Декабрь а 5 сквшы 80 йхъыцIитI Россия Федерация апны гIатгара зму айъазагIв Хвына Заудин Дагъаза йпа. АААК ахабарргарта портал ауи йбазара мгIви нархара щардала йалу йынхари йгIарыквчважвауа бзагIвра арыхIазыртI.
Айсан Людмила
Амедицина наукаква ркандидат, Россия Федерация апны гIатгара зму айъазагIв, «Солнечный» санаторий-профилакторий айъазагIв хъада Хвына Заудин йыхьыз Къарча-Черкес апны йахъазымкIва ауи утыцIтагьи бзита йырдыритI. Йуыс сакъта йгьи гватшныта дъазаъу йгIалцIла ауи дахIвра зму дунашвачпагIвта, зъазара хIаракIу дъачIвагIагIвта йгьи дшIыцрагIахъвыцыгIвта ртшхъвара гIатигатI: азгIвадарахчара атшауацIыхра ауи къару ду алайцIатI. Ауи Россия шабгула ахъатачIв айъазагIвчва йапхъахуз радкIылара даунашвачпагIвтагьи далырхтI. Заудин Дагъаза йпа Къарча-Черкес ахабзалыхырта айззара ауысхагIвчва ахIбачвагьи дрыуазаджвыпI.
ГвыхътIыла айчважвара
Зыхьыз дута йгаз ари айъазагIв сгIайыквчважварныс уыста йанскIы сара зымгIва йрапхъата йстахъыз ауи йгIвычIвгIвысща гIасырбарныс акIвын. Уызквчважвуш апхъапхъа уара йудырра атахъыпI. ДукI тшгIацIйырпшырныс бзи йымбауата зунашва згIаз агIвычIвгIвыс ауатква гIайшIугарныс шмайрамызлуш тшазсрыхIазыруан. Ауаса йаъазтIхIва гвышхвара гIасылазцIауагьи аъан: сан рыцхIа ХвынаргIа дыртпхIан. Йара йшцазла, зымгIва майрадзата йахъвдаквыцIтI.
ХIайчважвара ъакIвшуз Хвына Заудин йуысхарта пещ апны акIвпI: сара дгIаспыралын ауаъадза сналдастI ауи йпхIахIба ПIаз Татьяна. Ауи «Солнечный» айъазарта унашва ахъцIара йапщылу ауысква зымгIва лырцитI, лаба цIагыла бзита дизалитI.
ТIакIв цIыта агIвыджьгьи санрачважвуз йсгвапата гвы асттI ауат йабагIагвынгIвуа йшацынхауа, даргьи щалагьи псылагьи йаргвандзу, йацырчIву ауысгьи ззацырцауа зджьакI шракIву гIасгвынгIвытI.
Татьяна Заудин йпхIа ажва аламкIва асанаторий ауысква зымгIва дрыхагIвазапI. Ауаса рахIа йджьаущауа ауи лаба йынхара йапщылу зымгIва ъалдыруа, йбзазара йалаз гIаншара джьащахъва щарда майрата йшгIалгвалашвахуа акIвпI. АжвапIта, ауи зынла лхъа йгIаташвахтI Заудин Москва уыс йымата дшпссгIуз асамолет апны дызлашваз гIаншаракI.
«ЙпссгIуз рыуа заджвы йгвы дгIанакIын асамолет ауацIа нагIвгIагIври гвжвайри гIаншатI, ауаса хIаба ласыта ауи дихьпшын дйырбзихатI», – лхъагьи мачIкI ду йылбахуа йылхIвахитI Татьяна. Саргьи сазхъвыцтI: «Йгьузыпхьадзарым ауи абарауаса зъарагIвы дырцхърагIаз, зъарагIвы абзазара йазгIацайырпахыз».
Турых зму атгIачва
Заудин Дагъаза йпа абаза кыт Къвбина (Къвбиналокт) йауаз Хвына Дагъаза АсхIад йпи ауи йхъапщыла, ДагвжвейргIа йыртпхIаз Тезада Мусса йпхIи ртгIачва апны дйытI.
«Сара ауат сыргIаризаджвыкIын, – йхIвахитI йара айъазагIв. – ХIан аколхоз апны дынхун, хIаба Къвбина апны Чкалов йыхьыз зхъыз аколхоз унашва ахъицIун. АгIвыджьгьи щымтанамаз уалагата джьасыдза йынхун, акыт атгIачваква зымгIва йрапшын, йахърыкъьамкIва йбзазун».
