Лента событий ВААК
«ХъвлапныкI атеатр апны» – йащтагIайуа
Адуней апсуа-абаза конгресси Чанба С. йыхьыз зхъу Апсуа къральыгIва драма театри йацдырхъйауа апроект апкъ йтата йгIвбахауа атеатр хъвлапны акIвшатI.
Ари азын агвыргъьахъв ззадыргалыз Жвандрыпщи Хыпсти рквтанай апхьартаква рапхьагIвчви рарыпхьагIвчви ракIвпI.
ЙшцIасхаз апшта атеатр ауацIа агIамдара акIвлыршатI Апсны апны гIатгара зму ажурналист Когониа Элеонора. Ауи атеатр шгIаншаз атурых, атеатр апны хабзата йщаквгылу азазаъащаква дгIарыквчважватI. АпхьагIвчва асцена ащтахьгьи йыкIвшатI, амадзаква зпщылу атеатр абидольква гIамырдатI. Аспектакль йаламгаскIва ауат артистква тшъаршвуа йнашылта аргылчIв апны йгIахъвмарквуш йрабадырныс йахадзатI. Ауи акIвымкIвгьи чкIвынкI артист турасы дтагылырныс гIайыквдырпштI. Ауи грим йхьырщтI, аргылчIв йаквыргIапсу чгIвыча йшвырцIатI. Йаргьи дгвыргъьачIвауа тширартистуа дхъвмаруан, йыгIвзачва йыцта кIарт рхъырхуан.
Абадырраква рымщтахь ацIайква абуфет йдырцан а-Конгресс йрызнарыхIазырыз ахъагIараквала тшдрытхаджьтI. УацIыхъван ауат атеатр апещ йнашылын Италия йбазуз адраматург Гальдони Карло йпьеса ащатала йдыргылыз «Мирандолина» спектакль йапшытI.
