Адуней апсуа-абаза конгресс йгьи абзихагIвчва гвып алалта Баслахв кыт йауу, зхъахIара мачIу атгIачва йырцхърагIауата тыдз шIыц дыргылуаштI.
Барганджиа Саид
Адуней апсуа-абаза конгресс ауысхагIвчви абзихагIвчва гвыпи алалта Очамчыра район йаланакIуа Баслахв кыт йауу Чиригба Батал йтгIачва йырцхърагIауата тыдз шIыц дыргылуаштI. Атдзы аргылра джьгарта йацхърагIуштI Чиригба Батал йкытлагIвчвагьи.
Чиригба Батал дарыпхьагIв шIапI, Согъвым апны аршIыйара училища дангIалга йцри кыт Баслахв дгIацапахын акыт апхьарта апны асабиква суратчпара йазибжьитI. Ауи гIвысабичва йымапI, айцIба дсаби пшкапI. ЧиригбаргIа ртгIачва рымлыкв гьдууым, рахвы нкъвыргитI. Ужвы йъабзазауа аунагIва йтшкIаралуа дзачIвызлакIгьи апхъапхъа йыла йгIацIашвауа цкьата йалыргу, йпшдзу апшцIа гъагъа акIвпI. Ауаса атгIачва зыгIвну атдзы хвыцпI, гIвпещкI ахIа гьамам. АтгIачва амаль рымапI Очамчыра къала йталхта йбзазарныс, ауаса атгIачва рхъада Баслахв дгIатахата апхьарта апны дынхарныс, акыт атшауацIыхра дацхърагIарныс йтахъыпI, арат ауысква магIны рзибитI.
АААК апхIвысква рсоветква рунашвачпагIв Ардзынба Гета йшгIахIалхIвызла, февраль а 15 атшын акыт апны анйара анакIвшуз ЧиригбаргIа тыдз шIыц аргылра ауысла йырцхърагIарныс а-Конгресс ауысхагIвчва тшгIарзынадырхатI Баслахв абзазагIвчва (Адуней апсуа-абаза конгресс Апсны акытква, акъалаква рпны анйараква акIвнаршитI, АААК ашIыпIа хъвшараква гIаннаршитI. УахьчIва ауи апш шIыпIа хъвшарата 30 райхIа гIахъыртIхьатI, Баслахв кытгьи рылата – аредакция ррытаразга).
«Ауи анйара апны йаъаз дзачIвызлакIгьи йхIвун акыт апны гIвысабичва зму тгIачва шIа шту, айцIба дгIадрийищтара мчбыжьквакI шракIву йцIуа, ауат цхърагIара йшазыбжу. АтгIачва рхъада Согъвым апны аршIыйара училища дгIалгатI, ауи швабыж дгврыхвапI, ауаса акъала дгIатамхауата йцри кыт дгIацапахтI апхьарта апны асабиква суратчпара йазибжьарныс ахъазла. Ауи акIвымкIва ачкIвын йкытлагIвчва зымгIвагьи дырцхърагIитI. АуагIа йшырхIвазла, унагIвипхьадза йыгIвнапI Батал йнапIы зхьысыз апкъыгIваква, йауа ухIвараквын атехника дазъазапI. АбзазагIвчва йшырхIвауала, ауи йнапIква ансимшы амазутI йылапI, дзачIвызлакIгьи хвыдъа дицхърагIитI», – лхIватI Ардзынба Гета.
Ауи йшылхIвазла, АААК йгьацIасым гIвычIвгIвыс кIьыда араса цхърагIара йзыгIаннаршауата, ауаса ари азын а-Конгресс ауысхагIвчва йшщаквдыргылызла, тгIачвакI йырзыгIандыршауа ацхърагIарала акыт шабгу йырцхърагIарныс рылшуштI.
«ХIара хIазхъвыцын йщаквхIыргылтI йалкIгIата ари агIвычIвгIвыс хIицхърагIарквын акыт шабгу рыхъазла ауи магIны шамазлуш, апхьарта арыпхьагIв дрымазлуштI, акытгьи –«знапIква ауыс йазъазу аъачIвагIагIв гврыхва». Йара ауи акIвпI хIара кытипхьадза абзазагIвчва зквгIазшIыхIтуа: ацацхърагIара, акыт сабап азгIазгуаш абзазагIвчва ркъару адкIылра», – лхIватI Ардзынба Гета.
ЙгIаджвыквырцIаз апроект даквчважвауата АААК йаланакIуа ЧкIвынргIа рсоветква рунашвачпагIв Торчуа Леван йшихIвазла, уыжвласыла атдзы ащапIы щтIарцIауа йалагуштI, уадыргIвана абльынква щтIырхуаштI.
«ХымызкI руацIа ахIахъваквцIара нхараква ахъвдаквыхIщтуаштI. Ауыс акыт абзазагIвчвагьи ацхърагIитI. ХIаргьи (а-Конгресс – аредакция ррытаразга) ауат хIрыцызлуштI», – йхIватI Торчуа.
