АААК ЙхIаракIу асовет аунашвачпагIв Эгьзакь Мусса Трыквшта Сакарйа апны апсыуа культура квта ауыхвара йазалху гвчIагIвра цхърагIарата доллар 15000 риттI.
Барганджиа Саид
Адуней апсуа-абаза конгресс ЙхIаракIу асовет аунашвачпагIв Эгьзакь Мусса атрыкв къала Сакарйа апны апсыуа культура квта ауыхвара йазалху гвчIагIвра цхърагIарата доллар 15000 риттI. Ари ахабар АААК ахабарргарта портал йырзыгIайцхIатI а-Конгресс архъйагIв секретарь Гицба Инар.
Ауи йшихIвазла, ари апш щаквыргылра нахвхатI АААК аунашвачпагIвчви ауи акъала апны зынхара джвыквызцIахьу апсыуа культура квта аунашвачпагIвчви ранйара амщтахь.
Сакарйа аквта абаза уагIа йрыуата 3000-гIв райхIа аднакIылитI, гIамта айшысла ауат рпхьадзара 5000-гIв йнадырдзарныс мурад рымапI аквта аунашвачпагIвчва. Аквта апны апсыуа бызшва йадрыпхьитI, акультура анйараква акIвдыршитI, джьгарта йынхитI ауагIа рыпшдзагаква зрыхIазыруа, апхъанчIви напIлачпара пкъыгIваква рчпаща цIас агIащаквыжьра йащту апхIвысква рсовет.
«Аквта ажвлара йрынйата айчважвараква анакIвдыршуз атдзы ауыхвара проект ауатыкв йгIатарцIатI», – йгIацицIахтI Инар.
Аквта аунашвачпагIв Кобащ (Бганба) Орал йшихIвазла, апхъапхъа аквта аунашвачпагIвчва Сакарйа къала ауысхарта тшырзынадырхатI ауыхвара ахъазла адгьыл гIарыртырныс йахIвауата. РахIвара тшазынархара разыра джьауап гIарттI. Ужвы атдзы дыргылырныс ахъазла абгата доллар зыкь 160 азыркIкIра атахъыпI. Згвы йгIатыцIуа дзачIвызлакIгьи йылшуштI аквта ауыхвара афонд ахчала дацхърагIарныс.
Сакарйа апсыуа культура квта – 14 йнадзауа Трыквшта апсыуа культура квтаква йрыуазакIыпI. Афедерация аквтаква нархара хъадата йрымапI аэтнокультура абайара агIахчара.
швталра йа тшаншвцIара атахъыпI.