Ласыла йаба ар дызшIырттI. Аефрейтор Хвына Дагъаза асквшква 1941-1945 рагIан йакIвшаз Абашта айсра Ду ахъа уалагата ацIыхъвадза далан, аштаб батарея апны дпшыхвгIвын. ЙшварагIвараз йгьи магIын ду змаз ахъвдаквцIараква ъайырхъйуз ахъазла йапшым артшхъвагаквала йыхьыз рхIватI. Абар ужвы ауи йпи йпа йпхIи срыдзхъачIвапIта ауат ауи рхъа йыладухауа ргвквагьи йзыпшката йхабарква гIасархIвитI: айсра амщтахь Къвбина акыт совет дахъадата йуыс шихуз, датшагьи щарда.
Ауат атгIачва ртурых йапщылата швъа щарда азыркIкIытI: рзаъачва зну сквшщарда зхъыцIуа асуратква, Дагъази ауи йапхъанчIвикви йгIарыквчважвауата агазеткви акнигакви йгIартырсу агIвыраква…
ЙгIалуымкIгIушта йгьаъам ари апш швапхагьи: швабыж аргваныта йрыщтаныкъвитI атгIачва Заудин Дагъаза йпа йабалата йанламкIва йыму йахщчви йащи – Галина, Света, Зоя, Ромик. Ауыгьи щарда йахвпI!
Асабихъа адерсква
Йхпахуз аклассдза Заудин Къвбина апхьарта апны дапхьатI. Адырра йащтаз, згIарбараква бзийыз дапхьагIвын, ауаса ауысква ауаса йалын – йан лахьыла йзаъачва зымгIва Квта Азияла йтыргатI.
«ЗныкI хIани сари цхърагIагIвдъа хIгIанхан ауат хIрыщтацара атахъхатI, – йгIайгвалашвахитI Заудин Дагъаза йпа. – ХIъаджвыквлыз хIара хIкытлагIвчва хъацIи пхIвыси ХIасарокъваргIа ИсмагIильи Хаджьати хIадагIвача йгIахIынйатI. ХIуыс зквыз анырдыр ауат зынла ахчала йгIахIцхърагIатI. Ауи азаманла йгIауахвырквын ауи цхърагIара дууын. Ауаъа акIвпI сара йапхъахауата кърар, гIвычIвгIвысагIа, гвчIагIв ззырхIвауа аныздыр. АнцIрала сгвы йгIатахан ужвы йъагIадзазгьи йгьсхъаштылуам».
ЗаудинчкIвыни йани Таджик ССР апны ръахIыльчва ъаныз йачвыхъарамкIва Курган-Тюбе къала апны тшандыргIалтI. Йан аколхоз нхара далагатI, йшлылшуз лзаъачваква дрызцалун, йылбун. Заудин апхьарта шIыц дыцIалтI, ауаъа ласыта тшарыщцата апхьара нардзахра атахъын.
Апхьара йахъазымкIвагьи уыс щарда йыхъвда йхъан: йан дылцхърагIара, аунагIва хъацIа уыста йаъу йхара атахъын. Абзазара адерс мчкви аъадаб багъьи рмагIны Заудин дшхвыцыркIваз йдыртI.
Асквш 1957 агIан арепрессияква йрылашваз ауагIа чвгьарала рцIыхъва йтыцIхын ЗаудинргIа рзаъачвагьи даргьи рпны йгIайхтI. Ргвы цIыркIгIун ауат дада Муси нана Кьанфи ъарыцхымыз – ауат Таджикистан апны йпсын йара ауаъа йыцIарцIахтI.
Абаза чкIвын йрызна
Рцри Къвбина апны ХвынаргIа рбзазара псайспамцара атара йтагылхтI. Апхьара йазгIашыкъыз ачкIвын квтанай дырра гIацIигара йтахъын, акыт апны йаъаз агIсквша апхьартан. Йаргьи ансимшы хвкилометркI дцауа-дгIайхуамцара гIвысквша Къвбина дтыцIуанта Джьгваты станица йапхъахауа апхьарта дцун. Ауи аобласть апны йагъьыз апхьартаква йрылапхьадзан, ауаъа йынхуз арыпхьагIвчва къайматква Заудин Дагъаза йпа ужвы йъагIадзазгьи йгIайгвалашвахитI рыхьызквагьи пхата йхIвитI: Долбина Клавдия Федор йпхIа, Памазанова Алла Михаил йпхIа, Каспарянц Александр Яков йпа, Киселев Дмитрий Андрей йпа. АйъазагIв йшихIвауала, ауат адырраква йырхъазымкIва йагъьу агIвычIвгIвыс хIальквагьи гIайыларцIатI.
