Лента событий ВААК
Санкт-Петербург апны апсуа-абаза диаспора Эгьзакь Мусса йынйатI
Санкт-Петербург йту апсуа-абаза диаспора Адуней апсуа-абаза конгресс ЙхIаракIу асовет аунашвачпагIв, «Алашара» Дуней адкIылара апрезидент Эгьзакь Мусса ХIабальа йпа йынйатI.
Анйара гIахъитIуата асасчва пхата драйхIвахIвтI йгьи адиаспора рпны ацзакIыри тшадкIылри рмагIны гIаликIгIатI апрезидент йаппарат ауысхагIв Цвижба Абзагв.
Айчважвара анджвыквыл ауаъа йгIадгылыз астудентква чкIвыныргIа адиаспора руысква рыцIа мчыта йшызрылалуаш, ауат рджьгарра щтIыцIра ахъазла йчпа йауаш ауысла азцIгIараква гIащтIырхтI. Мусса ХIабальа йпа ашIаква йабаркIу, йабагвынгIвуа атгIачва йшахъвыкIу рылархIвауата йаъазара ахIатырла абадырра, айкьангьашра-айчважвараква рмагIны шдуу дацIачIвагъватI.
Эгьзакь Мусса йгIачважвара апны йара йбзазара йалаз гIаншара джьащахъваквакIгьи гIайгвалашвахтI, ауат йайззакваз гвышхвара ду гIарыларцIатI. Ауи агIвычIвгIвыс йызхIарныс, ажвлара рбзазара джьгарта далазарныс ахъазла йчпачIву ауысла йгвгIанаграква йхIватI.
Анйара йалан Новиков А.А. йыхьыз зхъу Граждан авиация акъральыгIва университет, апрофессор Бонч-Бруевич М.А. йыхьыз зхъу Ателекоммуникацияква ркъральыгIва университет рстудентква, Можайский А.Ф. йыхьыз зхъу Айсра-уапчахв академия акурсантква. Алалра йалаз дрыуан АААК хабарргарала аполитики абадырракви унашва рхъызцIауа Тарба Тенгьызгьи.
Айззара йалакваз ари йапшу анйара гIамта-гIамта йакIвыршалара шатахъу, ауи чкIвыныргIи адиаспора йрыуата рыцIа закI нызцIхьази рабадырра шарыбагъьуш рхIватI. Мусса ХIабальа йпа арат йрапшу анйараква апсуа-абаза уагIа йрыуу чкIвыныргIа радкIылри йрыцкIри апны уыс ду шдырхъйауа, ашIаква ажвлара рпны ргыларта рауныс йшырцхърагIауа, апхъагылагIв хIаль шгIарыланацIауа гIаликIгIатI.