Атдзы аргылра апны атгIачва абзихагIвчвагьи гIарцхърагIатI – «Каскад» фирма йгьи ауи аунашвачпагIв Ардзынба Аслан йхъатала, Апсны амшын хъвыхIква рынхарта йгьи ауи аунашвачпагIв Ардзынба Даур, ахIаракьатчпагIв Ашуба Артур. Адуней апсуа-абаза конгресс йшырзыразу рархIвтI анахьанат абзихагIвчвагьи: атгIачваа асаби чвартагъвкви асаби уандырчкIвынкви рзызхвгIаз Осиа Эсме йгьи Уаз Ирина.
АААК архъйагIв секретарь Гицба Инаргьи йшихIвазла, а-Конгресс анхари ауи апроекткви йцIыхъвахауа азаман джьгарта йгIарылалуа йалагатI йгIацапахта запхъанчIви псадгьыл йталхыз арепатриантква.
«Азаджв апамперскви асаби йызлайхьпшуаш апкъыгIвакви рзыгIайтйытI, ахвыц йылахIандзыкIьара йъадзазыбжу атгIачва памперсла йадигалырныс йыргвыгъатI. Датша заджвы фачIвы гIайтйытI. Арат абзихагIвчва ахIватI рыхьызква зджьарагьи йгIадмырбарныс», – йхIватI Гицба.
Йара Чиригба Батал йтгIачва йгIарцхърагIаз зымгIвагьи дырзыразта дрызхIвахIвтI. Акыт дызгIатахаз йгьи йкытлагIвчва хвыдъа дзырцхърагIауа ауысла йаницIгIа арыпхьагIв араса йджьауапхатI: «Сара араъа сгIадзынгылтI!»
Йхъапщыла Таниа Еленагьи хъатакIла йгIанымхаз, ауыхвара йацхърагIарныс йхIазыру зымгIвагьи дшырзыразу лхIватI.
«Анчва дырзыразхатI йъагIахIыцIагылыз. Ари хIара йхIунагIвапI, араъа хIбзазарныс хIтахъыпI. Схъапщыла апхьарта дакъвымцIхуата дынхарныс йтахъыпI, йгьиуам асабиква рарыпхьара нижьхырныс», – лхIватI ауи.
Баслахв кыт абзазагIв Читанава Коба йатагIаликIгIахтI Батал «момо» йымхIвауата йанакIвызлакIгьи йкытлагIвчва злагIайыхIвауала рхIатыр шибауа, уыскIгьи дшачвымшвауа.
«Щарда мцIуата саща адуней йхIваджьтI. Сара ауи йнышвынтара сыргылуан. Батал швабыж дгIасцхърагIатI. Ауи зымгIвагьи хвыдъа дырцхърагIитI», – йхIватI ахъацIа.
Баслахв апны АААК ашIыпIа хъвшара аунашвачпагIв Адлейба Роберт багъьата йхIвитI акыт швабыж магIны шазырбауа Батал йыцIагылра, ауи йтгIачва акыт йгIатахарныс шрылшуш апшта.
«Ауи асабиква суратчпара йазибжьитI, дгIвычIвгIвыс нардзапI, уыскIгьи дгьачвшвум. ЙанакIвызлакIгьи дгIахIцхърагIитI. МагIны ду амапI ауи йапшу агIвычIвгIвысква акыт йтымцIхуата йбзазарныс. АцIабырг схIвапIта, ауыс ангIащтIыхIхуаз хIахIвара ауи аъара ласы джьауап айаупIхIва хIгьымхъвыцуазтI. Швабыж хвы азыгIбитI швъагIахIцхърагIаз, хIхъатала хIйыцIагылта йтдзы йыцхIыргылуаштI», – йхIватI ауи.
Адуней апсуа-абаза конгресс анхара анархартаква рпны рыцIа хъгалра, магIны зму йрыуапI Апсны йгьи ареспублика утыцIта апсуакви абазакви йадкIылата йъабзазауа ашIыпIаква рпны ауагIа йрыцкIра, рбзазарта агъьчIвра цхърагIара азыгIаныршара. АбзазагIвчва дара-дара йырхъйачIву ауысква гIащтIырхта, йацIагылта рцришта апны абзазара шагъьырчIвуаш йазгылырныс йаквдыргвышхвауата акIвпI АААК ауысхагIвчва ари анхара йшадгылуа. Ауи ахъазла АААК ашIыпIа советква гIаннаршитI, ауат йъанхауа апны арат ауысква адыркIылитI. Асквш 2020 февраль мыз йадахIвуата Апсны йгьи Трыквшта рпны йгIандыршаз ашIыпIа советаква рпхьадзара 30 йнадзатI.
швталра йа тшаншвцIара атахъыпI.