«Бзидздзата йапхьуз хгIвы акласс хIгIарылхIвауа хIцатI – сара, Аксенов Миша йгьи Салейко Сашка, ахыгIвгьи хIагIвзачван, – йхIвахитI Заудин Дагъаза йпа. – Ауаъа йгIашIарышвта хIара хIащтаныкъвара зынгьи йгьшIымчIватI. ХIара хIшIан, хIджьгарын, абзазара анхIхIырдыруаз зджьарагьи хIгIващауазарын, ауаса ауат асквшква насыпла йырчвын, ауи агIан зымгIва гIалагагIвацун…»
Аквтанай апхьарта ауи асквш 1959 агIан рызна медаль йымата дгIалгатI. Ауи Заудингьи йъахIыльчвагьи йкытлагIвчвагьи рыхъаз йапхъахуз айгIайран.
«Апрофессор Доуэль йхъа»
Заудин Дагъаза йпа йарыпхьагIвчва рхабарква ангIасайхIвуаз сара ауи йъачIвагIа агIалхра збзиру химияла дазрыпхьуз Памазанова Алла Михаил йпхIа лакIвзапI – хIва сгвы йгIанагтI. Ауаса йара йшихIвахызла ймагIынхушыз рыцIа пасата йщаквйыргылхьан. Абар ауыс шцаз.
ЖвыгIвсквшакI дыртата ачкIвынхвыц абиблиотека апны книга джьащахъвакI дашIашватI – ауи агIан щардагIвы зпхьуз Беляев Александр йфантастика роман «Апрофессор Доуэль йхъа».
«Ауи сгIакъвымцIуа сапхьатI: ауи апхъала сызпхьаз закIгьи ауи апш лахIвара гьгIасыланамцIасызтI, уыдракI ззырхаз заджвы сйапшын», – йгIайгвалашвахитI йсабихъа йауу агIаншара Заудин Дагъаза йпа.
Ауаса айчва йызниуа йаналага ауи амщтахь акIвпI.
«Сара уахъгьи тшынгьи ауи ароман йалаз агIаншараква сыла йгIацIазыжьуан. Афыр хъада йхъаквынцI айхацIаква шазызгауа сазхъвыцуан, апрофессор Керн йчпуз садгылуан йа йамаскIуан. Зынзамыза датшата йчпа йшауаш сазыпшгIун. АхъаквынцI анхаща рыцIа йагъьта йшучпуш ауысла схъвыцраква ауи аъара хъарата сджвыквырган – хирургия сазынадырдзата гIацIцIуаштI», – дхъыччитI Заудин Дагъаза йпа.
Ауи аъачIвагIа йща йалатагьи йаъазарын. Ауи йабаду АсхIад Къвбина апны йбергьльыз дъазан, ауыгьи хIврала айъазара амадзаква йара йаба Хысдауыт йгIайшIикIгIатI.
Айъазара апны нархарата йгIалихуаш Заудин Дагъаза йпа багъьата йанаквикI Ставрополь медицина институт йпщбахуз акурс данапхьуз агIан акIвпI. Аинститут ауи асквш 1966 агIан дгIалгатI. ДстудентыркIвата Москва, Ленинград, Краснодар, Оренбург рпны йакIвшуз анаука конференцияква дрылата дгIачважвалун. Айъазара джвыквицIара йтахъынта аспирантура даннарахвуаз ауаъа анхара йацйырцауата дапхьарныс рыцIа йгIалихтI.
Йгьи дайъазагIвпI, йгьи дунашвачпагIвпI
Къарча-Черкес автоном область апны азгIвадарахчара аргIапсща анщаквгылгIвацуз йгьи тшанауацIнахуаз атлахан асхъан ауи йапшыз аъачIвагIагIвчва «ахьапщ йагIвызан». Йгврыхваз аъачIвагIагIв шIа Адыгьа-ХIабльа район чымазагIвтара хирургта дырщтитI.
«Аобласть згIвадарахчарала ахъвшара аунашвачпагIв Казанчев Савва Дмитрий йпа йпещ апны ауырата дангIасачважва амщтахь ауи ачымазагIвтара апны айъазагIв хъадата сдыргылтI», – йгIайгвалашвахитI Заудин Дагъаза йпа.
