-Конгресс анхагIвчва, апхьагIвчва, абзазагIвчва гIарцхърагIан йтарцIатI.
Апхьарта адиректор Барцыц Зулета ауыс йацхърагIаз зымгIва дырзыразта апхьарта дзыдъа йшгIапсуз лхIватI.
«Апхъала апсуна коммуникациякIгьи гьазымцузтI. Дзы – пхазтынгьи, хьшвашвазтынгьи – йара апхьарта апынгьи йгьаъамызтI. Дзы апахь йгIатахIчвунта пщырхIала йгIагIгылуан. Анчва дырзыразхатI АААК йхIыцыркIта йъагIахIцхърагIаз ахъаз, хIара ауи хвду аквхIцIитI», – лхIватI адиректор.
А-Конгресс йаланакIуа чкIвыныргIа рсоветква рунашвачпагIв Торчуа Леван АААК ашIыпIа хъвшара асоветгьи ЛакIойа Амра лхъаталагьи рынхара даквчважвауата йъачIвагIалагIв «АААК ауи дъагIарауыз дахIвра дута» йпхьадзатI.
«Ауи запшуысызлакIгьи лара йылхъатачIв уыста йылбитI. Гвалымсра гьлылам. ЙанакIвызлакIгьи ауыс йшаъу ацкIыс рыцIа йагъьта йшылчпуш дащтапI. Лцри къала ахъазла лгвы лыхьитI», – йгIаликIгIатI Торчуа Леван.
Гвдауыта апны Адуней апсуа-абаза конгресс ашIыпIа хъвшара асовет асквш 2019 октябрь а 3 агIан йгIандыршатI. Ауи анхара джьгарта йалапI аунашвачпагIв ЛакIойа Амра йгьи асовет йалу АмкIваб Инал, Джениа Алмасхан, Гицба ХIамида. РыцIа пасата асовет Гвдауыта апны аспорт турниккви аурам нышвкъваратапсартакви дыргылтI.
швталра йа тшаншвцIара атахъыпI.