Санкт-Петербург апны а-Конгресс апсыуа бызшва йъадрыпхьауа апхьарта гIахънатIытI.
Барганджиа Саид
Санкт-Петербург апны Адуней апсуа-абаза конгресс йаднагалыз апсыуа бызшва апхьарта анхара джвыквылтI. Йапхъахуз апхьарасахIат 11-гIв гIадгылтI. Ауат рныбыжьла 18 сквша йгIашIарышвта сквшы 30-дза йыртан.
Санкт-Петербург апны АААК ашта хъвшара асовет аунашвачпагIв Реквава Темур йшихIвазла, Россия Федерация алагъь къала хъада апны апсыуа бызшва арыпхьара асквш 2018 йгIашIарышвта йазхъвыцуан.
«АшIыпIа йгьи ашта советква ъагIахъыртIуа атыпква рпны, йалкIгIата Апсны утыцIта, а-Конгресс цри бызшва арыпхьари ауагIа гIахIвраква рбжьари знархару апхьартаква гIахънатIитI. Апхьартаква зымгIва абгата йа йабгамкIва ахчала дырцхърагIитI АААК ЙхIаракIу асовет аунашвачпагIв Эгьзакь Мусса», – йхIвитI Реквава ауыс зкву гIахIгвынйыргIвуата.
Ауи йшихIвазла, абызшва арыпхьара адгалра апны баргвыра хъадата йаъаз ауи йаквыргIапсу арыпхьагIв йгIаура акIвын.
«ЙцIыхъвахауата ауи апш арыпхьагIв дгIахIаутI. Апсыуа бызшвала йазрыпхьуш хIабашталагIв Векуа Аида лакIвпI. Арат апхьарасахIатква абызшва зымдырдзауата йапхьауа йалагаз йырзынархапI. Йапхъахуз апхьарасахIат зымгIвагьи йыргвапхатI», – йхIватI асовет аунашвачпагIв.
АрыпхьагIв Векуа Аида арыпхьаща нархарата йгIалылхыз даквчважвауата араса лхIватI:
«Литературата йгIахIнапIыцIашваз хIрылапшын арыпхьара йащатата Кварчелиа Ада лкнига «Апсыуа бызшва апхьарасахIат 20-ла» хъадата йгIарылхIхтI. Ари апхьага атестква, датша аудио-йгьи авидеогIвыраква ацуцIахырквын апычIв дырраква бзита йрыларкIырныс ахъазла апсыуа бызшва ззырдыруа йалагагIвацаз йрыквыргIапспI: апхьара ацIасква гIарбапI, абыжьква рхIваща тамам щаквнаргылитI, ачважвара йазнабжьитI. Сара апхьагIвчва ансимшы йырзгIарысабапуаш апсыуа бызшва дсырдырныс, ансимш чважвара рзакIвыршауата йызбжьарныс стахъыпI. Ауат апсыуа бызшва аграмматика ацIас хъадаквагьи йрыхасыргIвазуштI».
АпхьарасахIатква мчбжьыкI апны зны йакIвшалуштI.
Абызшва атема йаццауата Реквава Темур йшихIвазла, Санкт-Петербург апны джьгарта анхара мгIвайситI араъа йгIандыршаз ауагIахъа гIахIвраква рансамбль «Абаза». Ауи АААК асквш 2019 агIан йгIаннаршатI (АААК а-Устав апкъ йтата а-Конгресс мурадта апахь йаргылитI апсуа-абаза (абаза) йгьи аубых уагIахъаква рапхъанчIви рбзазаща цIаскви рхабзакви ргIахчара. Ауи ахIатырла ауагIахъа гIахIвраква рауацIыхра абызшва агIахчара апроектква йрыццауата а-Конгресс анхара анархарта хъадаква йрыуапI – аредакция ррытаразга).
Реквава йшихIвазла, ансамбль йапшым акультура уысква йрылалитI, ргIарбараквагьи бзипI.
Ансамбль аршIыйара унашвачпагIв Тарба Исмет йшгIаликIгIазла, «Абаза» йалакву абжьарасахIатква рагIан джьгарта рхъа йадынхалитI. Ансамбль йалапI жваугIахъакI райхIа йрыуу ачкIвынчви ахIвсси, 30-гIв йнадзитI, абжьарасахIатква мтшашипхьадза йакIвшитI.
Агвып йалу Шакая Мария АААК ахабарргарта портал дгIарачважвауата йшгIалгвалашвахызла, ансамбль гIандыршарныс йаназхъвыцуаз атлахан лыгIвзачвагьи ларгьи ауыс йазгIашыкъта йадгылтI.
«Ауищтара анкъвакъвра, йапшым фестиваль щарда хIрылан, йанакIвызлакIгьи дахIврала хIшгIахъвмаруаш хIащтан. Швабыж йсгвапапI ари апш амаль ъахIыму – мтшашипхьадза хIанйарныс, апсуа, абаза гIахIвраква тшырзыгIбжьарныс», – лхIватI ауи.
Апсуа гIахIвыщи абаза гIахIвыщи тшырзылбжьарныс щарда цIуата лгвы йтан дукI мцIуата «Абаза» тшгIадызкIылыз Мария лыгIвза Джьануа Маринагьи.
«Сара йанакIвызлакIгьи йстахъын ауагIахъа гIахIвраква тшырзызбжьарныс. Интернет апны щарда спшгIатI, йцIыхъвахауата «Вконтакте» (Россия апны йауацIыху асоциал сеть – аредакция ррытаразга) апны «Абаза» ансамбль рнапа сыла аквшван швабыж сайгвыргъьатI», – лхIватI апхIвыспа лгвгIанаграква хIыцагIвылшауата.
Апсны йауу астудент Хвапшыхв Арсоу йшипхьадзауала, «Абаза» ауи йпсадгьыл даргванызчIвауа гIаншара бзипI.
«Датшагьи хIара йхIылшитI хIгIахIвраквала араъа, Санкт-Петербург апны, ауагIа хIкультури хIцIаскви дхIырбарныс», – араса йпхьадзитI ансамбль агIахIвгIвы.
Санкт-Петербург апны АААК ашта хъвшара асквш 2018 ноябрь агIан йгIахъыртIытI. А-Конгресс акъарула, ауи ацхърагIарала Санкт-Петербург апны йапымшвтуата абаза уагIа ранйараква, апсуа-абаза уагIахъа ркультура знархару ахъвлапынква, агIарбартаква акIвшалитI. АААК ауысхагIвчва апсуакви абазакви ртурых йапщылу ашIыпIаква йрызцалитI, йалкIгIата, Пискарёв нышвынтара апны йгылу ахъмаштылра синква. Санкт-Петербург апны акIвпI АААК ЙхIаракIу асовет аунашвачпагIв Эгьзакь Мусса дъабзазауа.
швталра йа тшаншвцIара атахъыпI.