Джьауап ззукIра атахъыз анхара ду джвыквылтI. Заман айшысла аунашвачпагIв шIа апхъала йзыпшуа дунашвахъцIагIвта тшгIайырбатI, ауи йацйырцауата ачымазагIвтара апны аркъьараква зчпуз хирургтагьи даъан. Араъа ауи йылахьгьи гIацIцIтI: аркъьараква йыцызчпуз амедицина ахща Уаз Мария Мурат йпхIа длыднагалтI, пхIвыста дгIайгын хгIвысабичва йызгIалритI.
АчымазагIвтара дъадзанхаз ажвыгIвсквша руацIа ауаъа ашIашIкIгIара згIваква йъарайъазауа, асаби йгьи агинекология хъвшараква гIахъыртIын бзита йынхауа йалагатI, адырраква злазкIуаз аъачIвагIагIвчва гIарахвтI. Заудин Дагъаза йпа далата ачымазагIвтара йаланакIуата йдыргылуашыз поликлиника шIыц апроект лырхуа йалагатI. Ауи анардзахра зквшваз йара йбжьаз Бадахов Хзыри Лачвыш Владимири ракIвпI – йара асквш 1979 агIан Усть-Джьгваты аквта район чымазагIвтарала айъазагIв хъадата дахъыргахтI.
«АгIамта дапхъысуата»
Ари ачымазагIвтара апынгьи Заудин Дагъаза йпа аунашвахъцIари аркъьаракви дахIврала йацйырцауата агIсквша дынхатI.
Ауи азаман ауацIа йаргьи далата Усть-Джьгваты къали Московский поселоки рпны аполиклиника шIыцква ауырщттI, ашIыпIа чымазагIвтара ауыхвари арайон чымазагIвтара ахирург хъвшара апроект лыхри йрылагатI. АйъазагIв-хирург гIальамат йъачIвагIалагIвчвагьи дыздыруаз зымгIвагьи дырзыджьамщауата пIатIу йыквырцIун.
«Заудин Дагъаза йпа йпны апшта айъазартакI апынгьи ауи аъара надзара зму анхара адгалщи аъадаби сгьырнымйатI», – лгвгIанаграква хIыцагIвылшатI Хвына Заудин йунашва дацIата Усть-Джьгваты район чымазагIвтара апны йынхата «Солнечный» санаторий-профилакторий апынгьи ауи йтарагылыгIву Къарча-Черкес Республика апны гIатгара зму айъазагIв Узденова Нина СолтIан йпхIа. Ауи йгIалылкIгIитI Заудин Дагъаза йпа йанакIвызлакIгьи агIамта дшацчIвырхъауа, «зынзамызагьи дшапхъысуа».
«Йара йхъатала дашIамсуа йхъа дадынхалитI, амедицина апны аъачIвагIа шIыцква тшырзибжьитI, йыцынхаквауагьи ауи йаквгIазшIититI. Заудин Дагъаза йпа нхагIв гвыпта дызлазлакI рпынгьи йыхв здуу ауыс бзита йъайдыруа, ауи йаццауата дъагIвычIвгIвыс цкьу интеллигентрагьи ъанкъвигауа акIвпI. Ауи йгвымчIвари анхара йазгIашыкъри зымгIвагьи къару гIарыларцIун», – лхIватI Нина СолтIан йпхIа.
Йджьаущушта йгьаъам Къарча-Черкес апны йапхъахауата йгIандыршаз йгьи уахьчIвала йзакIзаджвыкIу айъазарта-профилактика хьпшырта дайъазагIв хъадахарныс ахирург Хвына Заудин йъагIайыквдырпшыз.
«Солнечный»
Асквш 1987 агIан Черкесск тшауацIнахыркIвун: ахIабльа шIыцква гIаншун, спорт, социал-арыпхьара нархара змаз уыхвараква акIвшун. Европа апны рахIа йпхатшаз ацемент заводи ауи аунашвачпагIв Платонов Виктори рбзирала азавод анхагIвчва рыхъазла йапхъахуз айъазарта-профилактика хьпшыртагьи гIахъыртIытI. Ауи агIамтала йгIауахвырквын асанаторий ачымазагIвква йрыхьуа злащаквуыргылуа йгьи уызларайъазауа рахIа йшIыцыз анхагаквала йадгалан, араъа йгIацIцIуан йоди броми злу адзпха. Айъазарта Къарча-Черкес йахъазымкIва Лагъь КIавкIазгьи Россия АгIвадахь шабгугьи рпны йырдыруа йцатI.
Абарауаса йджвыквылтI йбергьльу «Солнечный» санаторий-профилакторий атурых. УахьчIва ауи сквш 30 райхIа гIацIанакIитI, ауи азаман шабгу ауи унашва ахъицIитI Заудин Дагъаза йпа.
Ауыс зымгIва рапхъа йджвыквуцIарнысгьи заджвгьи дгIаухьуымрыдзауата уынхарнысгьи гьмайрам. Сара ауи сымагIальаматта апхъахьыла хачIвыта рпахь йдыргылуа ауысла адиректор хъада тшылзынасырхитI.
«Ари асахIат хIызтагылу агIамта гьмайрам, ауаса хIара хIгвы бзита хIапхъала хIпшитI, йхIызгIайуа ачымазагIвипхьадза гватшныта хIйайгвгIвитI, айъазара рыцIа йагъьу амальква йыдыгIгалитI», – лхIвитI Татьяна Заудин йпхIа.
Абидоль ахьыла Заудин Дагъаза йпа йбжьы згIитI: ауи ачымазагIвква рыуа заджвы сальам йайхын йызгIвадара дазцIгIитI, ауахьауыгьи дымшыркъвауа джьауапта – «АйъазагIв хъада йуыс гьнижьуам!» – гIайыйтитI. Саргьи ауи ачымазагIв сйыцта ари згвы зымрыдзуа, дчкIвынызшва йаъаркIву, зкъару таркIву ахирург дджьасщитI. Йалыргатагьи йызбитI спахь йгылу – насып зму дшгIвычIвгIвысу. Ауи анхарагьи ажвлара уысквагьи гьныйыжьуам, Россия Федерация ауролог-андрологква радкIылара далапIта – ауаъагьи йдыруа йъачIвагIалагIвчва йрыцагIвишитI. Декабрь а 14 ауи Ярославль апны йакIвшуш Россия ахирургква райззара ду дцарныс тшадигалитI.
АхъатачIв уысква – бзидздзата
Хвына Заудин йтгIачва шызбаз ауысла йшвасхIвыз йацсцIахра стахъыпI ари атгIачва абанпаракI руыс арахьари абанпара йшнадырдзахуа злагIауырбуш швапхатагьи йшалуа. ЙгIвыджьхауа рпхIа Льильи рпа Аслани раба йъачIвагIа гIалырхтI. Москва йтагылу Россия ауагIахъаква райгвара аинститут йангIалга амщтахь агIвыджьгьи дахIвра рымата Москва айъазартаква рпны жвасквша йынхатI, акандидат диссертацияква рхчатI.
Ауаса ауат ажважв «ДъагIадрийыз апны датахъхатI» ззырхIваз йрыуапI. Рпны йгIайхын рцри республика апны ауагIа дырбзихитI. Абазаква йшырцIасу апш рпазаджвыкI Аслан йани йаби дрыцбзазитI, пхIвыс дгьгIайымгстI. ЙъачIвагIалагIвчви ачымазагIвкви ауи «Аслан Заудин йпа» – хIва йыпхьауа дцахьатI. Ареспублика аонкология квта апны урология ахъвшара унашва ахъицIитI. РпхIа Щыбзыхва Льильа Заудин йпхIа Къарча-Черкес асабийырта квта апны агинекология хъвшара даунашвачпагIвпI.
Сара Татьяна лпхIа, жвипщсквша йырту Анжелина слабадыритI. Ауыгьи дайъазагIвхарныс лтахъыпI. Анжелина ари абзагIвра йацсцIуш лабаду йсуратква гIалсхырныс дгIасцхърагIатI йгьи йгIасалхIвтI лдада цIлауатрагьи шйырхарджьуа, йыцIлаква йгIаршIалуа ашвырква рсуратквагьи слырбатI.
СгIаджвыквылхуата ран Льильа йлыцта кIьасата йгIайхыз Заудин Дагъаза йпа рахIа йхвыцу – хысквши сквшыкIи йырту – йтынхаква гIасынйитI. Ибрагими АсхIади тшызларзынасырхаз сазцIгIара: «Шваргьи дада йапшта швайъазагIвхушма?» – агIвгъырпIичкIвынкIгьи джьауап гIартра атарала рхъаква рчпитIта зымгIвагьи аладырхъыччитI.
Ауи апш абагвынгIвра ъазбауа сгвылагьи спсылагьи сгвыргъьитI. Бзира зквнагу арат ауагIа руысква йанакIвызлакIгьи йбзийызтI!
Заудин Дагъаза йпагьи ауи йтгIачва пшдзагьи анасып, азгIвадара, адахIвраква рзыхIтахъпI!
швталра йа тшаншвцIара атахъыпI.